6. пара̄бхавасуттам̣

евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. атха кхо ан̃н̃атара̄ девата̄ абхикканта̄йа раттийа̄ абхиккантаван̣н̣а̄ кевалакаппам̣ джетаванам̣ обха̄сетва̄ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ ат̣т̣ха̄си. екамантам̣ т̣хита̄ кхо са̄ девата̄ бхагавантам̣ га̄тха̄йа аджджхабха̄си –

91. ‘‘пара̄бхавантам̣ пурисам̣, майам̣ пуччха̄ма готама [готамам̣ (сӣ. сйа̄.)];

бхагавантам̣ [бхавантам̣ (сйа̄. ка.)] пут̣т̣хума̄гамма, ким̣ пара̄бхавато мукхам̣’’.

92. ‘‘сувиджа̄но бхавам̣ хоти, сувиджа̄но [дувиджа̄но (сйа̄. ка.)] пара̄бхаво;

дхаммака̄мо бхавам̣ хоти, дхаммадессӣ пара̄бхаво’’.

93. ‘‘ити хетам̣ виджа̄на̄ма, пат̣хамо со пара̄бхаво;

дутийам̣ бхагава̄ брӯхи, ким̣ пара̄бхавато мукхам̣’’.

94. ‘‘асантасса пийа̄ хонти, санте на куруте пийам̣;

асатам̣ дхаммам̣ рочети, там̣ пара̄бхавато мукхам̣’’.

95. ‘‘ити хетам̣ виджа̄на̄ма, дутийо со пара̄бхаво;

татийам̣ бхагава̄ брӯхи, ким̣ пара̄бхавато мукхам̣’’.

96. ‘‘нидда̄сӣлӣ сабха̄сӣлӣ, анут̣т̣ха̄та̄ ча йо наро;

аласо кодхапан̃н̃а̄н̣о, там̣ пара̄бхавато мукхам̣’’.

97. ‘‘ити хетам̣ виджа̄на̄ма, татийо со пара̄бхаво;

чатуттхам̣ бхагава̄ брӯхи, ким̣ пара̄бхавато мукхам̣’’.

98. ‘‘йо ма̄тарам̣ [йо ма̄тарам̣ ва̄ (сӣ. сйа̄. кам̣. пӣ.)] питарам̣ ва̄, джин̣н̣акам̣ гатайоббанам̣;

паху санто на бхарати, там̣ пара̄бхавато мукхам̣’’.

99. ‘‘ити хетам̣ виджа̄на̄ма, чатуттхо со пара̄бхаво;

пан̃чамам̣ бхагава̄ брӯхи, ким̣ пара̄бхавато мукхам̣’’.

100. ‘‘йо бра̄хман̣ам̣ [йо бра̄хман̣ам̣ ва̄ (сӣ. сйа̄. кам̣. пӣ.)] саман̣ам̣ ва̄, ан̃н̃ам̣ ва̄пи ваниббакам̣;

муса̄ва̄дена ван̃чети, там̣ пара̄бхавато мукхам̣’’.

101. ‘‘ити хетам̣ виджа̄на̄ма, пан̃чамо со пара̄бхаво;

чхат̣т̣хамам̣ бхагава̄ брӯхи, ким̣ пара̄бхавато мукхам̣’’.

102. ‘‘пахӯтавитто пурисо, сахиран̃н̃о сабходжано;

еко бхун̃джати са̄дӯни, там̣ пара̄бхавато мукхам̣’’.

103. ‘‘ити хетам̣ виджа̄на̄ма, чхат̣т̣хамо со пара̄бхаво;

саттамам̣ бхагава̄ брӯхи, ким̣ пара̄бхавато мукхам̣’’.

104. ‘‘джа̄титтхаддхо дханаттхаддхо, готтаттхаддхо ча йо наро;

сан̃н̃а̄тим̣ атиман̃н̃ети, там̣ пара̄бхавато мукхам̣’’.

105. ‘‘ити хетам̣ виджа̄на̄ма, саттамо со пара̄бхаво;

ат̣т̣хамам̣ бхагава̄ брӯхи, ким̣ пара̄бхавато мукхам̣’’.

106. ‘‘иттхидхутто сура̄дхутто, аккхадхутто ча йо наро;

ладдхам̣ ладдхам̣ вина̄сети, там̣ пара̄бхавато мукхам̣’’.

107. ‘‘ити хетам̣ виджа̄на̄ма, ат̣т̣хамо со пара̄бхаво;

навамам̣ бхагава̄ брӯхи, ким̣ пара̄бхавато мукхам̣’’.

108. ‘‘сехи да̄рехи асантут̣т̣хо [да̄рехйасантут̣т̣хо (ка.)], весийа̄су падуссати [падиссати (сӣ.)];

дуссати [диссати (сӣ. пӣ.)] парада̄ресу, там̣ пара̄бхавато мукхам̣’’.

109. ‘‘ити хетам̣ виджа̄на̄ма, навамо со пара̄бхаво;

дасамам̣ бхагава̄ брӯхи, ким̣ пара̄бхавато мукхам̣’’.

110. ‘‘атӣтайоббано посо, а̄нети тимбаруттханим̣;

тасса̄ исса̄ на супати, там̣ пара̄бхавато мукхам̣’’.

111. ‘‘ити хетам̣ виджа̄на̄ма, дасамо со пара̄бхаво;

ека̄дасамам̣ бхагава̄ брӯхи, ким̣ пара̄бхавато мукхам̣’’.

112. ‘‘иттхим̣ сон̣д̣им̣ викиран̣им̣, пурисам̣ ва̄пи та̄дисам̣;

иссарийасмим̣ т̣хапети [т̣ха̄пети (сӣ. пӣ.), тхапети (ка.)], там̣ пара̄бхавато мукхам̣’’.

113. ‘‘ити хетам̣ виджа̄на̄ма, ека̄дасамо со пара̄бхаво;

два̄дасамам̣ бхагава̄ брӯхи, ким̣ пара̄бхавато мукхам̣’’.

114. ‘‘аппабхого маха̄тан̣хо, кхаттийе джа̄йате куле;

со ча раджджам̣ паттхайати, там̣ пара̄бхавато мукхам̣’’.

115. ‘‘ете пара̄бхаве локе, пан̣д̣ито самавеккхийа;

арийо дассанасампанно, са локам̣ бхаджате сива’’нти.

пара̄бхавасуттам̣ чхат̣т̣хам̣ нит̣т̣хитам̣.