471. мен̣д̣акапан̃хаджа̄такам̣ (8)

94. йесам̣ на када̄чи бхӯтапуббам̣, сакхйам̣ [саккхим̣ (сӣ. пӣ.), сакхи (сйа̄.)] саттападампимасми локе;

джа̄та̄ амитта̄ дуве саха̄йа̄, пат̣исандха̄йа чаранти кисса хету.

95. йади ме аджджа па̄тара̄сака̄ле, пан̃хам̣ на саккун̣еййа̄тха ваттуметам̣;

рат̣т̣ха̄ пабба̄джайисса̄ми во саббе, на хи маттхо дуппан̃н̃аджа̄тикехи.

96. маха̄джанасама̄гамамхи гхоре, джанакола̄халасан̇гамамхи джа̄те;

виккхиттамана̄ анекачитта̄, пан̃хам̣ на саккун̣ома ваттуметам̣.

97. екаггачитта̄ва екамека̄, рахаси гата̄ аттхам̣ ничинтайитва̄ [аттха̄ни чинтайитва̄ (сйа̄. ка.)];

павивеке саммаситва̄на дхӣра̄, атха ваккханти джанинда етаматтхам̣.

98. уггапутта-ра̄джапуттийа̄нам̣, ураббхасса мам̣сам̣ пийам̣ мана̄пам̣;

на сунакхасса те аденти мам̣сам̣, атха мен̣д̣асса сун̣ена сакхйамасса.

99. чаммам̣ вихананти ел̣акасса, ассапит̣т̣хаттхарассукхасса [ассапит̣т̣хаттхаран̣асукхасса (сӣ.)] хету;

на ча те сунакхасса аттхаранти, атха мен̣д̣асса сун̣ена сакхйамасса.

100. а̄веллитасин̇гико хи мен̣д̣о, на ча сунакхасса виса̄н̣ака̄ни аттхи;

тин̣абхаккхо мам̣сабходжано ча, атха мен̣д̣асса сун̣ена сакхйамасса.

101. тин̣ама̄си пала̄сама̄си мен̣д̣о, на ча сунакхо тин̣ама̄си но пала̄сам̣;

ган̣хеййа сун̣о сасам̣ бил̣а̄рам̣, атха мен̣д̣асса сун̣ена сакхйамасса.

102. ат̣т̣хад̣д̣хападо чатуппадасса, мен̣д̣о ат̣т̣ханакхо адиссама̄но;

чха̄дийама̄харатӣ айам̣ имасса, мам̣сам̣ а̄харатӣ айам̣ амусса.

103. па̄са̄даварагато видехасет̣т̣хо, витиха̄рам̣ ан̃н̃аман̃н̃абходжана̄нам̣;

аддаккхи [аддаса (сйа̄. ка.)] кира саккхикам̣ джаниндо, бубхуккасса пун̣н̣ам̣ мукхасса [бхобхуккхасса ча пун̣н̣амукхасса (сӣ.)] четам̣.

104. ла̄бха̄ вата ме анаппарӯпа̄, йасса медиса̄ пан̣д̣ита̄ куламхи;

пан̃хасса гамбхӣрагатам̣ нипун̣аматтхам̣, пат̣ивиджджханти субха̄ситена дхӣра̄.

105. ассатариратхан̃ча екамекам̣, пхӣтам̣ га̄маваран̃ча екамекам̣;

саббесам̣ во дамми пан̣д̣ита̄нам̣, парамаппатӣтамано субха̄ситена̄ти.

мен̣д̣акапан̃хаджа̄такам̣ ат̣т̣хамам̣.