16. сат̣т̣хикӯт̣апетаваттху

806. ‘‘ким̣ ну умматтарӯпова, миго бхантова дха̄васи;

ниссам̣сайам̣ па̄пакамманто [па̄пакаммам̣ (сйа̄. пӣ.)], ким̣ ну садда̄йасе тува’’нти.

807. ‘‘ахам̣ бхаданте петомхи, дуггато йамалокико;

па̄пакаммам̣ каритва̄на, петалокам̣ ито гато.

808. ‘‘сат̣т̣хи кӯт̣асахасса̄ни, парипун̣н̣а̄ни саббасо;

сӣсе майхам̣ нипатанти, те бхинданти ча маттхака’’нти.

809. ‘‘ким̣ ну ка̄йена ва̄ча̄йа, манаса̄ дуккат̣ам̣ катам̣;

кисса каммавипа̄кена, идам̣ дуккхам̣ нигаччхаси.

810. ‘‘сат̣т̣хи кӯт̣асахасса̄ни, парипун̣н̣а̄ни саббасо;

сӣсе туйхам̣ нипатанти, те бхинданти ча маттхака’’нти.

811. ‘‘атхаддаса̄сим̣ самбуддхам̣, сунеттам̣ бха̄витиндрийам̣;

нисиннам̣ руккхамӯласмим̣, джха̄йантам̣ акутобхайам̣.

812. ‘‘са̄литтакаппаха̄рена, бхиндиссам̣ тасса маттхакам̣;

тасса каммавипа̄кена, идам̣ дуккхам̣ нигаччхисам̣.

813. ‘‘сат̣т̣хи кӯт̣асахасса̄ни, парипун̣н̣а̄ни саббасо;

сӣсе майхам̣ нипатанти, те бхинданти ча [нипатанти, во бхиндантева (сӣ. дхаммападат̣т̣хакатха̄)] маттхака’’нти.

814. ‘‘дхаммена те ка̄пуриса, сат̣т̣хикӯт̣асахасса̄ни, парипун̣н̣а̄ни саббасо;

сӣсе туйхам̣ нипатанти, те бхинданти ча маттхака’’нти.

сат̣т̣хикӯт̣апетаваттху сол̣асамам̣.

маха̄вагго чатуттхо нит̣т̣хито.