7. тиссаметтеййасуттам̣

820. ‘‘метхунамануйуттасса, (ичча̄йасма̄ тиссо меттеййо) вигха̄там̣ брӯхи ма̄риса;

сутва̄на тава са̄санам̣, вивеке сиккхисса̄масе.

821. ‘‘метхунамануйуттасса, (меттеййа̄ти бхагава̄) муссате ва̄пи са̄санам̣;

миччха̄ ча пат̣ипаджджати, етам̣ тасмим̣ ана̄рийам̣.

822. ‘‘еко пуббе чаритва̄на, метхунам̣ йо нисевати;

йа̄нам̣ бхантам̣ ва там̣ локе, хӣнама̄ху путхуджджанам̣.

823. ‘‘йасо китти ча йа̄ пуббе, ха̄йате ва̄пи тасса са̄;

етампи дисва̄ сиккхетха, метхунам̣ виппаха̄таве.

824. ‘‘сан̇каппехи парето со, капан̣о вийа джха̄йати;

сутва̄ паресам̣ ниггхосам̣, ман̇ку хоти татха̄видхо.

825. ‘‘атха саттха̄ни куруте, парава̄дехи чодито;

еса кхвасса маха̄гедхо, мосаваджджам̣ пага̄хати.

826. ‘‘пан̣д̣итоти саман̃н̃а̄то, екачарийам̣ адхит̣т̣хито;

атха̄пи [са ча̄пи (ниддесе)] метхуне йутто, мандова парикиссати [парикилиссати (сӣ.)].

827. ‘‘етама̄дӣнавам̣ н̃атва̄, муни пубба̄паре идха;

екачарийам̣ дал̣хам̣ кайира̄, на нисеветха метхунам̣.

828. ‘‘вивекан̃н̃ева сиккхетха, етадарийа̄намуттамам̣;

на тена сет̣т̣хо ман̃н̃етха, са ве нибба̄насантике.

829. ‘‘риттасса мунино чарато, ка̄месу анапеккхино;

огхатин̣н̣асса пихайанти, ка̄месу гадхита̄ [гатхита̄ (сӣ.)] паджа̄’’ти.

тиссаметтеййасуттам̣ саттамам̣ нит̣т̣хитам̣.