3. абхисамайакатха̄

19. абхисамайоти. кена абхисамети? читтена абхисамети.

хан̃чи читтена абхисамети, тена хи ан̃н̃а̄н̣ӣ абхисамети? на ан̃н̃а̄н̣ӣ абхисамети. н̃а̄н̣ена абхисамети.

хан̃чи н̃а̄н̣ена абхисамети, тена хи ачиттена ча н̃а̄н̣ена ча ачиттако [тена хи ачиттако (сйа̄.)] абхисамети? на ачиттако абхисамети. читтена ча н̃а̄н̣ена ча абхисамети.

хан̃чи читтена ча н̃а̄н̣ена ча абхисамети, тена хи ка̄ма̄вачарачиттена ча н̃а̄н̣ена ча абхисамети? на ка̄ма̄вачарачиттена ча н̃а̄н̣ена ча абхисамети.

тена хи рӯпа̄вачарачиттена ча н̃а̄н̣ена ча абхисамети? на рӯпа̄вачарачиттена ча н̃а̄н̣ена ча абхисамети.

тена хи арӯпа̄вачарачиттена ча н̃а̄н̣ена ча абхисамети? на арӯпа̄вачарачиттена ча н̃а̄н̣ена ча абхисамети.

тена хи каммассакатачиттена ча н̃а̄н̣ена ча абхисамети? на каммассакатачиттена ча н̃а̄н̣ена ча абхисамети.

тена хи сачча̄нуломикачиттена ча н̃а̄н̣ена ча абхисамети? на сачча̄нуломикачиттена ча н̃а̄н̣ена ча абхисамети.

тена хи атӣтачиттена ча н̃а̄н̣ена ча абхисамети? на атӣтачиттена ча н̃а̄н̣ена ча абхисамети.

тена хи ана̄гатачиттена ча н̃а̄н̣ена ча абхисамети? на ана̄гатачиттена ча н̃а̄н̣ена ча абхисамети.

тена хи паччуппанналокийачиттена ча н̃а̄н̣ена ча абхисамети? на паччуппанналокийачиттена ча н̃а̄н̣ена ча абхисамети. локуттарамаггаккхан̣е паччуппанначиттена ча н̃а̄н̣ена ча абхисамети.

катхам̣ локуттарамаггаккхан̣е паччуппанначиттена ча н̃а̄н̣ена ча абхисамети? локуттарамаггаккхан̣е уппа̄да̄дхипатеййам̣ читтам̣ н̃а̄н̣асса хету паччайо ча. там̣сампайуттам̣ ниродхагочарам̣ дассана̄дхипатеййам̣ н̃а̄н̣ам̣ читтасса хету паччайо ча. там̣сампайуттам̣ н̃а̄н̣ам̣ ниродхагочарам̣. евам̣ локуттарамаггаккхан̣е паччуппанначиттена ча н̃а̄н̣ена ча абхисамети.

