40. дассанависуддхин̃а̄н̣аниддесо

91. катхам̣ саббадхамма̄нам̣ екасан̇гахата̄на̄наттекаттапат̣иведхе пан̃н̃а̄ дассанависуддхин̃а̄н̣ам̣? саббадхамма̄нанти пан̃чаккхандха̄…пе… апарийа̄панна̄ дхамма̄.

екасан̇гахата̄ти два̄дасахи а̄ка̄рехи саббе дхамма̄ екасан̇гахита̄. татхат̣т̣хена, анаттат̣т̣хена, саччат̣т̣хена, пат̣иведхат̣т̣хена, абхиджа̄нанат̣т̣хена, париджа̄нанат̣т̣хена, дхаммат̣т̣хена, дха̄тут̣т̣хена, н̃а̄тат̣т̣хена, саччхикирийат̣т̣хена, пхусанат̣т̣хена, абхисамайат̣т̣хена – имехи два̄дасахи а̄ка̄рехи саббе дхамма̄ екасан̇гахита̄.

на̄наттекаттанти ка̄маччхандо на̄наттам̣, неккхаммам̣ екаттам̣…пе… саббакилеса̄ на̄наттам̣, арахаттамагго екаттам̣.

пат̣иведхети дуккхасаччам̣ парин̃н̃а̄пат̣иведхам̣ пат̣ивиджджхати. самудайасаччам̣ паха̄напат̣иведхам̣ пат̣ивиджджхати. ниродхасаччам̣ саччхикирийа̄пат̣иведхам̣ пат̣ивиджджхати. маггасаччам̣ бха̄вана̄пат̣иведхам̣ пат̣ивиджджхати.

дассанависуддхӣти сота̄паттимаггаккхан̣е дассанам̣ висуджджхати; сота̄паттипхалаккхан̣е дассанам̣ висуддхам̣. сакада̄га̄мимаггаккхан̣е дассанам̣ висуджджхати; сакада̄га̄мипхалаккхан̣е дассанам̣ висуддхам̣. ана̄га̄мимаггаккхан̣е дассанам̣ висуджджхати; ана̄га̄мипхалаккхан̣е дассанам̣ висуддхам̣. арахаттамаггаккхан̣е дассанам̣ висуджджхати; арахаттапхалаккхан̣е дассанам̣ висуддхам̣. там̣ н̃а̄тат̣т̣хена н̃а̄н̣ам̣, паджа̄нанат̣т̣хена пан̃н̃а̄. тена вуччати – ‘‘саббадхамма̄нам̣ екасан̇гахата̄на̄наттекаттапат̣иведхе пан̃н̃а̄ дассанависуддхин̃а̄н̣ам̣’’.

дассанависуддхин̃а̄н̣аниддесо чатта̄лӣсамо.