39. аттхасандассанан̃а̄н̣аниддесо

90. катхам̣ на̄на̄дхаммаппака̄саната̄ пан̃н̃а̄ аттхасандассане н̃а̄н̣ам̣? на̄на̄дхамма̄ти пан̃чаккхандха̄, два̄даса̄йатана̄ни, ат̣т̣ха̄раса дха̄туйо, кусала̄ дхамма̄, акусала̄ дхамма̄, абйа̄ката̄ дхамма̄, ка̄ма̄вачара̄ дхамма̄, рӯпа̄вачара̄ дхамма̄, арӯпа̄вачара̄ дхамма̄, апарийа̄панна̄ дхамма̄.

пака̄саната̄ти рӯпам̣ аниччато пака̄сети, рӯпам̣ дуккхато пака̄сети, рӯпам̣ анаттато пака̄сети. веданам̣…пе… сан̃н̃ам̣… сан̇кха̄ре… вин̃н̃а̄н̣ам̣… чаккхум̣…пе… джара̄маран̣ам̣ аниччато пака̄сети, джара̄маран̣ам̣ дуккхато пака̄сети, джара̄маран̣ам̣ анаттато пака̄сети.

аттхасандассанети ка̄маччхандам̣ паджаханто неккхамматтхам̣ сандассети. бйа̄па̄дам̣ паджаханто абйа̄па̄даттхам̣ сандассети. тхинамиддхам̣ паджаханто а̄локасан̃н̃аттхам̣ сандассети. уддхаччам̣ паджаханто авиккхепаттхам̣ сандассети. вичикиччхам̣ паджаханто дхаммававаттха̄наттхам̣ сандассети. авиджджам̣ паджаханто н̃а̄н̣аттхам̣ сандассети. аратим̣ паджаханто па̄моджджаттхам̣ сандассети. нӣваран̣е паджаханто пат̣хамаджха̄наттхам̣ сандассети …пе… саббакилесе паджаханто арахаттамаггаттхам̣ сандассети. там̣ н̃а̄тат̣т̣хена н̃а̄н̣ам̣, паджа̄нанат̣т̣хена пан̃н̃а̄. тена вуччати – ‘‘на̄на̄дхаммапака̄саната̄ пан̃н̃а̄ аттхасандассане н̃а̄н̣ам̣’’.

аттхасандассанан̃а̄н̣аниддесо наватим̣сатимо.