14. туват̣акасуттам̣

921. ‘‘пуччха̄ми там̣ а̄диччабандху [а̄диччабандхум̣ (сӣ. сйа̄.)], вивекам̣ сантипадан̃ча махеси;

катхам̣ дисва̄ нибба̄ти бхиккху, анупа̄дийа̄но локасмим̣ кин̃чи’’.

922. ‘‘мӯлам̣ папан̃часан̇кха̄йа, (ити бхагава̄)

манта̄ асмӣти саббамупарундхе [саббамупаруддхе (сйа̄. пӣ. ка.)];

йа̄ ка̄чи тан̣ха̄ аджджхаттам̣,

та̄сам̣ винайа̄ [винайа̄йа (?)] сада̄ сато сиккхе.

923. ‘‘йам̣ кин̃чи дхаммамабхиджан̃н̃а̄, аджджхаттам̣ атхава̄пи бахиддха̄;

на тена тха̄мам̣ [ма̄нам̣ (сӣ. ка.)] куббетха, на хи са̄ ниббути сатам̣ вутта̄.

924. ‘‘сеййо на тена ман̃н̃еййа, нӣчеййо атхава̄пи сариккхо;

пхут̣т̣хо [пут̣т̣хо (сӣ. сйа̄. ка.)] анекарӯпехи, на̄тума̄нам̣ викаппайам̣ тит̣т̣хе.

925. ‘‘аджджхаттамевупасаме, на ан̃н̃ато бхиккху сантимесеййа;

аджджхаттам̣ упасантасса, наттхи атта̄ куто ниратта̄ ва̄.

926. ‘‘маджджхе йатха̄ самуддасса, ӯми но джа̄йатӣ т̣хито хоти;

евам̣ т̣хито анеджасса, уссадам̣ бхиккху на кареййа кухин̃чи’’.

927. ‘‘акиттайӣ виват̣ачаккху, саккхидхаммам̣ париссайавинайам̣;

пат̣ипадам̣ вадехи бхадданте, па̄тимоккхам̣ атхава̄пи сама̄дхим̣’’.

928. ‘‘чаккхӯхи нева лоласса, га̄макатха̄йа а̄варайе сотам̣;

расе ча на̄нугиджджхеййа, на ча мама̄йетха кин̃чи локасмим̣.

929. ‘‘пхассена йада̄ пхут̣т̣хасса, паридевам̣ бхиккху на кареййа кухин̃чи;

бхаван̃ча на̄бхиджаппеййа, бхеравесу ча на сампаведхеййа.

930. ‘‘анна̄наматхо па̄на̄нам̣, кха̄данӣйа̄нам̣ атхопи ваттха̄нам̣;

ладдха̄ на саннидхим̣ кайира̄, на ча париттасе та̄ни алабхама̄но.

931. ‘‘джха̄йӣ на па̄далоласса, вираме куккучча̄ наппамаджджеййа;

атха̄санесу сайанесу, аппасаддесу бхиккху вихареййа.

932. ‘‘ниддам̣ на бахулӣкареййа, джа̄гарийам̣ бхаджеййа а̄та̄пӣ;

тандим̣ ма̄йам̣ хассам̣ кхид̣д̣ам̣, метхунам̣ виппаджахе савибхӯсам̣.

933. ‘‘а̄тхаббан̣ам̣ супинам̣ лаккхан̣ам̣, но видахе атхопи наккхаттам̣;

вирутан̃ча габбхакаран̣ам̣, тикиччхам̣ ма̄мако на севеййа.

934. ‘‘нинда̄йа наппаведхеййа, на ун̣н̣амеййа пасам̣сито бхиккху;

лобхам̣ саха маччхарийена, кодхам̣ песун̣ийан̃ча панудеййа.

935. ‘‘кайавиккайе на тит̣т̣хеййа, упава̄дам̣ бхиккху на кареййа кухин̃чи;

га̄ме ча на̄бхисаджджеййа, ла̄бхакамйа̄ джанам̣ на лапайеййа.

936. ‘‘на ча каттхита̄ сийа̄ бхиккху, на ча ва̄чам̣ пайуттам̣ бха̄сеййа;

па̄габбхийам̣ на сиккхеййа, катхам̣ вигга̄хикам̣ на катхайеййа.

937. ‘‘мосавадждже на нӣйетха, сампаджа̄но сат̣ха̄ни на кайира̄;

атха джӣвитена пан̃н̃а̄йа, сӣлаббатена на̄н̃н̃аматиман̃н̃е.

938. ‘‘сутва̄ русито бахум̣ ва̄чам̣, саман̣а̄нам̣ ва̄ путхуджана̄нам̣ [путхувачана̄нам̣ (сӣ. сйа̄. пӣ.)];

пхарусена не на пат̣иваджджа̄, на хи санто пат̣исеникаронти.

939. ‘‘етан̃ча дхаммаман̃н̃а̄йа, вичинам̣ бхиккху сада̄ сато сиккхе;

сантӣти ниббутим̣ н̃атва̄, са̄сане готамасса на памаджджеййа.

940. ‘‘абхибхӯ хи со анабхибхӯто, саккхидхаммаманӣтихамадассӣ;

тасма̄ хи тасса бхагавато са̄сане, аппаматто сада̄ намассаманусиккхе’’ти.

туват̣акасуттам̣ чуддасамам̣ нит̣т̣хитам̣.