9. ким̣сӣласуттам̣

326. ‘‘ким̣сӣло ким̣сама̄ча̄ро, ка̄ни камма̄ни брӯхайам̣;

наро самма̄ нивит̣т̣хасса, уттаматтхан̃ча па̄пун̣е’’.

327. ‘‘вуд̣д̣ха̄пача̄йӣ анусӯйако сийа̄, ка̄лан̃н̃ӯ [ка̄лан̃н̃у (сӣ. сйа̄.)] часса гарӯнам̣ [гарӯнам̣ (сӣ.)] дассана̄йа;

дхаммим̣ катхам̣ ерайитам̣ кхан̣ан̃н̃ӯ, сун̣еййа саккачча субха̄сита̄ни.

328. ‘‘ка̄лена гаччхе гарӯнам̣ сака̄сам̣, тхамбхам̣ нирам̣катва̄ [нира̄катва̄ (?) ни + а̄ + кара + тва̄] нива̄тавутти;

аттхам̣ дхаммам̣ сам̣йамам̣ брахмачарийам̣, ануссаре чева сама̄чаре ча.

329. ‘‘дхамма̄ра̄мо дхаммарато, дхамме т̣хито дхаммавиниччхайан̃н̃ӯ;

нева̄чаре дхаммасандосава̄дам̣, таччхехи нӣйетха субха̄ситехи.

330. ‘‘хассам̣ джаппам̣ паридевам̣ падосам̣, ма̄йа̄катам̣ куханам̣ гиддхи ма̄нам̣;

са̄рамбхам̣ каккасам̣ каса̄ван̃ча муччхам̣ [са̄рамбха каккасса каса̄ва муччхам̣ (сйа̄. пӣ.)], хитва̄ чаре вӣтамадо т̣хитатто.

331. ‘‘вин̃н̃а̄таса̄ра̄ни субха̄сита̄ни, сутан̃ча вин̃н̃а̄тасама̄дхиса̄рам̣;

на тасса пан̃н̃а̄ ча сутан̃ча вад̣д̣хати, йо са̄хасо хоти наро паматто.

332. ‘‘дхамме ча йе арийапаведите рата̄,

ануттара̄ те вачаса̄ манаса̄ каммуна̄ ча;

те сантисораччасама̄дхисан̣т̣хита̄,

сутасса пан̃н̃а̄йа ча са̄рамаджджхагӯ’’ти.

ким̣сӣласуттам̣ навамам̣ нит̣т̣хитам̣.