20. ким̣ ну еттакойева абхисамайоти? на хи.локуттарамаггаккхан̣е дассана̄бхисамайо самма̄дит̣т̣хи, абхиниропана̄бхисамайо самма̄сан̇каппо, париггаха̄бхисамайо самма̄ва̄ча̄, самут̣т̣ха̄на̄бхисамайо самма̄камманто, вода̄на̄бхисамайо самма̄а̄джӣво, паггаха̄бхисамайо самма̄ва̄йа̄мо, упат̣т̣ха̄на̄бхисамайо самма̄сати, авиккхепа̄бхисамайо самма̄сама̄дхи; упат̣т̣ха̄на̄бхисамайо сатисамбоджджхан̇го, павичайа̄бхисамайо дхаммавичайасамбоджджхан̇го, паггаха̄бхисамайо вӣрийасамбоджджхан̇го, пхаран̣а̄бхисамайо пӣтисамбоджджхан̇го, упасама̄бхисамайо пассаддхисамбоджджхан̇го, авиккхепа̄бхисамайо сама̄дхисамбоджджхан̇го, пат̣исан̇кха̄на̄бхисамайо упеккха̄самбоджджхан̇го; ассаддхийе акампийа̄бхисамайо саддха̄балам̣, косадждже акампийа̄бхисамайо вӣрийабалам̣, пама̄де акампийа̄бхисамайо сатибалам̣, уддхачче акампийа̄бхисамайо сама̄дхибалам̣, авиджджа̄йа акампийа̄бхисамайо пан̃н̃а̄балам̣; адхимоккха̄бхисамайо саддхиндрийам̣, паггаха̄бхисамайо вӣрийиндрийам̣, упат̣т̣ха̄на̄бхисамайо сатиндрийам̣, авиккхепа̄бхисамайо сама̄дхиндрийам̣, дассана̄бхисамайо пан̃н̃индрийам̣. а̄дхипатеййат̣т̣хена индрийа̄бхисамайо, акампийат̣т̣хена бала̄бхисамайо, ниййа̄нат̣т̣хена боджджхан̇га̄бхисамайо, хетут̣т̣хена магга̄бхисамайо, упат̣т̣ха̄нат̣т̣хена сатипат̣т̣ха̄на̄бхисамайо, падахат̣т̣хена саммаппадха̄на̄бхисамайо, иджджханат̣т̣хена иддхипа̄да̄бхисамайо, татхат̣т̣хена сачча̄бхисамайо, авиккхепат̣т̣хена саматха̄бхисамайо, анупассанат̣т̣хена випассана̄бхисамайо, екарасат̣т̣хена саматхавипассана̄бхисамайо, анативаттанат̣т̣хена йуганаддха̄бхисамайо, сам̣варат̣т̣хена сӣлависуддхиабхисамайо, авиккхепат̣т̣хена висуддхиабхисамайо, дассанат̣т̣хена дит̣т̣хивисуддхиабхисамайо, муттат̣т̣хена вимоккха̄бхисамайо, пат̣иведхат̣т̣хена виджджа̄бхисамайо, паричча̄гат̣т̣хена вимуттиабхисамайо, самуччхедат̣т̣хена кхайе н̃а̄н̣ам̣ абхисамайо. чхандо мӯлат̣т̣хена абхисамайо, манасика̄ро самут̣т̣ха̄нат̣т̣хена абхисамайо, пхассо самодха̄нат̣т̣хена абхисамайо, ведана̄ самосаран̣ат̣т̣хена абхисамайо, сама̄дхи памукхат̣т̣хена абхисамайо, сати а̄дхипатеййат̣т̣хена абхисамайо, пан̃н̃а̄ татуттарат̣т̣хена абхисамайо, вимутти са̄рат̣т̣хена абхисамайо, аматогадхам̣ нибба̄нам̣ парийоса̄нат̣т̣хена абхисамайо.

21. ким̣ ну еттакойева абхисамайоти? на хи. сота̄паттимаггаккхан̣е дассана̄бхисамайо самма̄дит̣т̣хи…пе… аматогадхам̣ нибба̄нам̣ парийоса̄нат̣т̣хена абхисамайо.

ким̣ ну еттакойева абхисамайоти? на хи. сота̄паттипхалаккхан̣е дассана̄бхисамайо самма̄дит̣т̣хи…пе… пат̣иппассаддхат̣т̣хена ануппа̄де н̃а̄н̣ам̣ абхисамайо. чхандо мӯлат̣т̣хена абхисамайо…пе… аматогадхам̣ 5 нибба̄нам̣ парийоса̄нат̣т̣хена абхисамайо.

ким̣ ну еттакойева абхисамайоти?

на хи. сакада̄га̄мимаггаккхан̣е…пе… сакада̄га̄мипхалаккхан̣е… ана̄га̄мимаггаккхан̣е… ана̄га̄мипхалаккхан̣е… арахаттамаггаккхан̣е…пе… арахаттапхалаккхан̣е дассана̄бхисамайо самма̄дит̣т̣хи, абхиниропана̄бхисамайо самма̄сан̇каппо…пе… пат̣иппассаддхат̣т̣хена ануппа̄де н̃а̄н̣ам̣ абхисамайо. чхандо мӯлат̣т̣хена абхисамайо…пе… аматогадхам̣ нибба̄нам̣ парийоса̄нат̣т̣хена абхисамайо.

