2. атта̄нудит̣т̣хиниддесо

130. атта̄нудит̣т̣хийа̄ катамехи вӣсатийа̄ а̄ка̄рехи абхинивесо хоти? идха ассутава̄ путхуджджано арийа̄нам̣ адасса̄вӣ арийадхаммасса аковидо арийадхамме авинӣто, саппуриса̄нам̣ адасса̄вӣ саппурисадхаммасса аковидо саппурисадхамме авинӣто рӯпам̣ аттато саманупассати рӯпавантам̣ ва̄ атта̄нам̣ аттани ва̄ рӯпам̣ рӯпасмим̣ ва̄ атта̄нам̣; веданам̣…пе… сан̃н̃ам̣…пе… сан̇кха̄ре…пе… вин̃н̃а̄н̣ам̣ аттато саманупассати вин̃н̃а̄н̣авантам̣ ва̄ атта̄нам̣ аттани ва̄ вин̃н̃а̄н̣ам̣ вин̃н̃а̄н̣асмим̣ ва̄ атта̄нам̣.

131. катхам̣ рӯпам̣ аттато саманупассати? идхекаччо патхавӣкасин̣ам̣ аттато саманупассати – ‘‘йам̣ патхавӣкасин̣ам̣, со ахам̣; йо ахам̣, там̣ патхавӣкасин̣а’’нти. патхавӣкасин̣ан̃ча аттан̃ча адвайам̣ саманупассати. сеййатха̄пи телаппадӣпасса джха̄йато ‘‘йа̄ аччи со ван̣н̣о, йо ван̣н̣о са̄ аччӣ’’ти – аччин̃ча ван̣н̣ан̃ча адвайам̣ саманупассати. евамевам̣ идхекаччо патхавӣкасин̣ам̣ аттато саманупассати – ‘‘йам̣ патхавӣкасин̣ам̣, со ахам̣; йо ахам̣, там̣ патхавӣкасин̣а’’нти. патхавӣкасин̣ан̃ча аттан̃ча адвайам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ пат̣хама̄ рӯпаваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи дит̣т̣хивипатти…пе… атта̄нудит̣т̣хи миччха̄дит̣т̣хи. миччха̄дит̣т̣хикасса пурисапуггаласса двева гатийо…пе… има̄ни сан̃н̃оджана̄ни, на ча дит̣т̣хийо.

идхекаччо а̄покасин̣ам̣… теджокасин̣ам̣… ва̄йокасин̣ам̣… нӣлакасин̣ам̣… пӣтакасин̣ам̣… лохитакасин̣ам̣… ода̄такасин̣ам̣ аттато саманупассати – ‘‘йам̣ ода̄такасин̣ам̣, со ахам̣; йо ахам̣, там̣ ода̄такасин̣а’’нти. ода̄такасин̣ан̃ча аттан̃ча адвайам̣ саманупассати. сеййатха̄пи телаппадӣпасса джха̄йато ‘‘йа̄ аччи, со ван̣н̣о; йо ван̣н̣о, са̄ аччӣ’’ти – аччин̃ча ван̣н̣ан̃ча адвайам̣ саманупассати. евамева идхекаччо…пе… ода̄такасин̣ан̃ча аттан̃ча адвайам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ пат̣хама̄ рӯпаваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи дит̣т̣хивипатти…пе… има̄ни сан̃н̃оджана̄ни, на ча дит̣т̣хийо. евам̣ рӯпам̣ аттато саманупассати.

