10. литтавагго

91. литтам̣ парамена теджаса̄, гиламаккхам̣ пурисо на буджджхати;

гила ре гила па̄падхуттака, паччха̄ те кат̣укам̣ бхависсатӣти.

литтаджа̄такам̣ пат̣хамам̣.

92. уккат̣т̣хе сӯрамиччханти, мантӣсу акутӯхалам̣;

пийан̃ча аннапа̄намхи, аттхе джа̄те ча пан̣д̣итанти.

маха̄са̄раджа̄такам̣ дутийам̣.

93. на виссасе ависсаттхе, виссаттхепи на виссасе;

висса̄са̄ бхайаманвети, сӣхам̣ва мигама̄тука̄ти [мигама̄туйа̄ (ка.)].

виса̄сабходжанаджа̄такам̣ татийам̣.

94. сотатто сосиндо [сосӣто (сӣ. сйа̄. пӣ.), сосино (ка.)] чева, еко бхим̣санаке ване;

нагго на чаггима̄сӣно, есана̄пасуто мунӣти.

ломахам̣саджа̄такам̣ чатуттхам̣.

95. аничча̄ вата сан̇кха̄ра̄, уппа̄давайадхаммино;

уппаджджитва̄ нируджджханти, тесам̣ вӯпасамо сукхоти.

маха̄судассанаджа̄такам̣ пан̃чамам̣.

96. саматиттикам̣ анавасекам̣, телапаттам̣ йатха̄ парихареййа;

евам̣ сачиттаманураккхе, паттхайа̄но дисам̣ агатапуббанти.

телапаттаджа̄такам̣ чхат̣т̣хам̣.

97. джӣвакан̃ча матам̣ дисва̄, дханапа̄лин̃ча дуггатам̣;

пантхакан̃ча ване мӯл̣хам̣, па̄пако пунара̄гатоти.

на̄масиддхиджа̄такам̣ саттамам̣.

98. са̄дху кхо пан̣д̣ито на̄ма, на твева атипан̣д̣ито;

атипан̣д̣итена путтена, манамхи упакӯл̣итоти [упакӯлитоти (сӣ.), упакут̣т̣хитоти (сйа̄.), упакут̣ито (ка.)].

кӯт̣ава̄н̣иджаджа̄такам̣ ат̣т̣хамам̣.

99. паросахассампи сама̄гата̄нам̣, кандеййум̣ те вассасатам̣ апан̃н̃а̄;

екова сеййо пурисо сапан̃н̃о, йо бха̄ситасса виджа̄на̄ти аттханти.

паросахассаджа̄такам̣ навамам̣.

100. аса̄там̣ са̄тарӯпена, пийарӯпена аппийам̣;

дуккхам̣ сукхасса рӯпена, паматтамативаттатӣти.

аса̄тарӯпаджа̄такам̣ дасамам̣.

литтавагго дасамо.

тассудда̄нам̣ –

гиламаккхакутӯхала ма̄тукасса̄, мунина̄ ча аниччата паттаварам̣;

дханапа̄ливаро атипан̣д̣итако, сапаросахассааса̄тадаса̄ти.

маджджхимо пан̣н̣а̄сако.