445. нигродхаджа̄такам̣ (7)

72. на ва̄хаметам̣ [на ча̄хаметам̣ (сӣ.)] джа̄на̄ми, ко ва̄йам̣ касса ва̄ти ва̄ [ча̄ти ва̄ (сӣ.)];

йатха̄ са̄кхо чари [вадӣ (сӣ. сйа̄. пӣ.)] евам̣, нигродха кинти ман̃н̃аси.

73. тато галавинӣтена, пуриса̄ нӣхарим̣су мам̣;

датва̄ мукхапаха̄ра̄ни, са̄кхасса вачанам̣кара̄.

74. ета̄дисам̣ думматина̄, акатан̃н̃уна дуббхина̄;

катам̣ анарийам̣ са̄кхена, сакхина̄ те джана̄дхипа.

75. на ва̄хаметам̣ джа̄на̄ми, напи ме кочи сам̣сати;

йам̣ ме твам̣ самма аккха̄си, са̄кхена ка̄ран̣ам̣ [кад̣д̣ханам̣ (сӣ. сйа̄.)] катам̣.

76. сакхӣнам̣ са̄джӣвакаро, мама са̄кхасса чӯбхайам̣;

твам̣ носиссарийам̣ да̄та̄, мануссесу махантатам̣;

тайа̄ма̄ лаббхита̄ иддхӣ, еттха ме наттхи сам̣сайо.

77. йатха̄пи бӣджамаггимхи, д̣айхати на вирӯхати;

евам̣ катам̣ асаппурисе, нассати на вирӯхати.

78. катан̃н̃умхи ча посамхи, сӣлаванте арийавуттине;

сукхетте вийа бӣджа̄ни, катам̣ тамхи на нассати.

79. имам̣ джаммам̣ некатикам̣, асаппурисачинтакам̣;

хананту са̄кхам̣ саттӣхи, на̄сса иччха̄ми джӣвитам̣.

80. кхаматасса маха̄ра̄джа, па̄н̣а̄ на пат̣иа̄найа̄ [дуппат̣иа̄найа̄ (сӣ. сйа̄. пӣ.)];

кхама дева асаппурисасса, на̄сса иччха̄махам̣ вадхам̣.

81. нигродхамева севеййа, на са̄кхамупасам̣васе;

нигродхасмим̣ матам̣ сеййо, йан̃че са̄кхасми джӣвитанти.

нигродхаджа̄такам̣ саттамам̣.