2. са̄рипуттаттхерама̄тупетиваттху

116. ‘‘нагга̄ дуббан̣н̣арӯпа̄си, киса̄ дхаманисантхата̄;

уппха̄сулике кисике, ка̄ ну твам̣ идха тит̣т̣хаси’’.

117. ‘‘ахам̣ те сакийа̄ ма̄та̄, пуббе ан̃н̃а̄су джа̄тӣсу;

упапанна̄ петтивисайам̣, кхуппипа̄сасамаппита̄.

118. ‘‘чхад̣д̣итам̣ кхипитам̣ кхел̣ам̣, син̇гха̄н̣икам̣ силесумам̣;

васан̃ча д̣айхама̄на̄нам̣, виджа̄та̄нан̃ча лохитам̣.

119. ‘‘ван̣ика̄нан̃ча йам̣ гха̄на-сӣсаччхинна̄на лохитам̣;

кхуда̄парета̄ бхун̃джа̄ми, иттхипурисанисситам̣.

120. ‘‘пуббалохитам̣ бхаккха̄ми [пуббалохитабхаккха̄сми (сӣ.)], пасӯнам̣ ма̄нуса̄на ча;

ален̣а̄ анага̄ра̄ ча, нӣламан̃чапара̄йан̣а̄.

121. ‘‘дехи путтака ме да̄нам̣, датва̄ анва̄диса̄хи ме;

аппева на̄ма муччеййам̣, пуббалохитабходжана̄’’ти.

122. ма̄туйа̄ вачанам̣ сутва̄, упатиссонукампако;

а̄мантайи моггалла̄нам̣, ануруддхан̃ча каппинам̣.

123. чатассо кут̣ийо катва̄, сан̇гхе ча̄туддисе ада̄;

кут̣ийо аннапа̄нан̃ча, ма̄ту даккхин̣ама̄дисӣ.

124. саманантара̄нуддит̣т̣хе, випа̄ко удападжджатха;

бходжанам̣ па̄нӣйам̣ ваттхам̣, даккхин̣а̄йа идам̣ пхалам̣.

125. тато суддха̄ сучивасана̄, ка̄сикуттамадха̄ринӣ;

вичиттаваттха̄бхаран̣а̄, колитам̣ упасан̇ками.

126. ‘‘абхиккантена ван̣н̣ена, йа̄ твам̣ тит̣т̣хаси девате;

обха̄сентӣ диса̄ сабба̄, осадхӣ вийа та̄рака̄.

127. ‘‘кена тета̄дисо ван̣н̣о, кена те идха миджджхати;

уппаджджанти ча те бхога̄, йе кечи манасо пийа̄.

128. ‘‘пуччха̄ми там̣ деви маха̄нубха̄ве, мануссабхӯта̄ кимака̄си пун̃н̃ам̣;

кена̄си евам̣ джалита̄нубха̄ва̄, ван̣н̣о ча те саббадиса̄ пабха̄сатӣ’’ти.

129. ‘‘са̄рипуттасса̄хам̣ ма̄та̄, пуббе ан̃н̃а̄су джа̄тӣсу;

упапанна̄ петтивисайам̣, кхуппипа̄сасамаппита̄.

130. ‘‘чхад̣д̣итам̣ кхипитам̣ кхел̣ам̣, син̇гха̄н̣икам̣ силесумам̣;

васан̃ча д̣айхама̄на̄нам̣, виджа̄та̄нан̃ча лохитам̣.

131. ‘‘ван̣ика̄нан̃ча йам̣ гха̄на-сӣсаччхинна̄на лохитам̣;

кхуда̄парета̄ бхун̃джа̄ми, иттхипурисанисситам̣.

132. ‘‘пуббалохитам̣ бхаккхиссам̣, пасӯнам̣ ма̄нуса̄на ча;

ален̣а̄ анага̄ра̄ ча, нӣламан̃чапара̄йан̣а̄.

133. ‘‘са̄рипуттасса да̄нена, мода̄ми акутобхайа̄;

муним̣ ка̄рун̣икам̣ локе, бханте вандитума̄гата̄’’ти.

са̄рипуттаттхерасса ма̄тупетиваттху дутийам̣.