катхам̣ рӯпавантам̣ атта̄нам̣ саманупассати? идхекаччо веданам̣… сан̃н̃ам̣… сан̇кха̄ре… вин̃н̃а̄н̣ам̣ аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ имина̄ рӯпена рӯпава̄’’ти. рӯпавантам̣ атта̄нам̣ саманупассати. сеййатха̄пи руккхо чха̄йа̄сампанно асса. таменам̣ пурисо евам̣ вадеййа – ‘‘айам̣ руккхо, айам̣ чха̄йа̄. ан̃н̃о руккхо, ан̃н̃а̄ чха̄йа̄. со кхо пана̄йам̣ руккхо има̄йа чха̄йа̄йа чха̄йа̄ва̄’’ти. чха̄йа̄вантам̣ руккхам̣ саманупассати. евамевам̣ идхекаччо веданам̣…пе… сан̃н̃ам̣… сан̇кха̄ре… вин̃н̃а̄н̣ам̣ аттато саманупассати. тасса евам̣ хоти – ‘‘айам̣ кхо ме атта̄. со кхо пана айам̣ атта̄ имина̄ рӯпена рӯпава̄’’ти. рӯпавантам̣ атта̄нам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ дутийа̄ рӯпаваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи дит̣т̣хивипатти…пе… има̄ни сан̃н̃оджана̄ни, на ча дит̣т̣хийо. евам̣ рӯпавантам̣ атта̄нам̣ саманупассати.

катхам̣ аттани рӯпам̣ саманупассати? идхекаччо веданам̣… сан̃н̃ам̣… сан̇кха̄ре… вин̃н̃а̄н̣ам̣ аттато саманупассати. тасса евам̣ хоти – ‘‘айам̣ кхо ме атта̄. имасмин̃ча пана аттани идам̣ рӯпа’’нти. аттани рӯпам̣ саманупассати. сеййатха̄пи пуппхам̣ гандхасампаннам̣ асса. таменам̣ пурисо евам̣ вадеййа – ‘‘идам̣ пуппхам̣, айам̣ гандхо; ан̃н̃ам̣ пуппхам̣, ан̃н̃о гандхо. со кхо пана̄йам̣ гандхо имасмим̣ пуппхе’’ти. пуппхасмим̣ гандхам̣ саманупассати. евамевам̣ идхекаччо веданам̣…пе… сан̃н̃ам̣… сан̇кха̄ре… вин̃н̃а̄н̣ам̣ аттато саманупассати. тасса евам̣ хоти – ‘‘айам̣ кхо ме атта̄. имасмин̃ча пана аттани идам̣ рӯпа’’нти. аттани рӯпам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ татийа̄ рӯпаваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи дит̣т̣хивипатти…пе… има̄ни сан̃н̃оджана̄ни, на ча дит̣т̣хийо. евам̣ аттани рӯпам̣ саманупассати.

катхам̣ рӯпасмим̣ атта̄нам̣ саманупассати? идхекаччо веданам̣…пе… сан̃н̃ам̣… сан̇кха̄ре… вин̃н̃а̄н̣ам̣ аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ имасмим̣ рӯпе’’ти. рӯпасмим̣ атта̄нам̣ саманупассати. сеййатха̄пи ман̣и каран̣д̣аке паккхитто асса. таменам̣ пурисо евам̣ вадеййа – ‘‘айам̣ ман̣и, айам̣ каран̣д̣ако. ан̃н̃о ман̣и, ан̃н̃о каран̣д̣ако. со кхо пана̄йам̣ ман̣и имасмим̣ каран̣д̣аке’’ти. каран̣д̣акасмим̣ ман̣им̣ саманупассати. евамевам̣ идхекаччо веданам̣…пе… сан̃н̃ам̣… сан̇кха̄ре… вин̃н̃а̄н̣ам̣ аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ имасмим̣ рӯпе’’ти. рӯпасмим̣ атта̄нам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ чатуттха̄ рӯпаваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи дит̣т̣хивипатти…пе… има̄ни сан̃н̃оджана̄ни, на ча дит̣т̣хийо. евам̣ рӯпасмим̣ атта̄нам̣ саманупассати.

