4. касибха̄радва̄джасуттам̣

евам̣ ме сутам̣ – екам̣ самайам̣ бхагава̄ магадхесу вихарати даккхин̣а̄гирисмим̣ [даккхин̣агирисмим̣ (ка.)] екана̄л̣а̄йам̣ бра̄хман̣ага̄ме. тена кхо пана самайена касибха̄радва̄джасса бра̄хман̣асса пан̃чаматта̄ни нан̇галасата̄ни пайутта̄ни хонти ваппака̄ле. атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа йена касибха̄радва̄джасса бра̄хман̣асса камманто тенупасан̇ками. тена кхо пана самайена касибха̄радва̄джасса бра̄хман̣асса паривесана̄ ваттати. атха кхо бхагава̄ йена паривесана̄ тенупасан̇ками; упасан̇камитва̄ екамантам̣ ат̣т̣ха̄си.

аддаса̄ кхо касибха̄радва̄джо бра̄хман̣о бхагавантам̣ пин̣д̣а̄йа т̣хитам̣. дисва̄на бхагавантам̣ етадавоча – ‘‘ахам̣ кхо, саман̣а, каса̄ми ча вапа̄ми ча; каситва̄ ча вапитва̄ ча бхун̃джа̄ми. твампи, саман̣а, касассу ча вапассу ча; каситва̄ ча вапитва̄ ча бхун̃джассӯ’’ти.

‘‘ахампи кхо, бра̄хман̣а, каса̄ми ча вапа̄ми ча; каситва̄ ча вапитва̄ ча бхун̃джа̄мӣ’’ти. ‘‘на кхо пана майам̣ [на кхо пана саман̣а (сйа̄.)] пасса̄ма бхото готамасса йугам̣ ва̄ нан̇галам̣ ва̄ пха̄лам̣ ва̄ па̄чанам̣ ва̄ балибадде [баливадде (сӣ. пӣ.), балӣбадде (?)] ва̄. атха ча пана бхавам̣ готамо евама̄ха – ‘ахампи кхо, бра̄хман̣а, каса̄ми ча вапа̄ми ча; каситва̄ ча вапитва̄ ча бхун̃джа̄мӣ’’’ти.

атха кхо касибха̄радва̄джо бра̄хман̣о бхагавантам̣ га̄тха̄йа аджджхабха̄си –

76. ‘‘кассако пат̣иджа̄на̄си, на ча пасса̄ма те касим̣;

касим̣ но пуччхито брӯхи, йатха̄ джа̄нему те касим̣’’.

77. ‘‘саддха̄ бӣджам̣ тапо вут̣т̣хи, пан̃н̃а̄ ме йуганан̇галам̣;

хирӣ ӣса̄ мано йоттам̣, сати ме пха̄лапа̄чанам̣.

78. ‘‘ка̄йагутто вачӣгутто, а̄ха̄ре ударе йато;

саччам̣ кароми нидда̄нам̣, сораччам̣ ме памочанам̣.

79. ‘‘вӣрийам̣ ме дхурадхорайхам̣, йогаккхема̄дхива̄ханам̣;

гаччхати аниваттантам̣, йаттха гантва̄ на сочати.

80. ‘‘евамеса̄ касӣ кат̣т̣ха̄, са̄ хоти аматаппхала̄;

етам̣ касим̣ каситва̄на, саббадуккха̄ памуччатӣ’’ти.

атха кхо касибха̄радва̄джо бра̄хман̣о махатийа̄ кам̣сапа̄тийа̄ па̄йасам̣ [па̄йа̄сам̣ (саббаттха)] вад̣д̣хетва̄ бхагавато упана̄меси – ‘‘бхун̃джату бхавам̣ готамо па̄йасам̣. кассако бхавам̣; йам̣ хи бхавам̣ готамо аматаппхалам̣ [аматаппхалампи (сам̣. ни. 1.197)] касим̣ касатӣ’’ти.

81. ‘‘га̄тха̄бхигӣтам̣ ме абходжанеййам̣, сампассатам̣ бра̄хман̣а неса дхаммо;

га̄тха̄бхигӣтам̣ пануданти буддха̄, дхамме сатӣ бра̄хман̣а вуттиреса̄.

