411. сусӣмаджа̄такам̣ (7-2-6)

114. ка̄л̣а̄ни кеса̄ни пуре ахесум̣, джа̄та̄ни сӣсамхи йатха̄падесе;

та̄наджджа сета̄ни сусӣма [сусима (ка.)] дисва̄, дхаммам̣ чара брахмачарийасса ка̄ло.

115. мамева дева палитам̣ на туйхам̣, мамева сӣсам̣ мама уттаман̇гам̣;

‘‘аттхам̣ карисса’’нти муса̄ абха̄н̣им̣ [абха̄сим̣ (ка.)], ека̄пара̄дхам̣ кхама ра̄джасет̣т̣ха.

116. дахаро тувам̣ дассанийоси ра̄джа, пат̣хамуггато хоси [хохи (сӣ.), хоти (ка.)] йатха̄ кал̣ӣро;

раджджан̃ча ка̄рехи маман̃ча пасса, ма̄ ка̄ликам̣ анудха̄вӣ джанинда.

117. пасса̄ми вохам̣ дахарим̣ кума̄рим̣, са̄мат̣т̣хапассам̣ сутанум̣ сумаджджхам̣;

ка̄л̣аппава̄л̣а̄ва павеллама̄на̄, палобхайантӣва [са̄ лобхайантӣва (пӣ.)] наресу гаччхати.

118. тамена пасса̄мипарена на̄рим̣, а̄сӣтикам̣ на̄вутикам̣ ва джачча̄;

дан̣д̣ам̣ гахетва̄на паведхама̄нам̣, гопа̄насӣбхоггасамам̣ чарантим̣.

119. сохам̣ тамева̄нувичинтайанто, еко сайа̄ми [пасса̄ми (ка.)] сайанасса маджджхе;

‘‘ахампи евам̣’’ ити пеккхама̄но, на гахе раме [на гехе раме (сӣ.), гехе на раме (сйа̄. ка.)] брахмачарийасса ка̄ло.

120. раджджува̄ламбанӣ чеса̄, йа̄ гехе васато рати;

евампи чхетва̄на ваджанти дхӣра̄, анапеккхино ка̄масукхам̣ паха̄йа̄ти.

сусӣмаджа̄такам̣ чхат̣т̣хам̣.