10. уттарама̄тупетиваттху

331. дива̄виха̄рагатам̣ бхиккхум̣, ган̇га̄тӣре нисиннакам̣;

там̣ петӣ упасан̇камма, дуббан̣н̣а̄ бхӣрудассана̄.

332. кеса̄ часса̄ атидӣгха̄ [ахӯ дӣгха̄ (ка.)], йа̄вабхӯма̄валамбаре [йа̄ва бхӯмйа̄’валамбаре (?)];

кесехи са̄ пат̣иччханна̄, саман̣ам̣ етадабрави.

333. ‘‘пан̃чапан̣н̣а̄савасса̄ни, йато ка̄лан̇ката̄ ахам̣;

на̄бхиджа̄на̄ми бхуттам̣ ва̄, пӣтам̣ ва̄ пана па̄нийам̣;

дехи твам̣ па̄нийам̣ бханте, тасита̄ па̄нийа̄йа ме’’ти.

334. ‘‘айам̣ сӣтодика̄ ган̇га̄, химавантато [химаванта̄ва (ка.)] сандати;

пива етто гахетва̄на, ким̣ мам̣ йа̄часи па̄нийа’’нти.

335. ‘‘сача̄хам̣ бханте ган̇га̄йа, сайам̣ ган̣ха̄ми па̄нийам̣;

лохитам̣ ме париваттати, тасма̄ йа̄ча̄ми па̄нийа’’нти.

336. ‘‘ким̣ ну ка̄йена ва̄ча̄йа, манаса̄ дуккат̣ам̣ катам̣;

кисса каммавипа̄кена, ган̇га̄ те хоти лохита’’нти.

337. ‘‘путто ме уттаро на̄ма [путто ме бханте уттаро (ка.)], саддхо а̄си упа̄сако;

со ча майхам̣ ака̄ма̄йа, саман̣а̄нам̣ павеччхати.

338. ‘‘чӣварам̣ пин̣д̣апа̄тан̃ча, паччайам̣ сайана̄санам̣;

тамахам̣ парибха̄са̄ми, маччхерена упаддута̄.

339. ‘‘йам̣ твам̣ майхам̣ ака̄ма̄йа, саман̣а̄нам̣ павеччхаси;

чӣварам̣ пин̣д̣апа̄тан̃ча, паччайам̣ сайана̄санам̣.

340. ‘‘етам̣ те паралокасмим̣, лохитам̣ хоту уттара;

тасса каммасса випа̄кена, ган̇га̄ ме хоти лохита’’нти.

уттарама̄тупетиваттху дасамам̣.