13. удайама̄н̣авапуччха̄

1111. ‘‘джха̄йим̣ вираджама̄сӣнам̣, (ичча̄йасма̄ удайо) катакиччам̣ ана̄савам̣;

па̄рагум̣ саббадхамма̄нам̣, аттхи пан̃хена а̄гамам̣;

ан̃н̃а̄вимоккхам̣ пабрӯхи, авиджджа̄йа пабхеданам̣’’.

1112. ‘‘паха̄нам̣ ка̄маччханда̄нам̣, (удайа̄ти бхагава̄) доманасса̄на чӯбхайам̣;

тхинасса ча панӯданам̣, куккучча̄нам̣ нива̄ран̣ам̣.

1113. ‘‘упеккха̄сатисам̣суддхам̣, дхамматаккапуреджавам̣;

ан̃н̃а̄вимоккхам̣ пабрӯми, авиджджа̄йа пабхеданам̣’’.

1114. ‘‘ким̣су сам̣йоджано локо, ким̣су тасса вича̄ран̣ам̣;

киссасса виппаха̄нена, нибба̄нам̣ ити вуччати’’.

1115. ‘‘нандисам̣йоджано локо, витаккасса вича̄ран̣ам̣;

тан̣ха̄йа виппаха̄нена, нибба̄нам̣ ити вуччати’’.

1116. ‘‘катхам̣ сатасса чарато, вин̃н̃а̄н̣ам̣ упаруджджхати;

бхагавантам̣ пут̣т̣хума̄гамма, там̣ сун̣ома вачо тава’’.

1117. ‘‘аджджхаттан̃ча бахиддха̄ ча, веданам̣ на̄бхинандато;

евам̣ сатасса чарато, вин̃н̃а̄н̣ам̣ упаруджджхатӣ’’ти.

удайама̄н̣авапуччха̄ терасама̄ нит̣т̣хита̄.