132. катхам̣ веданам̣ аттато саманупассати? идхекаччо чаккхусампхассаджам̣ веданам̣ сотасампхассаджам̣ веданам̣ гха̄насампхассаджам̣ веданам̣ дживха̄сампхассаджам̣ веданам̣ ка̄йасампхассаджам̣ веданам̣ маносампхассаджам̣ веданам̣ аттато саманупассати. ‘‘йа̄ маносампхассаджа̄ ведана̄ со ахам̣, йо ахам̣ са̄ маносампхассаджа̄ ведана̄’’ти – маносампхассаджам̣ веданан̃ча аттан̃ча адвайам̣ саманупассати. сеййатха̄пи телаппадӣпасса джха̄йато ‘‘йа̄ аччи со ван̣н̣о, йо ван̣н̣о са̄ аччӣ’’ти – аччин̃ча ван̣н̣ан̃ча адвайам̣ саманупассати. евамевам̣ идхекаччо маносампхассаджам̣ веданам̣ аттато саманупассати. ‘‘йа̄ маносампхассаджа̄ ведана̄ со ахам̣, йо ахам̣ са̄ маносампхассаджа̄ ведана̄’’ти – маносампхассаджам̣ веданан̃ча аттан̃ча адвайам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ пат̣хама̄ ведана̄ваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи дит̣т̣хивипатти…пе… има̄ни сан̃н̃оджана̄ни, на ча дит̣т̣хийо. евам̣ веданам̣ аттато саманупассати.

катхам̣ ведана̄вантам̣ атта̄нам̣ саманупассати? идхекаччо сан̃н̃ам̣…пе… сан̇кха̄ре… вин̃н̃а̄н̣ам̣… рӯпам̣ аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ има̄йа ведана̄йа ведана̄ва̄’’ти. ведана̄вантам̣ атта̄нам̣ саманупассати. сеййатха̄пи руккхо чха̄йа̄сампанно асса. таменам̣ пурисо евам̣ вадеййа – ‘‘айам̣ руккхо, айам̣ чха̄йа̄. ан̃н̃о руккхо, ан̃н̃а̄ чха̄йа̄. со кхо пана̄йам̣ руккхо има̄йа чха̄йа̄йа чха̄йа̄ва̄’’ти. чха̄йа̄вантам̣ руккхам̣ саманупассати. евамевам̣ идхекаччо сан̃н̃ам̣…пе… сан̇кха̄ре… вин̃н̃а̄н̣ам̣… рӯпам̣ аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ има̄йа ведана̄йа ведана̄ва̄’’ти. ведана̄вантам̣ атта̄нам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ дутийа̄ ведана̄ваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи дит̣т̣хивипатти…пе… има̄ни сан̃н̃оджана̄ни, на ча дит̣т̣хийо. евам̣ ведана̄вантам̣ атта̄нам̣ саманупассати.

катхам̣ аттани веданам̣ саманупассати? идхекаччо сан̃н̃ам̣…пе… сан̇кха̄ре… вин̃н̃а̄н̣ам̣… рӯпам̣ аттато саманупассати. тасса евам̣ хоти – ‘‘айам̣ кхо ме атта̄. имасмин̃ча пана аттани айам̣ ведана̄’’ти. аттани веданам̣ саманупассати. сеййатха̄пи пуппхам̣ гандхасампаннам̣ асса. таменам̣ пурисо евам̣ вадеййа – ‘‘идам̣ пуппхам̣, айам̣ гандхо; ан̃н̃ам̣ пуппхам̣, ан̃н̃о гандхо. со кхо пана̄йам̣ гандхо имасмим̣ пуппхе’’ти. пуппхасмим̣ гандхам̣ саманупассати. евамевам̣ идхекаччо сан̃н̃ам̣…пе… сан̇кха̄ре… вин̃н̃а̄н̣ам̣… рӯпам̣ аттато саманупассати. тасса евам̣ хоти – ‘‘айам̣ кхо ме атта̄. имасмин̃ча пана аттани айам̣ ведана̄’’ти. аттани веданам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ татийа̄ ведана̄ваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи дит̣т̣хивипатти…пе… има̄ни сан̃н̃оджана̄ни, на ча дит̣т̣хийо. евам̣ аттани веданам̣ саманупассати.

