15. сол̣асаканипа̄то

1. ан̃н̃а̄сикон̣д̣ан̃н̃аттхерага̄тха̄

673. ‘‘еса бхиййо пасӣда̄ми, сутва̄ дхаммам̣ маха̄расам̣;

вира̄го десито дхаммо, анупа̄да̄йа саббасо.

674. ‘‘бахӯни локе читра̄ни, асмим̣ патхавиман̣д̣але;

матхенти ман̃н̃е сан̇каппам̣, субхам̣ ра̄гӯпасам̣хитам̣.

675. ‘‘раджамухатан̃ча ва̄тена, йатха̄ мегхопасаммайе;

евам̣ самманти сан̇каппа̄, йада̄ пан̃н̃а̄йа пассати.

676. [дха. па. 277 дхаммападе] ‘‘саббе сан̇кха̄ра̄ аничча̄ти, йада̄ пан̃н̃а̄йа пассати;

атха ниббиндати дуккхе, еса магго висуддхийа̄.

677. [дха. па. 278 дхаммападе] ‘‘саббе сан̇кха̄ра̄ дуккха̄ти, йада̄ пан̃н̃а̄йа пассати

атха ниббиндати дуккхе, еса магго висуддхийа̄.

678. [дха. па. 279 дхаммападе] ‘‘саббе дхамма̄ анатта̄ти, йада̄ пан̃н̃а̄йа пассати;

атха ниббиндати дуккхе, еса магго висуддхийа̄.

679. ‘‘буддха̄нубуддхо йо тхеро, кон̣д̣ан̃н̃о тиббаниккамо;

пахӣнаджа̄тимаран̣о, брахмачарийасса кевалӣ.

680. ‘‘огхапа̄со дал̣хакхило [дал̣хо кхило (сйа̄. ка.)], паббато дуппада̄лайо;

чхетва̄ кхилан̃ча па̄сан̃ча, селам̣ бхетва̄на [чхетва̄на (ка.)] дуббхидам̣;

тин̣н̣о па̄ран̇гато джха̄йӣ, мутто со ма̄рабандхана̄.

681. ‘‘уддхато чапало бхиккху, митте а̄гамма па̄паке;

сам̣сӣдати махогхасмим̣, ӯмийа̄ пат̣икуджджито.

682. ‘‘ануддхато ачапало, нипако сам̣вутиндрийо;

калйа̄н̣амитто медха̄вӣ, дуккхассантакаро сийа̄.

683. ‘‘ка̄лапаббан̇гасан̇ка̄со, кисо дхаманисантхато;

маттан̃н̃ӯ аннапа̄насмим̣, адӣнаманасо наро.

684. ‘‘пхут̣т̣хо д̣ам̣сехи макасехи, аран̃н̃асмим̣ браха̄ване;

на̄го сан̇га̄масӣсева, сато татра̄дхива̄сайе.

685. ‘‘на̄бхинанда̄ми маран̣ам̣…пе… ниббисам̣ бхатако йатха̄.

686. ‘‘на̄бхинанда̄ми маран̣ам̣…пе… сампаджа̄но патиссато.

687. ‘‘паричин̣н̣о майа̄ саттха̄…пе… бхаванетти самӯхата̄.

688. ‘‘йасса чаттха̄йа паббаджито, ага̄расма̄нага̄рийам̣;

со ме аттхо ануппатто, ким̣ ме саддхивиха̄рина̄’’ти.

… ан̃н̃а̄сикон̣д̣ан̃н̃о [ан̃н̃а̄кон̣д̣ан̃н̃о (сӣ. сйа̄.)] тхеро….

2. уда̄йиттхерага̄тха̄

689. [а. ни. 6.43] ‘‘мануссабхӯтам̣ самбуддхам̣, аттадантам̣ сама̄хитам̣;

ирийама̄нам̣ брахмапатхе, читтассӯпасаме ратам̣.

690. ‘‘йам̣ манусса̄ намассанти, саббадхамма̄на па̄рагум̣;

дева̄пи там̣ намассанти, ити ме арахато сутам̣.

691. ‘‘саббасам̣йоджана̄тӣтам̣, вана̄ ниббанама̄гатам̣;

ка̄мехи неккхаммаратам̣ [никкхаммаратам̣ (ка.)], муттам̣ села̄ва кан̃чанам̣.

692. ‘‘са ве аччаручи на̄го, химава̄ван̃н̃е силуччайе;

саббесам̣ на̄гана̄ма̄нам̣, саччана̄мо ануттаро.

693. ‘‘на̄гам̣ во киттайисса̄ми, на хи а̄гум̣ кароти со;

сораччам̣ авихим̣са̄ ча, па̄да̄ на̄гасса те дуве.

694. ‘‘сати ча сампаджан̃н̃ан̃ча, чаран̣а̄ на̄гасса тепаре;

саддха̄хаттхо маха̄на̄го, упеккха̄сетадантава̄.

695. ‘‘сати гӣва̄ сиро пан̃н̃а̄, вӣмам̣са̄ дхаммачинтана̄;

дхаммакуччхисама̄ва̄со, вивеко тасса ва̄ладхи.

696. ‘‘со джха̄йӣ асса̄сарато, аджджхаттам̣ сусама̄хито;

гаччхам̣ сама̄хито на̄го, т̣хито на̄го сама̄хито.

697. ‘‘сайам̣ сама̄хито на̄го, нисиннопи сама̄хито;

саббаттха сам̣вуто на̄го, еса̄ на̄гасса сампада̄.

698. ‘‘бхун̃джати анаваджджа̄ни, са̄ваджджа̄ни на бхун̃джати;

гха̄самаччха̄данам̣ ладдха̄, саннидхим̣ париваджджайам̣.

699. ‘‘сам̣йоджанам̣ ан̣ум̣ тхӯлам̣, саббам̣ чхетва̄на бандханам̣;

йена йенева гаччхати, анапаккхова гаччхати.

700. ‘‘йатха̄пи удаке джа̄там̣, пун̣д̣арӣкам̣ павад̣д̣хати;

нопалиппати тойена, сучигандхам̣ манорамам̣.

701. ‘‘татхева ча локе джа̄то, буддхо локе вихарати;

нопалиппати локена, тойена падумам̣ йатха̄.

702. ‘‘маха̄гини паджджалито, ана̄ха̄ропасаммати;

ан̇га̄ресу ча сантесу, ниббутоти павуччати.

703. ‘‘аттхасса̄йам̣ вин̃н̃а̄панӣ, упама̄ вин̃н̃ӯхи десита̄;

вин̃н̃иссанти маха̄на̄га̄, на̄гам̣ на̄гена деситам̣.

704. ‘‘вӣтара̄го вӣтадосо, вӣтамохо ана̄саво;

сарӣрам̣ виджахам̣ на̄го, париниббиссатйана̄саво’’ти.

… уда̄йӣ тхеро….

сол̣асаканипа̄то нит̣т̣хито.