2. индрийаниддесо

27. саддхиндрийасса пан̃ча вивека̄, пан̃ча вира̄га̄, пан̃ча ниродха̄, пан̃ча воссагга̄, два̄даса ниссайа̄. вӣрийиндрийасса…пе… сатиндрийасса… сама̄дхиндрийасса… пан̃н̃индрийасса пан̃ча вивека̄, пан̃ча вира̄га̄, пан̃ча ниродха̄, пан̃ча воссагга̄, два̄даса ниссайа̄.

саддхиндрийасса катаме пан̃ча вивека̄? виккхамбханавивеко, тадан̇гавивеко, самуччхедавивеко, пат̣иппассаддхививеко, ниссаран̣авивеко. виккхамбханавивеко ча нӣваран̣а̄нам̣ пат̣хамаджджха̄нам̣ бха̄вайато, тадан̇гавивеко ча дит̣т̣хигата̄нам̣ ниббедхабха̄гийам̣ сама̄дхим̣ бха̄вайато, самуччхедавивеко ча локуттарам̣ кхайага̄мимаггам̣ бха̄вайато, пат̣иппассаддхививеко ча пхалаккхан̣е, ниссаран̣авивеко ча ниродхо нибба̄нам̣. саддхиндрийасса име пан̃ча вивека̄. имесу пан̃часу вивекесу чхандаджа̄то хоти саддха̄дхимутто, читтан̃часса сва̄дхит̣т̣хитам̣…пе… саддхиндрийасса име пан̃ча вивека̄, пан̃ча вира̄га̄, пан̃ча ниродха̄, пан̃ча воссагга̄, два̄даса ниссайа̄.

вӣрийиндрийасса…пе… сатиндрийасса…пе… сама̄дхиндрийасса… пан̃н̃индрийасса катаме пан̃ча вивека̄? виккхамбханавивеко, тадан̇гавивеко, самуччхедавивеко, пат̣иппассаддхививеко, ниссаран̣авивеко…пе… пан̃н̃индрийасса име пан̃ча вивека̄, пан̃ча вира̄га̄, пан̃ча ниродха̄, пан̃ча воссагга̄, два̄даса ниссайа̄ти.

вивекакатха̄ нит̣т̣хита̄.