катхам̣ ведана̄йа атта̄нам̣ саманупассати? идхекаччо сан̃н̃ам̣…пе… сан̇кха̄ре… вин̃н̃а̄н̣ам̣… рӯпам̣ аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ има̄йа ведана̄йа̄’’ти. ведана̄йа атта̄нам̣ саманупассати. сеййатха̄пи ман̣и каран̣д̣аке паккхитто асса. таменам̣ пурисо евам̣ вадеййа – ‘‘айам̣ ман̣и, айам̣ каран̣д̣ако. ан̃н̃о ман̣и, ан̃н̃о каран̣д̣ако. со кхо пана̄йам̣ ман̣и имасмим̣ каран̣д̣аке’’ти. каран̣д̣акасмим̣ ман̣им̣ саманупассати. евамевам̣ идхекаччо сан̃н̃ам̣… сан̇кха̄ре… вин̃н̃а̄н̣ам̣… рӯпам̣ аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ има̄йа ведана̄йа̄’’ти. ведана̄йа атта̄нам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ чатуттха̄ ведана̄ваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи дит̣т̣хивипатти…пе… има̄ни сан̃н̃оджана̄ни, на ча дит̣т̣хийо. евам̣ ведана̄йа атта̄нам̣ саманупассати.

133. катхам̣ сан̃н̃ам̣ аттато саманупассати? идхекаччо чаккхусампхассаджам̣ сан̃н̃ам̣…пе… сотасампхассаджам̣ сан̃н̃ам̣… гха̄насампхассаджам̣ сан̃н̃ам̣… дживха̄сампхассаджам̣ сан̃н̃ам̣… ка̄йасампхассаджам̣ сан̃н̃ам̣… маносампхассаджам̣ сан̃н̃ам̣ аттато саманупассати. йа̄ маносампхассаджа̄ сан̃н̃а̄ со ахам̣, йо ахам̣ са̄ маносампхассаджа̄ сан̃н̃а̄’’ти. маносампхассаджам̣ сан̃н̃ан̃ча аттан̃ча адвайам̣ саманупассати. сеййатха̄пи телаппадӣпасса джха̄йато ‘‘йа̄ аччи со ван̣н̣о, йо ван̣н̣о са̄ аччӣ’’ти – аччин̃ча ван̣н̣ан̃ча адвайам̣ саманупассати. евамевам̣ идхекаччо маносампхассаджам̣ сан̃н̃ам̣ аттато саманупассати – ‘‘йа̄ маносампхассаджа̄ сан̃н̃а̄ со ахам̣, йо ахам̣ са̄ маносампхассаджа̄ сан̃н̃а̄’’ти. маносампхассаджам̣ сан̃н̃ан̃ча аттан̃ча адвайам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ пат̣хама̄ сан̃н̃а̄ваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи дит̣т̣хивипатти…пе… има̄ни сан̃н̃оджана̄ни, на ча дит̣т̣хийо. евам̣ сан̃н̃ам̣ аттато саманупассати.

катхам̣ сан̃н̃а̄вантам̣ атта̄нам̣ саманупассати? идхекаччо сан̇кха̄ре…пе… вин̃н̃а̄н̣ам̣… рӯпам̣… веданам̣ аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ има̄йа сан̃н̃а̄йа сан̃н̃а̄ва̄’’ти. сан̃н̃а̄вантам̣ атта̄нам̣ саманупассати. сеййатха̄пи руккхо чха̄йа̄сампанно асса. таменам̣ пурисо евам̣ вадеййа – ‘‘айам̣ руккхо, айам̣ чха̄йа̄. ан̃н̃о руккхо, ан̃н̃а̄ чха̄йа̄. со кхо пана̄йам̣ руккхо има̄йа чха̄йа̄йа чха̄йа̄ва̄’’ти. чха̄йа̄вантам̣ руккхам̣ саманупассати. евамевам̣ идхекаччо сан̇кха̄ре… вин̃н̃а̄н̣ам̣… рӯпам̣… веданам̣ аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ има̄йа сан̃н̃а̄йа сан̃н̃а̄ва̄’’ти. сан̃н̃а̄вантам̣ атта̄нам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ дутийа̄ сан̃н̃а̄ваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи…пе… има̄ни сан̃н̃оджана̄ни, на ча дит̣т̣хийо. евам̣ сан̃н̃а̄вантам̣ атта̄нам̣ саманупассати.

