3. телака̄ниттхерага̄тха̄

747. ‘‘чирараттам̣ вата̄та̄пӣ, дхаммам̣ анувичинтайам̣;

самам̣ читтасса на̄латтхам̣, пуччхам̣ саман̣абра̄хман̣е.

748. ‘‘‘ко со па̄ран̇гато локе, ко патто аматогадхам̣;

касса дхаммам̣ пат̣иччха̄ми, параматтхавиджа̄нанам̣’.

749. ‘‘антован̇кагато а̄си, маччхова гхасама̄мисам̣;

баддхо махиндапа̄сена, вепачитйасуро йатха̄.

750. ‘‘ан̃чха̄ми нам̣ на мун̃ча̄ми, асма̄ сокапариддава̄;

ко ме бандхам̣ мун̃чам̣ локе, самбодхим̣ ведайиссати.

751. ‘‘саман̣ам̣ бра̄хман̣ам̣ ва̄ кам̣, а̄дисантам̣ пабхан̇гунам̣.

касса дхаммам̣ пат̣иччха̄ми, джара̄маччупава̄ханам̣.

752. ‘‘вичикиччха̄кан̇кха̄гантхитам̣, са̄рамбхабаласан̃н̃утам̣;

кодхаппаттаманаттхаддхам̣, абхиджаппаппада̄ран̣ам̣.

753. ‘‘тан̣ха̄дханусамут̣т̣ха̄нам̣, две ча паннараса̄йутам̣ [дведха̄паннараса̄йутам̣ (?)];

пасса орасикам̣ ба̄л̣хам̣, бхетва̄на йади [йада (сӣ. ат̣т̣ха.) хади (?) ‘‘хадайе’’ти там̣сам̣ван̣н̣ана̄] тит̣т̣хати.

754. ‘‘анудит̣т̣хӣнам̣ аппаха̄нам̣, сан̇каппапаратеджитам̣;

тена виддхо паведха̄ми, паттам̣ва ма̄лутеритам̣.

755. ‘‘аджджхаттам̣ ме самут̣т̣ха̄йа, кхиппам̣ паччати ма̄макам̣;

чхапхасса̄йатанӣ ка̄йо, йаттха сарати саббада̄.

756. ‘‘там̣ на пасса̄ми текиччхам̣, йо метам̣ салламуддхаре;

на̄на̄раджджена саттхена [на̄раггена на саттхена (?)], на̄н̃н̃ена вичикиччхитам̣.

757. ‘‘ко ме асаттхо аван̣о, салламаббхантарапассайам̣;

ахим̣сам̣ саббагатта̄ни, саллам̣ ме уддхариссати.

758. ‘‘дхаммаппати хи со сет̣т̣хо, висадосаппава̄хако;

гамбхӣре патитасса ме, тхалам̣ па̄н̣ин̃ча дассайе.

759. ‘‘рахадехамасми ога̄л̣хо, аха̄рийараджаматтике;

ма̄йа̄усӯйаса̄рамбха, тхинамиддхамапаттхат̣е.

760. ‘‘уддхаччамегхатханитам̣, сам̣йоджанавала̄хакам̣;

ва̄ха̄ ваханти куддит̣т̣хим̣ [дуддит̣т̣хим̣ (сӣ. дха. па. 339)], сан̇каппа̄ ра̄ганиссита̄.

761. ‘‘саванти саббадхи сота̄, лата̄ уббхиджджа тит̣т̣хати;

те соте ко нива̄реййа, там̣ латам̣ ко хи чхеччхати.

762. ‘‘велам̣ каротха бхадданте, сота̄нам̣ саннива̄ран̣ам̣;

ма̄ те маномайо сото, руккхам̣ва сахаса̄ луве.

763. ‘‘евам̣ ме бхайаджа̄тасса, апа̄ра̄ па̄рамесато;

та̄н̣о пан̃н̃а̄вудхо саттха̄, исисан̇гханисевито.

764. ‘‘сопа̄н̣ам̣ сугатам̣ суддхам̣, дхаммаса̄рамайам̣ дал̣хам̣;

па̄да̄си вуйхама̄насса, ‘ма̄ бха̄йӣ’ти ча мабрави.

765. ‘‘сатипат̣т̣ха̄напа̄са̄дам̣, а̄руйха паччавеккхисам̣;

йам̣ там̣ пуббе аман̃н̃иссам̣, сакка̄йа̄бхиратам̣ паджам̣.

766. ‘‘йада̄ ча маггамаддаккхим̣, на̄ва̄йа абхирӯханам̣;

анадхит̣т̣ха̄йа атта̄нам̣, титтхамаддаккхимуттамам̣.

767. ‘‘саллам̣ аттасамут̣т̣ха̄нам̣, бхаванеттиппабха̄витам̣;

етесам̣ аппаватта̄йа [аппаваттийа̄ (?)], десеси маггамуттамам̣.

768. ‘‘дӣгхаратта̄нусайитам̣, чирараттамадхит̣т̣хитам̣;

буддхо мепа̄нудӣ гантхам̣, висадосаппава̄хано’’ти.

…телака̄ни тхеро….