12. мунисуттам̣

209. сантхава̄то [сандхавато (ка.)] бхайам̣ джа̄там̣, никета̄ джа̄йате раджо;

аникетамасантхавам̣, етам̣ ве мунидассанам̣.

210. йо джа̄тамуччхиджджа на ропайеййа, джа̄йантамасса на̄нуппавеччхе;

тама̄ху екам̣ мунинам̣ чарантам̣, аддаккхи со сантипадам̣ махеси.

211. сан̇кха̄йа ваттхӯни пама̄йа [паха̄йа (ка. сӣ. ка.), сама̄йа (ка.) па + мӣ + тва̄ = пама̄йа, йатха̄ нисса̄йа̄типадам̣] бӣджам̣, синехамасса на̄нуппавеччхе;

са ве мунӣ джа̄тикхайантадассӣ, таккам̣ паха̄йа на упети сан̇кхам̣.

212. ан̃н̃а̄йа сабба̄ни нивесана̄ни, аника̄майам̣ ан̃н̃атарампи тесам̣;

са ве мунӣ вӣтагедхо агиддхо, на̄йӯхатӣ па̄рагато хи хоти.

213. сабба̄бхибхум̣ саббавидум̣ сумедхам̣, саббесу дхаммесу анӯпалиттам̣;

саббан̃джахам̣ тан̣хаккхайе вимуттам̣, там̣ ва̄пи дхӣра̄ муни [муним̣ (сӣ. пӣ.)] ведайанти.

214. пан̃н̃а̄балам̣ сӣлаватӯпапаннам̣, сама̄хитам̣ джха̄наратам̣ сатӣмам̣;

сан̇га̄ памуттам̣ акхилам̣ ана̄савам̣, там̣ ва̄пи дхӣра̄ муни ведайанти.

215. екам̣ чарантам̣ мунимаппаматтам̣, нинда̄пасам̣са̄су аведхама̄нам̣;

сӣхам̣ва саддесу асантасантам̣, ва̄там̣ва джа̄ламхи асаджджама̄нам̣;

падмам̣ва [падумам̣ва (сӣ. сйа̄. пӣ.)] тойена алиппама̄нам̣ [алимпама̄нам̣ (сйа̄. ка.)], нета̄раман̃н̃есаманан̃н̃анеййам̣;

там̣ ва̄пи дхӣра̄ муни ведайанти.

216. йо огахан̣е тхамбхорива̄бхиджа̄йати, йасмим̣ паре ва̄ча̄парийантам̣ [ва̄чам̣ парийантам̣ (ка.)] ваданти;

там̣ вӣтара̄гам̣ сусама̄хитиндрийам̣, там̣ ва̄пи дхӣра̄ муни ведайанти.

217. йо ве т̣хитатто тасарам̣ва уджджу, джигуччхати каммехи па̄пакехи;

вӣмам̣сама̄но висамам̣ саман̃ча, там̣ ва̄пи дхӣра̄ муни ведайанти.

218. йо сан̃н̃ататто на кароти па̄пам̣, дахаро маджджхимо ча муни [дахаро ча маджджхо ча мунӣ (сӣ. сйа̄. кам̣. пӣ.)] йататто;

аросанеййо на со росети кан̃чи [на росети (сйа̄.)], там̣ ва̄пи дхӣра̄ муни ведайанти.

219. йадаггато маджджхато сесато ва̄, пин̣д̣ам̣ лабхетха парадаттӯпаджӣвӣ;

на̄лам̣ тхутум̣ нопи нипаччава̄дӣ, там̣ ва̄пи дхӣра̄ муни ведайанти.

220. муним̣ чарантам̣ виратам̣ метхунасма̄, йо йоббане нопанибаджджхате квачи;

мадаппама̄да̄ виратам̣ виппамуттам̣, там̣ ва̄пи дхӣра̄ муни ведайанти.

221. ан̃н̃а̄йа локам̣ параматтхадассим̣, огхам̣ самуддам̣ атитарийа та̄дим̣;

там̣ чхиннагантхам̣ аситам̣ ана̄савам̣, там̣ ва̄пи дхӣра̄ муни ведайанти.

222. асама̄ убхо дӯравиха̄равуттино, гихӣ [гихи (ка.)] да̄рапосӣ амамо ча суббато;

парапа̄н̣ародха̄йа гихӣ асан̃н̃ато, ниччам̣ мунӣ раккхати па̄н̣ине [па̄н̣ино (сӣ.)] йато.

223. сикхӣ йатха̄ нӣлагӣво [нӣлагиво (сйа̄.)] вихан̇гамо, хам̣сасса нопети джавам̣ куда̄чанам̣;

евам̣ гихӣ на̄нукароти бхиккхуно, мунино вивиттасса ванамхи джха̄йатоти.

мунисуттам̣ два̄дасамам̣ нит̣т̣хитам̣.

урагавагго пат̣хамо нит̣т̣хито.