катхам̣ аттани сан̃н̃ам̣ саманупассати? идхекаччо сан̇кха̄ре…пе… вин̃н̃а̄н̣ам̣… рӯпам̣… веданам̣ аттато саманупассати. тасса евам̣ хоти – ‘‘айам̣ кхо ме атта̄. имасмин̃ча пана аттани айам̣ сан̃н̃а̄’’ти. аттани сан̃н̃ам̣ саманупассати. сеййатха̄пи пуппхам̣ гандхасампаннам̣ асса. таменам̣ пурисо евам̣ вадеййа – ‘‘идам̣ пуппхам̣, айам̣ гандхо. ан̃н̃ам̣ пуппхам̣, ан̃н̃о гандхо. со кхо пана̄йам̣ гандхо имасмим̣ пуппхе’’ти. пуппхасмим̣ гандхам̣ саманупассати. евамевам̣ идхекаччо сан̇кха̄ре… вин̃н̃а̄н̣ам̣… рӯпам̣… веданам̣ аттато саманупассати. тасса евам̣ хоти – ‘‘айам̣ кхо ме атта̄. имасмин̃ча пана аттани айам̣ сан̃н̃а̄’’ти. аттани сан̃н̃ам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ татийа̄ сан̃н̃а̄ваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи…пе… има̄ни сан̃н̃оджана̄ни, на ча дит̣т̣хийо. евам̣ аттани сан̃н̃ам̣ саманупассати.

катхам̣ сан̃н̃а̄йа атта̄нам̣ саманупассати? идхекаччо сан̇кха̄ре …пе… вин̃н̃а̄н̣ам̣… рӯпам̣… веданам̣ аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ има̄йа сан̃н̃а̄йа̄’’ти. сан̃н̃а̄йа атта̄нам̣ саманупассати. сеййатха̄пи ман̣и каран̣д̣аке паккхитто асса. таменам̣ пурисо евам̣ вадеййа – ‘‘айам̣ ман̣и, айам̣ каран̣д̣ако. ан̃н̃о ман̣и, ан̃н̃о каран̣д̣ако. со кхо пана̄йам̣ ман̣и имасмим̣ каран̣д̣аке’’ти. каран̣д̣акасмим̣ ман̣им̣ саманупассати. евамева идхекаччо сан̇кха̄ре… вин̃н̃а̄н̣ам̣… рӯпам̣… веданам̣ аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ има̄йа сан̃н̃а̄йа̄’’ти. сан̃н̃а̄йа атта̄нам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ чатуттха̄ сан̃н̃а̄ваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи…пе… има̄ни сан̃н̃оджана̄ни на ча дит̣т̣хийо. евам̣ сан̃н̃а̄йа атта̄нам̣ саманупассати.

