4. меттагӯма̄н̣авапуччха̄

1055. ‘‘пуччха̄ми там̣ бхагава̄ брӯхи ме там̣, (ичча̄йасма̄ меттагӯ)

ман̃н̃а̄ми там̣ ведагум̣ бха̄витаттам̣;

куто ну дуккха̄ самуда̄гата̄ име, йе кечи локасмиманекарӯпа̄’’.

1056. ‘‘дуккхасса ве мам̣ пабхавам̣ апуччхаси, (меттагӯти бхагава̄)

там̣ те паваккха̄ми йатха̄ паджа̄нам̣;

упадхинида̄на̄ пабхаванти дуккха̄, йе кечи локасмиманекарӯпа̄.

1057. ‘‘йо ве авидва̄ упадхим̣ кароти, пунаппунам̣ дуккхамупети мандо;

тасма̄ паджа̄нам̣ упадхим̣ на кайира̄, дуккхасса джа̄типпабхава̄нупассӣ’’.

1058. ‘‘йам̣ там̣ апуччхимха акиттайӣ но, ан̃н̃ам̣ там̣ пуччха̄ма [пуччха̄ми (сӣ. пӣ.)] тадин̇гха брӯхи;

катхам̣ ну дхӣра̄ витаранти огхам̣, джа̄тим̣ джарам̣ сокапариддаван̃ча;

там̣ ме муни са̄дху вийа̄карохи, татха̄ хи те видито еса дхаммо’’.

1059. ‘‘киттайисса̄ми те дхаммам̣, (меттагӯти бхагава̄)

дит̣т̣хе дхамме анӣтихам̣;

йам̣ видитва̄ сато чарам̣, таре локе висаттикам̣’’.

1060. ‘‘тан̃ча̄хам̣ абхинанда̄ми, махеси дхаммамуттамам̣;

йам̣ видитва̄ сато чарам̣, таре локе висаттикам̣’’.

1061. ‘‘йам̣ кин̃чи сампаджа̄на̄си, (меттагӯти бхагава̄)

уддхам̣ адхо тирийан̃ча̄пи маджджхе;

етесу нандин̃ча нивесанан̃ча, пануджджа вин̃н̃а̄н̣ам̣ бхаве на тит̣т̣хе.

1062. ‘‘евам̣виха̄рӣ сато аппаматто, бхиккху чарам̣ хитва̄ мама̄йита̄ни;

джа̄тим̣ джарам̣ сокапариддаван̃ча, идхева видва̄ паджахеййа дуккхам̣’’.

1063. ‘‘ета̄бхинанда̄ми вачо махесино, сукиттитам̣ готаманӯпадхӣкам̣;

аддха̄ хи бхагава̄ паха̄си дуккхам̣, татха̄ хи те видито еса дхаммо.

1064. ‘‘те ча̄пи нӯнаппаджахеййу дуккхам̣, йе твам̣ муни ат̣т̣хитам̣ овадеййа;

там̣ там̣ намасса̄ми самечча на̄га, аппева мам̣ бхагава̄ ат̣т̣хитам̣ овадеййа’’.

1065. ‘‘йам̣ бра̄хман̣ам̣ ведагума̄бхиджан̃н̃а̄, акин̃чанам̣ ка̄мабхаве асаттам̣;

аддха̄ хи со огхамимам̣ ата̄ри, тин̣н̣о ча па̄рам̣ акхило акан̇кхо.

1066. ‘‘видва̄ ча йо [со (сӣ. сйа̄. пӣ.)] ведагӯ наро идха, бхава̄бхаве сан̇гамимам̣ висаджджа;

со вӣтатан̣хо анӣгхо нира̄со, ата̄ри со джа̄тиджаранти брӯмӣ’’ти.

меттагӯма̄н̣авапуччха̄ чатуттхӣ нит̣т̣хита̄.