5. мат̣т̣хакун̣д̣алӣпетаваттху

186. [ви. ва. 1207] ‘‘алан̇като мат̣т̣хакун̣д̣алӣ, ма̄ладха̄рӣ харичандануссадо;

ба̄ха̄ паггайха кандаси, ванамаджджхе ким̣ дуккхито тува’’нти.

187. ‘‘сован̣н̣амайо пабхассаро, уппанно ратхапан̃джаро мама;

тасса чаккайугам̣ на винда̄ми, тена дуккхена джаха̄ми джӣвита’’нти.

188. ‘‘сован̣н̣амайам̣ ман̣имайам̣, лохитакамайам̣ [лохитан̇гамайам̣ (сйа̄.), лохитан̇камайам̣ (сӣ.), лохамайам̣ (каттхачи)] атха рӯпийамайам̣;

а̄чиккха ме бхаддама̄н̣ава, чаккайугам̣ пат̣ипа̄дайа̄ми те’’ти.

189. со ма̄н̣аво тасса па̄вади, ‘‘чандасӯрийа̄ убхайеттха диссаре;

сован̣н̣амайо ратхо мама, тена чаккайугена собхатӣ’’ти.

190. ‘‘ба̄ло кхо твам̣ аси ма̄н̣ава, йо твам̣ паттхайасе апаттхийам̣;

ман̃н̃а̄ми тувам̣ мариссаси, на хи твам̣ лаччхаси чандасӯрийе’’ти.

191. ‘‘гамана̄гаманампи диссати, ван̣н̣адха̄ту убхайаттха вӣтхийа̄;

пето ка̄лакато на диссати, ко нидха кандатам̣ ба̄лйатаро’’ти.

192. ‘‘саччам̣ кхо вадеси ма̄н̣ава, ахамева кандатам̣ ба̄лйатаро;

чандам̣ вийа да̄рако рудам̣, петам̣ ка̄лаката̄бхипаттхайи’’нти.

193. ‘‘а̄диттам̣ вата мам̣ сантам̣, гхатаситтам̣ва па̄вакам̣;

ва̄рина̄ вийа осин̃чам̣, саббам̣ нибба̄пайе дарам̣.

194. ‘‘аббахӣ [аббӯл̣хам̣ (сйа̄. ка.)] вата ме саллам̣, сокам̣ хадайанисситам̣;

йо ме сокапаретасса, путтасокам̣ апа̄нуди.

195. ‘‘сва̄хам̣ аббӯл̣хасаллосми, сӣтибхӯтосми ниббуто;

на соча̄ми на рода̄ми, тава сутва̄на ма̄н̣ава̄’’ти.

196. ‘‘девата̄ нуси гандхаббо, аду сакко пуриндадо;

ко ва̄ твам̣ касса ва̄ путто, катхам̣ джа̄нему там̣ майа’’нти.

197. ‘‘йан̃ча кандаси йан̃ча родаси, путтам̣ а̄л̣а̄хане сайам̣ дахитва̄;

сва̄хам̣ кусалам̣ каритва̄ каммам̣, тидаса̄нам̣ сахабйатам̣ гато’’ти.

198. ‘‘аппам̣ ва̄ бахум̣ ва̄ на̄ддаса̄ма, да̄нам̣ дадантасса саке ага̄ре;

упосатхакаммам̣ ва̄ та̄дисам̣, кена каммена гатоси девалока’’нти.

199. ‘‘а̄ба̄дхикохам̣ дуккхито гила̄но, а̄турарӯпомхи саке нивесане;

буддхам̣ вигатараджам̣ витин̣н̣акан̇кхам̣, аддаккхим̣ сугатам̣ аномапан̃н̃ам̣.

200. ‘‘сва̄хам̣ мудитамано пасанначитто, ан̃джалим̣ акарим̣ татха̄гатасса;

та̄хам̣ кусалам̣ каритва̄на каммам̣, тидаса̄нам̣ сахабйатам̣ гато’’ти.

201. ‘‘аччхарийам̣ вата аббхутам̣ вата, ан̃джаликаммасса айамӣдисо випа̄ко;

ахампи мудитамано пасанначитто, аджджева буддхам̣ саран̣ам̣ ваджа̄мӣ’’ти.

202. ‘‘аджджева буддхам̣ саран̣ам̣ ваджа̄хи, дхамман̃ча сан̇гхан̃ча пасанначитто;

татхева сиккха̄йа пада̄ни пан̃ча, акхан̣д̣апхулла̄ни сама̄дийассу.

203. ‘‘па̄н̣а̄типа̄та̄ вирамассу кхиппам̣, локе адиннам̣ париваджджайассу;

амаджджапо ма̄ ча муса̄ бхан̣а̄хи, сакена да̄рена ча хохи тут̣т̣хо’’ти.

204. ‘‘аттхака̄моси ме йаккха, хитака̄моси девате;

кароми туйхам̣ вачанам̣, твам̣си а̄чарийо мама̄ти.

205. ‘‘упеми саран̣ам̣ буддхам̣, дхамман̃ча̄пи ануттарам̣;

сан̇гхан̃ча нарадевасса, гаччха̄ми саран̣ам̣ ахам̣.

206. ‘‘па̄н̣а̄типа̄та̄ вирама̄ми кхиппам̣, локе адиннам̣ париваджджайа̄ми;

амаджджапо но ча муса̄ бхан̣а̄ми; сакена да̄рена ча хоми тут̣т̣хо’’ти.

мат̣т̣хакун̣д̣алӣпетаваттху пан̃чамам̣.