134. катхам̣ сан̇кха̄ре аттато саманупассати? идхекаччо чаккхусампхассаджам̣ четанам̣ сотасампхассаджам̣ четанам̣ гха̄насампхассаджам̣ четанам̣ дживха̄сампхассаджам̣ четанам̣ ка̄йасампхассаджам̣ четанам̣ маносампхассаджам̣ четанам̣ аттато саманупассати. ‘‘йа̄ маносампхассаджа̄ четана̄, со ахам̣; йо ахам̣ са̄ маносампхассаджа̄ четана̄’’ти – маносампхассаджам̣ четанан̃ча аттан̃ча адвайам̣ саманупассати. сеййатха̄пи телаппадӣпасса джха̄йато ‘‘йа̄ аччи со ван̣н̣о, йо ван̣н̣о са̄ аччӣ’’ти – аччин̃ча ван̣н̣ан̃ча адвайам̣ саманупассати. евамевам̣ идхекаччо маносампхассаджам̣ четанам̣ аттато саманупассати. ‘‘йа̄ маносампхассаджа̄ четана̄ со ахам̣, йо ахам̣ са̄ маносампхассаджа̄ четана̄’’ти – маносампхассаджам̣ четанан̃ча аттан̃ча адвайам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ пат̣хама̄ сан̇кха̄раваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи…пе… има̄ни сан̃н̃оджана̄ни, на ча дит̣т̣хийо. евам̣ сан̇кха̄ре аттато саманупассати.

катхам̣ сан̇кха̄равантам̣ атта̄нам̣ саманупассати? идхекаччо вин̃н̃а̄н̣ам̣… рӯпам̣… веданам̣… сан̃н̃ам̣ аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ имехи сан̇кха̄рехи сан̇кха̄рава̄’’ти. сан̇кха̄равантам̣ атта̄нам̣ саманупассати. сеййатха̄пи руккхо чха̄йа̄сампанно асса. таменам̣ пурисо евам̣ вадеййа – ‘‘айам̣ руккхо, айам̣ чха̄йа̄. ан̃н̃о руккхо, ан̃н̃а̄ чха̄йа̄. со кхо пана̄йам̣ руккхо има̄йа чха̄йа̄йа чха̄йа̄ва̄’’ти. чха̄йа̄вантам̣ руккхам̣ саманупассати. евамева идхекаччо вин̃н̃а̄н̣ам̣… рӯпам̣… веданам̣… сан̃н̃ам̣ аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄. имехи сан̇кха̄рехи сан̇кха̄рава̄’’ти. сан̇кха̄равантам̣ атта̄нам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ дутийа̄ сан̇кха̄раваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи…пе… има̄ни сан̃н̃оджана̄ни, на ча дит̣т̣хийо. евам̣ сан̇кха̄равантам̣ атта̄нам̣ саманупассати.

катхам̣ аттани сан̇кха̄ре саманупассати? идхекаччо вин̃н̃а̄н̣ам̣… рӯпам̣… веданам̣… сан̃н̃ам̣ аттато саманупассати. тасса евам̣ хоти – ‘‘айам̣ кхо ме атта̄. имасмин̃ча пана аттани име сан̇кха̄ра̄’’ти. аттани сан̇кха̄ре саманупассати. сеййатха̄пи пуппхам̣ гандхасампаннам̣ асса. таменам̣ пурисо евам̣ вадеййа – ‘‘идам̣ пуппхам̣, айам̣ гандхо; ан̃н̃ам̣ пуппхам̣, ан̃н̃о гандхо. со кхо пана̄йам̣ гандхо имасмим̣ пуппхе’’ти. пуппхасмим̣ гандхам̣ саманупассати. евамевам̣ идхекаччо вин̃н̃а̄н̣ам̣… рӯпам̣… веданам̣… сан̃н̃ам̣ аттато саманупассати. тасса евам̣ хоти – ‘‘айам̣ кхо ме атта̄. имасмин̃ча пана аттани име сан̇кха̄ра̄’’ти. аттани сан̇кха̄ре саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ татийа̄ сан̇кха̄раваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи…пе… има̄ни сан̃н̃оджана̄ни, на ча дит̣т̣хийо. евам̣ аттани сан̇кха̄ре саманупассати.