82. ‘‘ан̃н̃ена ча кевалинам̣ махесим̣, кхӣн̣а̄савам̣ куккуччавӯпасантам̣;

аннена па̄нена упат̣т̣хахассу, кхеттам̣ хи там̣ пун̃н̃апеккхасса хотӣ’’ти.

‘‘атха касса ча̄хам̣, бхо готама, имам̣ па̄йасам̣ даммӣ’’ти? ‘‘на кхва̄хам̣ там̣, бра̄хман̣а, пасса̄ми садеваке локе сама̄раке сабрахмаке сассаман̣абра̄хман̣ийа̄ паджа̄йа садеваманусса̄йа, йасса со па̄йасо бхутто самма̄ парин̣а̄мам̣ гаччхеййа, ан̃н̃атра татха̄гатасса ва̄ татха̄гатаса̄вакасса ва̄. тена хи твам̣, бра̄хман̣а, там̣ па̄йасам̣ аппахарите ва̄ чхад̣д̣ехи аппа̄н̣аке ва̄ удаке опила̄пехӣ’’ти.

атха кхо касибха̄радва̄джо бра̄хман̣о там̣ па̄йасам̣ аппа̄н̣аке удаке опила̄песи. атха кхо со па̄йасо удаке паккхитто чиччит̣а̄йати чит̣ичит̣а̄йати сандхӯпа̄йати сампадхӯпа̄йати [сандхӯма̄йати сампадхӯма̄йати (сйа̄.)]. сеййатха̄пи на̄ма пха̄ло дивасам̣ сантатто [дивасасантатто (сӣ. сйа̄. кам̣. пӣ.)] удаке паккхитто чиччит̣а̄йати чит̣ичит̣а̄йати сандхӯпа̄йати сампадхӯпа̄йати; евамева со па̄йасо удаке паккхитто чиччит̣а̄йати чит̣ичит̣а̄йати сандхӯпа̄йати сампадхӯпа̄йати.

атха кхо касибха̄радва̄джо бра̄хман̣о сам̣вигго ломахат̣т̣хаджа̄то йена бхагава̄ тенупасан̇ками; упасан̇камитва̄ бхагавато па̄десу сираса̄ нипатитва̄ бхагавантам̣ етадавоча – ‘‘абхиккантам̣, бхо готама, абхиккантам̣, бхо готама! сеййатха̄пи, бхо готама, никкуджджитам̣ ва̄ уккуджджеййа, пат̣иччханнам̣ ва̄ вивареййа, мӯл̣хасса ва̄ маггам̣ а̄чиккхеййа, андхака̄ре ва̄ телападжджотам̣ дха̄реййа, чаккхуманто рӯпа̄ни даккхантӣти [даккхинтӣти (сӣ. сйа̄. кам̣. пӣ.)]; евамевам̣ бхота̄ готамена анекапарийа̄йена дхаммо пака̄сито. еса̄хам̣ бхавантам̣ готамам̣ саран̣ам̣ гаччха̄ми дхамман̃ча бхиккхусан̇гхан̃ча, лабхеййа̄хам̣ бхото готамасса сантике паббаджджам̣, лабхеййам̣ упасампада’’нти.

алаттха кхо касибха̄радва̄джо бра̄хман̣о бхагавато сантике паббаджджам̣, алаттха упасампадам̣. ачирӯпасампанно кхо пана̄йасма̄ бха̄радва̄джо еко вӯпакат̣т̣хо аппаматто а̄та̄пӣ пахитатто вихаранто начирассева – йассаттха̄йа кулапутта̄ саммадева ага̄расма̄ анага̄рийам̣ паббаджанти, тадануттарам̣ – брахмачарийапарийоса̄нам̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа виха̄си. ‘‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’’ти аббхан̃н̃а̄си. ан̃н̃атаро ча [ан̃н̃атаро ча кхо (сӣ. пӣ.), ан̃н̃атаро кхо (сйа̄. кам̣. ка.)] пана̄йасма̄ бха̄радва̄джо арахатам̣ ахосӣти.

касибха̄радва̄джасуттам̣ чатуттхам̣ нит̣т̣хитам̣.