439. чатудва̄раджа̄такам̣ (1)

1. чатудва̄рамидам̣ нагарам̣, а̄йасам̣ дал̣хапа̄ка̄рам̣;

оруддхапат̣ируддхосми, ким̣ па̄пам̣ пакатам̣ майа̄.

2. саббе апихита̄ два̄ра̄, оруддхосми йатха̄ диджо;

кима̄дхикаран̣ам̣ йаккха, чакка̄бхинихато ахам̣.

3. ладдха̄ сатасахасса̄ни, атирека̄ни вӣсати;

анукампака̄нам̣ н̃а̄тӣнам̣, вачанам̣ самма на̄кари.

4. лан̇гхим̣ самуддам̣ паккханди, са̄гарам̣ аппасиддхикам̣;

чатуббхи ат̣т̣хаджджхагама̄, ат̣т̣ха̄хипи ча сол̣аса.

5. сол̣аса̄хи ча ба̄ттим̣са, атриччхам̣ чаккама̄садо;

иччха̄хатасса посасса, чаккам̣ бхамати маттхаке.

6. упаривиса̄ла̄ дуппӯра̄, иччха̄ висат̣ага̄минӣ [висат̣ага̄миним̣ (пӣ. ка.)];

йе ча там̣ анугиджджханти, те хонти чаккадха̄рино.

7. бахубхан̣д̣ам̣ [бахум̣ бхан̣д̣ам̣ (сӣ. пӣ.)] аваха̄йа, маггам̣ аппат̣ивеккхийа;

йесан̃четам̣ асан̇кха̄там̣, те хонти чаккадха̄рино.

8. каммам̣ самеккхе випулан̃ча бхогам̣, иччхам̣ на севеййа анаттхасам̣хитам̣;

кареййа ва̄кйам̣ анукампака̄нам̣, там̣ та̄дисам̣ на̄тиваттеййа чаккам̣.

9. кӣвачирам̣ ну ме йаккха, чаккам̣ сираси т̣хассати;

кати вассасахасса̄ни, там̣ ме аккха̄хи пуччхито.

10. атисаро паччасаро [аччасаро (сӣ. сйа̄. пӣ.)], миттавинда сун̣охи ме;

чаккам̣ те сираси [сирасми (сйа̄.)] ма̄виддхам̣, на там̣ джӣвам̣ памоккхасӣти.

чатудва̄раджа̄такам̣ пат̣хамам̣.