катхам̣ сан̇кха̄ресу атта̄нам̣ саманупассати? идхекаччо вин̃н̃а̄н̣ам̣… рӯпам̣… веданам̣… сан̃н̃ам̣ аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ имесу сан̇кха̄ресӯ’’ти. сан̇кха̄ресу атта̄нам̣ саманупассати. сеййатха̄пи ман̣и каран̣д̣аке паккхитто асса. таменам̣ пурисо евам̣ вадеййа – ‘‘айам̣ ман̣и, айам̣ каран̣д̣ако. ан̃н̃о ман̣и, ан̃н̃о каран̣д̣ако. со кхо пана̄йам̣ ман̣и имасмим̣ каран̣д̣аке’’ти. каран̣д̣акасмим̣ ман̣им̣ саманупассати. евамева идхекаччо вин̃н̃а̄н̣ам̣… рӯпам̣… веданам̣… сан̃н̃ам̣ аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ имесу сан̇кха̄ресӯ’’ти. сан̇кха̄ресу атта̄нам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ чатуттха̄ сан̇кха̄раваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи…пе… има̄ни сан̃н̃оджана̄ни, на ча дит̣т̣хийо. евам̣ сан̇кха̄ресу атта̄нам̣ саманупассати.

135. катхам̣ вин̃н̃а̄н̣ам̣ аттато саманупассати? идхекаччо чаккхувин̃н̃а̄н̣ам̣… сотавин̃н̃а̄н̣ам̣… гха̄навин̃н̃а̄н̣ам̣… дживха̄вин̃н̃а̄н̣ам̣ ка̄йавин̃н̃а̄н̣ам̣… мановин̃н̃а̄н̣ам̣ аттато саманупассати. ‘‘йам̣ мановин̃н̃а̄н̣ам̣, со ахам̣; йо ахам̣, там̣ мановин̃н̃а̄н̣а’’нти – мановин̃н̃а̄н̣ан̃ча аттан̃ча адвайам̣ саманупассати. сеййатха̄пи телаппадӣпасса джха̄йато ‘‘йа̄ аччи со ван̣н̣о, йо ван̣н̣о са̄ аччӣ’’ти – аччин̃ча ван̣н̣ан̃ча адвайам̣ саманупассати. евамевам̣ идхекаччо мановин̃н̃а̄н̣ам̣ аттато саманупассати. ‘‘йам̣ мановин̃н̃а̄н̣ам̣, со ахам̣; йо ахам̣ там̣ мановин̃н̃а̄н̣а’’нти – мановин̃н̃а̄н̣ан̃ча аттан̃ча адвайам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ пат̣хама̄ вин̃н̃а̄н̣аваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи…пе… има̄ни сан̃н̃оджана̄ни, на ча дит̣т̣хийо. евам̣ вин̃н̃а̄н̣ам̣ аттато саманупассати.

катхам̣ вин̃н̃а̄н̣авантам̣ атта̄нам̣ саманупассати? идхекаччо рӯпам̣… веданам̣… сан̃н̃ам̣… сан̇кха̄ре аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ имина̄ вин̃н̃а̄н̣ена вин̃н̃а̄н̣ава̄’’ти. вин̃н̃а̄н̣авантам̣ атта̄нам̣ саманупассати. сеййатха̄пи руккхо чха̄йа̄сампанно асса. таменам̣ пурисо евам̣ вадеййа – ‘‘айам̣ руккхо, айам̣ чха̄йа̄. ан̃н̃о руккхо, ан̃н̃а̄ чха̄йа̄. со кхо пана̄йам̣ руккхо има̄йа чха̄йа̄йа чха̄йа̄ва̄’’ти. чха̄йа̄вантам̣ руккхам̣ саманупассати. евамевам̣ идхекаччо рӯпам̣… веданам̣… сан̃н̃ам̣… сан̇кха̄ре аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ имина̄ вин̃н̃а̄н̣ена вин̃н̃а̄н̣ава̄’’ти. вин̃н̃а̄н̣авантам̣ атта̄нам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ дутийа̄ вин̃н̃а̄н̣аваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи…пе… има̄ни сан̃н̃оджана̄ни, на ча дит̣т̣хийо. евам̣ вин̃н̃а̄н̣авантам̣ атта̄нам̣ саманупассати.

