435. халиддира̄гаджа̄такам̣ (9)

78. сутитиккхам̣ аран̃н̃амхи, пантамхи сайана̄сане;

йе ча га̄ме титиккханти, те ул̣а̄ратара̄ тайа̄.

79. аран̃н̃а̄ га̄мама̄гамма, ким̣сӣлам̣ ким̣ватам̣ ахам̣;

пурисам̣ та̄та севеййам̣, там̣ ме аккха̄хи пуччхито.

80. йо те [йо там̣ (сйа̄. джа̄. 1.4.190 аран̃н̃аджа̄такепи)] висса̄сайе та̄та, висса̄сан̃ча кхамеййа те;

суссӯсӣ ча титиккхӣ ча, там̣ бхаджехи ито гато.

81. йасса ка̄йена ва̄ча̄йа, манаса̄ наттхи дуккат̣ам̣;

урасӣва патит̣т̣ха̄йа, там̣ бхаджехи ито гато.

82. йо ча дхаммена чарати, чарантопи на ман̃н̃ати;

висуддхака̄рим̣ саппан̃н̃ам̣, там̣ бхаджехи ито гато.

83. халиддира̄гам̣ капичиттам̣, пурисам̣ ра̄гавира̄гинам̣;

та̄дисам̣ та̄та ма̄ севи, ниммануссампи че сийа̄.

84. а̄сӣвисам̣ва купитам̣, мӣл̣халиттам̣ маха̄патхам̣;

а̄рака̄ париваджджехи, йа̄нӣва висамам̣ патхам̣.

85. анаттха̄ та̄та вад̣д̣ханти, ба̄лам̣ аччупасевато;

ма̄ссу ба̄лена сам̣гаччхи, амиттенева саббада̄.

86. там̣ та̄хам̣ та̄та йа̄ча̄ми, карассу вачанам̣ мама;

ма̄ссу ба̄лена сам̣гаччхи [сам̣ган̃чхи (сӣ. пӣ.)], дуккхо ба̄лехи сан̇гамоти.

халиддира̄гаджа̄такам̣ навамам̣.