йва̄йам̣ [сйа̄йам̣ (сйа̄. пӣ.)] килесе паджахати, атӣте килесе паджахати…пе… ана̄гате килесе паджахати, паччуппанне килесе паджахати, атӣте килесе паджахатӣти. хан̃чи атӣте килесе паджахати, тена хи кхӣн̣ам̣ кхепети, нируддхам̣ ниродхети, вигатам̣ вигамети, аттхан̇гатам̣ аттхан̇гамети, атӣтам̣ йам̣ на аттхи там̣ паджахатӣти? на атӣте килесе паджахатӣти. ана̄гате килесе паджахатӣти. хан̃чи ана̄гате килесе паджахати, тена хи аджа̄там̣ паджахати, аниббаттам̣ паджахати, ануппаннам̣ паджахати, апа̄тубхӯтам̣ паджахати, ана̄гатам̣ йам̣ на аттхи там̣ паджахатӣти? на ана̄гате килесе паджахатӣти. паччуппанне килесе паджахатӣти. хан̃чи паччуппанне килесе паджахати, тена хи ратто ра̄гам̣ паджахати, дут̣т̣хо досам̣ паджахати, мӯл̣хо мохам̣ паджахати, винибаддхо ма̄нам̣ паджахати, пара̄мат̣т̣хо дит̣т̣хим̣ паджахати,

виккхепагато уддхаччам̣ паджахати, анит̣т̣хан̇гато вичикиччхам̣ паджахати, тха̄магато анусайам̣ паджахати, кан̣хасуккадхамма̄ йуганаддха̄ самамева ваттанти, сам̣килесика̄ [там̣сам̣килесика̄ (сйа̄. ка.)] маггабха̄вана̄ хоти?

на хи атӣте килесе паджахати, на ана̄гате килесе паджахати, на паччуппанне килесе паджахатӣти. хан̃чи на атӣте килесе паджахати, на ана̄гате…пе… на паччуппанне килесе паджахати, тена хи наттхи маггабха̄вана̄, наттхи пхаласаччхикирийа̄, наттхи килесаппаха̄нам̣, наттхи дхамма̄бхисамайоти? аттхи маггабха̄вана̄, аттхи пхаласаччхикирийа̄, аттхи килесаппаха̄нам̣, аттхи дхамма̄бхисамайо. йатха̄ катхам̣ вийа? сеййатха̄пи тарун̣о руккхо аджа̄тапхало. таменам̣ пурисо мӯлам̣ чхиндеййа. йе тасса руккхасса аджа̄тапхала̄, те аджа̄та̄йева на джа̄йанти, аниббатта̄йева на ниббаттанти, ануппанна̄йева на уппаджджанти, апа̄тубхӯта̄йева на па̄тубхаванти. евамевам̣ уппа̄до хету, уппа̄до паччайо килеса̄нам̣ ниббаттийа̄ти. уппа̄де а̄дӣнавам̣ дисва̄ ануппа̄де читтам̣ паккхандати. ануппа̄де читтасса паккхандатта̄ йе уппа̄дапаччайа̄ килеса̄ ниббаттеййум̣, те аджа̄та̄йева на джа̄йанти, аниббатта̄йева на ниббаттанти, ануппанна̄йева на уппаджджанти, апа̄тубхӯта̄йева на па̄тубхаванти. евам̣ хетуниродха̄ дуккханиродхо. паваттам̣ хету, нимиттам̣ хету, а̄йӯхана̄ хету. а̄йӯхана̄ паччайо килеса̄нам̣ ниббаттийа̄ти. а̄йӯхане а̄дӣнавам̣ дисва̄ ана̄йӯхане читтам̣ паккхандати. ана̄йӯхане читтасса паккхандатта̄, йе а̄йӯханапаччайа̄ килеса̄ ниббаттеййум̣, те аджа̄та̄йева на джа̄йанти, аниббатта̄йева на ниббаттанти, ануппанна̄йева на уппаджджанти, апа̄тубхӯта̄йева на па̄тубхаванти. евам̣ хетуниродха̄ дуккханиродхо. евам̣ аттхи маггабха̄вана̄, аттхи пхаласаччхикирийа̄, аттхи килесаппаха̄нам̣, аттхи дхамма̄бхисамайоти.

абхисамайакатха̄ нит̣т̣хита̄.