катхам̣ аттани вин̃н̃а̄н̣ам̣ саманупассати? идхекаччо рӯпам̣… веданам̣… сан̃н̃ам̣… сан̇кха̄ре аттато саманупассати. тасса евам̣ хоти – ‘‘айам̣ кхо ме атта̄. имасмин̃ча пана аттани идам̣ вин̃н̃а̄н̣а’’нти. аттани вин̃н̃а̄н̣ам̣ саманупассати. сеййатха̄пи пуппхам̣ гандхасампаннам̣ асса. таменам̣ пурисо евам̣ вадеййа – ‘‘идам̣ пуппхам̣, айам̣ гандхо; ан̃н̃ам̣ пуппхам̣, ан̃н̃о гандхо. со кхо пана̄йам̣ гандхо имасмим̣ пуппхе’’ти. пуппхасмим̣ гандхам̣ саманупассати. евамевам̣ идхекаччо рӯпам̣… веданам̣… сан̃н̃ам̣… сан̇кха̄ре аттато саманупассати. тасса евам̣ хоти – ‘‘айам̣ кхо ме атта̄. имасмин̃ча пана аттани идам̣ вин̃н̃а̄н̣а’’нти. аттани вин̃н̃а̄н̣ам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ татийа̄ вин̃н̃а̄н̣аваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи…пе… има̄ни сан̃н̃оджана̄ни, на ча дит̣т̣хийо. евам̣ аттани вин̃н̃а̄н̣ам̣ саманупассати.

катхам̣ вин̃н̃а̄н̣асмим̣ атта̄нам̣ саманупассати? идхекаччо рӯпам̣… веданам̣… сан̃н̃ам̣… сан̇кха̄ре аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ имасмим̣ вин̃н̃а̄н̣е’’ти. вин̃н̃а̄н̣асмим̣ атта̄нам̣ саманупассати. сеййатха̄пи ман̣и каран̣д̣аке паккхитто асса. таменам̣ пурисо евам̣ вадеййа – ‘‘айам̣ ман̣и, айам̣ каран̣д̣ако. ан̃н̃о ман̣и, ан̃н̃о каран̣д̣ако. со кхо пана̄йам̣ ман̣и имасмим̣ каран̣д̣аке’’ти. каран̣д̣акасмим̣ ман̣им̣ саманупассати. евамевам̣ идхекаччо рӯпам̣… веданам̣… сан̃н̃ам̣… сан̇кха̄ре аттато саманупассати. тасса евам̣ хоти – ‘‘айам̣ кхо ме атта̄. со кхо пана ме айам̣ атта̄ имасмим̣ вин̃н̃а̄н̣е’’ти. вин̃н̃а̄н̣асмим̣ атта̄нам̣ саманупассати. абхинивесапара̄ма̄со дит̣т̣хи. дит̣т̣хи на ваттху, ваттху на дит̣т̣хи. ан̃н̃а̄ дит̣т̣хи, ан̃н̃ам̣ ваттху. йа̄ ча дит̣т̣хи йан̃ча ваттху – айам̣ чатуттха̄ вин̃н̃а̄н̣аваттхука̄ атта̄нудит̣т̣хи. атта̄нудит̣т̣хи миччха̄дит̣т̣хи…пе… има̄ни сан̃н̃оджана̄ни, на ча дит̣т̣хийо. евам̣ вин̃н̃а̄н̣асмим̣ атта̄нам̣ саманупассати. атта̄нудит̣т̣хийа̄ имехи вӣсатийа̄ а̄ка̄рехи абхинивесо хоти.

атта̄нудит̣т̣хиниддесо дутийо.