5. чундасуттам̣

83. ‘‘пуччха̄ми муним̣ пахӯтапан̃н̃ам̣, (ити чундо камма̄рапутто)

буддхам̣ дхаммасса̄мим̣ вӣтатан̣хам̣;

двипадуттамам̣ [дипадуттамам̣ (сӣ. сйа̄. кам̣. пӣ.)] са̄ратхӣнам̣ паварам̣, кати локе саман̣а̄ тадин̇гха брӯхи’’.

84. ‘‘чатуро саман̣а̄ на пан̃чаматтхи, (чунда̄ти бхагава̄)

те те а̄викароми саккхипут̣т̣хо;

маггаджино маггадесако ча, магге джӣвати йо ча маггадӯсӣ’’.

85. ‘‘кам̣ маггаджинам̣ ваданти буддха̄, (ити чундо камма̄рапутто)

маггаккха̄йӣ катхам̣ атулйо хоти;

магге джӣвати ме брӯхи пут̣т̣хо, атха ме а̄викарохи маггадӯсим̣’’ [маггадӯсӣ (ка.)].

86. ‘‘йо тин̣н̣акатхам̣катхо висалло, нибба̄на̄бхирато ана̄нугиддхо;

локасса садевакасса нета̄, та̄дим̣ маггаджинам̣ ваданти буддха̄.

87. ‘‘парамам̣ параманти йодха н̃атва̄, аккха̄ти вибхаджате идхева дхаммам̣;

там̣ кан̇кхачхидам̣ муним̣ анеджам̣, дутийам̣ бхиккхунама̄ху маггадесим̣.

88. ‘‘йо дхаммападе судесите, магге джӣвати сан̃н̃ато сатӣма̄;

анаваджджапада̄ни севама̄но, татийам̣ бхиккхунама̄ху маггаджӣвим̣.

89. ‘‘чхаданам̣ катва̄на суббата̄нам̣, паккхандӣ куладӯсако пагаббхо;

ма̄йа̄вӣ асан̃н̃ато пала̄по, патирӯпена чарам̣ са маггадӯсӣ.

90. ‘‘ете ча пат̣ивиджджхи йо гахат̣т̣хо, сутава̄ арийаса̄вако сапан̃н̃о;

саббе нета̄диса̄ти [саббе не та̄диса̄ти (сӣ. сйа̄. пӣ.)] н̃атва̄, ити дисва̄ на ха̄пети тасса саддха̄;

катхам̣ хи дут̣т̣хена асампадут̣т̣хам̣, суддхам̣ асуддхена самам̣ кареййа̄’’ти.

чундасуттам̣ пан̃чамам̣ нит̣т̣хитам̣.