5. ма̄лукйапуттаттхерага̄тха̄

794. [сам̣. ни. 4.95] ‘‘рӯпам̣ дисва̄ сати мут̣т̣ха̄, пийам̣ нимиттам̣ манаси карото;

са̄раттачитто ведети, тан̃ча аджджхосса тит̣т̣хати.

795. ‘‘тасса вад̣д̣ханти ведана̄, анека̄ рӯпасамбхава̄;

абхиджджха̄ ча вихеса̄ ча, читтамассӯпахан̃н̃ати;

евама̄чинато дуккхам̣, а̄ра̄ нибба̄на [нибба̄нам̣ (сӣ.)] вуччати.

796. ‘‘саддам̣ сутва̄ сати мут̣т̣ха̄, пийам̣ нимиттам̣ манаси карото;

са̄раттачитто ведети, тан̃ча аджджхосса тит̣т̣хати.

797. ‘‘тасса вад̣д̣ханти ведана̄, анека̄ саддасамбхава̄;

абхиджджха̄ ча вихеса̄ ча, читтамассӯпахан̃н̃ати;

евама̄чинато дуккхам̣, а̄ра̄ нибба̄на вуччати.

798. ‘‘гандхам̣ гхатва̄ сати мут̣т̣ха̄, пийам̣ нимиттам̣ манаси карото;

са̄раттачитто ведети, тан̃ча аджджхосса тит̣т̣хати.

799. ‘‘тасса вад̣д̣ханти ведана̄, анека̄ гандхасамбхава̄;

абхиджджха̄ ча вихеса̄ ча, читтамассӯпахан̃н̃ати;

евама̄чинато дуккхам̣, а̄ра̄ нибба̄на вуччати.

800. ‘‘расам̣ бхотва̄ сати мут̣т̣ха̄, пийам̣ нимиттам̣ манаси карото;

са̄раттачитто ведети, тан̃ча аджджхосса тит̣т̣хати.

801. ‘‘тасса вад̣д̣ханти ведана̄, анека̄ расасамбхава̄;

абхиджджха̄ ча вихеса̄ ча, читтамассӯпахан̃н̃ати;

евама̄чинато дуккхам̣, а̄ра̄ нибба̄на вуччати.

802. ‘‘пхассам̣ пхусса сати мут̣т̣ха̄, пийам̣ нимиттам̣ манаси карото;

са̄раттачитто ведети, тан̃ча аджджхосса тит̣т̣хати.

803. ‘‘тасса вад̣д̣ханти ведана̄, анека̄ пхассасамбхава̄;

абхиджджха̄ ча вихеса̄ ча, читтамассӯпахан̃н̃ати;

евама̄чинато дуккхам̣, а̄ра̄ нибба̄на вуччати.

804. ‘‘дхаммам̣ н̃атва̄ сати мут̣т̣ха̄, пийам̣ нимиттам̣ манаси карото;

са̄раттачитто ведети, тан̃ча аджджхосса тит̣т̣хати.

805. ‘‘тасса вад̣д̣ханти ведана̄, анека̄ дхаммасамбхава̄;

абхиджджха̄ ча вихеса̄ ча, читтамассӯпахан̃н̃ати;

евама̄чинато дуккхам̣, а̄ра̄ нибба̄на вуччати.

806. ‘‘на со раджджати рӯпесу, рӯпам̣ дисва̄ патиссато;

вираттачитто ведети, тан̃ча на̄джджхосса тит̣т̣хати.

807. ‘‘йатха̄сса пассато рӯпам̣, севато ча̄пи веданам̣;

кхӣйати нопачӣйати, евам̣ со чаратӣ сато;

евам̣ апачинато дуккхам̣, сантике нибба̄на вуччати.

808. ‘‘на со раджджати саддесу, саддам̣ сутва̄ патиссато;

вираттачитто ведети, тан̃ча на̄джджхосса тит̣т̣хати.

809. ‘‘йатха̄сса сун̣ато саддам̣, севато ча̄пи веданам̣;

кхӣйати нопачӣйати, евам̣ со чаратӣ сато;

евам̣ апачинато дуккхам̣, сантике нибба̄на вуччати.

810. ‘‘на со раджджати гандхесу, гандхам̣ гхатва̄ патиссато;

вираттачитто ведети, тан̃ча на̄джджхосса тит̣т̣хати.

811. ‘‘йатха̄сса гха̄йато гандхам̣, севато ча̄пи веданам̣;

кхӣйати нопачӣйати, евам̣ со чаратӣ сато;

евам̣ апачинато дуккхам̣, сантике нибба̄на вуччати.

812. ‘‘на со раджджати расесу, расам̣ бхотва̄ патиссато;

вираттачитто ведети, тан̃ча на̄джджхосса тит̣т̣хати.

813. ‘‘йатха̄сса са̄йарато расам̣, севато ча̄пи веданам̣;

кхӣйати нопачӣйати, евам̣ со чаратӣ сато;

евам̣ апачинато дуккхам̣, сантике нибба̄на вуччати.

814. ‘‘на со раджджати пхассесу, пхассам̣ пхусса патиссато;

вираттачитто ведети, тан̃ча на̄джджхосса тит̣т̣хати.

815. ‘‘йатха̄сса пхусато пхассам̣, севато ча̄пи веданам̣;

кхӣйати нопачӣйати, евам̣ со чаратӣ сато;

евам̣ апачинато дуккхам̣, сантике нибба̄на вуччати.

816. ‘‘на со раджджати дхаммесу, дхаммам̣ н̃атва̄ патиссато;

вираттачитто ведети, тан̃ча на̄джджхосса тит̣т̣хати.

817. ‘‘йатха̄сса виджа̄нато дхаммам̣, севато ча̄пи веданам̣;

кхӣйати нопачӣйати, евам̣ со чаратӣ сато;

евам̣ апачинато дуккхам̣, сантике нибба̄на вуччати’’.

… ма̄лукйапутто тхеро….