5. сассатадит̣т̣хиниддесо

138. сакка̄йаваттхука̄йа сассатадит̣т̣хийа̄ катамехи паннарасахи а̄ка̄рехи абхинивесо хоти? идха ассутава̄ путхуджджано арийа̄нам̣ адасса̄вӣ арийадхаммасса аковидо арийадхамме авинӣто саппуриса̄нам̣ адасса̄вӣ саппурисадхаммасса аковидо саппурисадхамме авинӣто рӯпавантам̣ ва̄ атта̄нам̣ аттани ва̄ рӯпам̣ рӯпасмим̣ ва̄ атта̄нам̣. ведана̄вантам̣ ва̄ атта̄нам̣…пе… сан̃н̃а̄вантам̣ ва̄ атта̄нам̣… сан̇кха̄равантам̣ ва̄ атта̄нам̣… вин̃н̃а̄н̣авантам̣ ва̄ атта̄нам̣ аттани ва̄ вин̃н̃а̄н̣ам̣ вин̃н̃а̄н̣асмим̣ ва̄ атта̄нам̣.

катхам̣ рӯпавантам̣ атта̄нам̣ саманупассати? идхекаччо веданам̣… сан̃н̃ам̣… сан̇кха̄ре… вин̃н̃а̄н̣ам̣ аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ имина̄ рӯпена рӯпава̄’’ти. рӯпавантам̣ атта̄нам̣ саманупассати. сеййатха̄пи руккхо чха̄йа̄сампанно асса. таменам̣ пурисо евам̣ вадеййа – ‘‘айам̣ руккхо, айам̣ чха̄йа̄; ан̃н̃о руккхо, ан̃н̃а̄ чха̄йа̄. со кхо пана̄йам̣ руккхо има̄йа чха̄йа̄йа чха̄йа̄ва̄’’ти. чха̄йа̄вантам̣ руккхам̣ саманупассати. евамевам̣ идхекаччо веданам̣…пе… айам̣ пат̣хама̄ сакка̄йаваттхука̄ сассатадит̣т̣хи. сассатадит̣т̣хи миччха̄дит̣т̣хи…пе… има̄ни сан̃н̃оджана̄ни, на ча дит̣т̣хийо. евам̣ рӯпавантам̣ атта̄нам̣ саманупассати…пе… сакка̄йаваттхука̄йа сассатадит̣т̣хийа̄ имехи паннарасахи а̄ка̄рехи абхинивесо хоти.

сассатадит̣т̣хиниддесо пан̃чамо.