441. чатупосатхийаджа̄такам̣ (3)

24. йо копанеййе на кароти копам̣, на куджджхати саппурисо када̄чи;

куддхопи со на̄викароти копам̣, там̣ ве нарам̣ саман̣ама̄ху [саман̣ам̣ а̄ху (сӣ.)] локе.

25. ӯнӯдаро йо сахате джигхаччхам̣, данто тапассӣ митапа̄набходжано;

а̄ха̄рахету на кароти па̄пам̣, там̣ ве нарам̣ саман̣ама̄ху локе.

26. кхид̣д̣ам̣ ратим̣ виппаджахитва̄на саббам̣, на ча̄ликам̣ бха̄саси кин̃чи локе;

вибхӯсат̣т̣ха̄на̄ вирато метхунасма̄, там̣ ве нарам̣ саман̣ама̄ху локе.

27. париггахам̣ лобхадхамман̃ча саббам̣, йо ве парин̃н̃а̄йа париччаджети;

дантам̣ т̣хитаттам̣ амамам̣ нира̄сам̣, там̣ ве нарам̣ саман̣ама̄ху локе.

28. пуччха̄ма катта̄раманомапан̃н̃ам̣ [маномапан̃н̃а (сйа̄. ка.)], катха̄су но виггахо аттхи джа̄то;

чхиндаджджа кан̇кхам̣ вичикиччхита̄ни, тададжджа [тайа̄джджа (сӣ.)] кан̇кхам̣ витарему саббе.

29. йе пан̣д̣ита̄ аттхадаса̄ бхаванти, бха̄санти те йонисо таттха ка̄ле;

катхам̣ ну катха̄нам̣ абха̄сита̄нам̣, аттхам̣ найеййум̣ кусала̄ джанинда̄.

30. катхам̣ хаве бха̄сати на̄гара̄джа̄, гарул̣о пана венатеййо кима̄ха;

гандхаббара̄джа̄ пана ким̣ вадеси, катхам̣ пана курӯнам̣ ра̄джасет̣т̣хо.

31. кхантим̣ хаве бха̄сати на̄гара̄джа̄, аппа̄ха̄рам̣ гарул̣о венатеййо;

гандхаббара̄джа̄ ративиппаха̄нам̣, акин̃чанам̣ курӯнам̣ ра̄джасет̣т̣хо.

32. сабба̄ни ета̄ни субха̄сита̄ни, на хеттха дуббха̄ситаматтхи кин̃чи;

йасмин̃ча ета̄ни патит̣т̣хита̄ни, ара̄ва на̄бхйа̄ сусамохита̄ни;

чатуббхи дхаммехи саман̇гибхӯтам̣, там̣ ве нарам̣ саман̣ама̄ху локе.

33. туван̃хи [тувам̣ ну (сӣ. пӣ.)] сет̣т̣хо твамануттароси, твам̣ дхаммагӯ дхаммавидӯ сумедхо;

пан̃н̃а̄йа пан̃хам̣ самадхиггахетва̄, аччхеччхи дхӣро вичикиччхита̄ни;

аччхеччхи кан̇кхам̣ вичикиччхита̄ни, чундо йатха̄ на̄гадантам̣ кхарена.

34. нӣлуппала̄бхам̣ вималам̣ анаггхам̣, ваттхам̣ идам̣ дхӯмасама̄наван̣н̣ам̣;

пан̃хасса веййа̄каран̣ена тут̣т̣хо, дада̄ми те дхаммапӯджа̄йа дхӣра.

35. суван̣н̣ама̄лам̣ сатапаттапхуллитам̣, сакесарам̣ ратнасахассаман̣д̣итам̣;

пан̃хасса веййа̄каран̣ена тут̣т̣хо, дада̄ми те дхаммапӯджа̄йа дхӣра.

36. ман̣им̣ анаггхам̣ ручирам̣ пабхассарам̣, кан̣т̣ха̄васаттам̣ [васитам̣ (ка.)] ман̣ибхӯситам̣ ме;

пан̃хасса веййа̄каран̣ена тут̣т̣хо, дада̄ми те дхаммапӯджа̄йа дхӣра.

37. гавам̣ сахассам̣ усабхан̃ча на̄гам̣, а̄джан̃н̃айутте ча ратхе даса име;

пан̃хасса веййа̄каран̣ена тут̣т̣хо, дада̄ми те га̄мавара̄ни сол̣аса.

38. са̄рипутто тада̄ на̄го, супан̣н̣о пана колито;

гандхаббара̄джа̄ ануруддхо, ра̄джа̄ а̄нанда пан̣д̣ито;

видхуро бодхисатто ча, евам̣ дха̄ретха джа̄таканти.

чатупосатхийаджа̄такам̣ татийам̣.