2. сулабхасуттам̣

101. вуттан̃хетам̣ бхагавата̄, вуттамарахата̄ти ме сутам̣ –

‘‘чатта̄рима̄ни, бхиккхаве, аппа̄ни чева сулабха̄ни ча, та̄ни ча анаваджджа̄ни. катама̄ни чатта̄ри? пам̣сукӯлам̣, бхиккхаве, чӣвара̄нам̣ аппан̃ча сулабхан̃ча, тан̃ча анаваджджам̣. пин̣д̣ийа̄лопо, бхиккхаве, бходжана̄нам̣ аппан̃ча сулабхан̃ча, тан̃ча анаваджджам̣. руккхамӯлам̣, бхиккхаве, сена̄сана̄нам̣ аппан̃ча сулабхан̃ча, тан̃ча анаваджджам̣. пӯтимуттам̣, бхиккхаве, бхесаджджа̄нам̣ аппан̃ча сулабхан̃ча тан̃ча анаваджджам̣. има̄ни кхо, бхиккхаве, чатта̄ри аппа̄ни чева сулабха̄ни ча, та̄ни ча анаваджджа̄ни. йато кхо, бхиккхаве, бхиккху аппена ча тут̣т̣хо хоти сулабхена ча (анаваджджена ча) [(…) наттхи сӣ. пӣ. ка. поттхакесу ча ан̇гуттаре ча], имасса̄хам̣ ан̃н̃атарам̣ са̄ман̃н̃ан̇ганти вада̄мӣ’’ти. етаматтхам̣ бхагава̄ авоча. таттхетам̣ ити вуччати –

‘‘анаваджджена тут̣т̣хасса, аппена сулабхена ча;

на сена̄санама̄раббха, чӣварам̣ па̄набходжанам̣;

вигха̄то хоти читтасса, диса̄ наппат̣ихан̃н̃ати.

‘‘йе часса [йепасса (сйа̄.)] дхамма̄ аккха̄та̄, са̄ман̃н̃асса̄нуломика̄;

адхиггахита̄ тут̣т̣хасса, аппаматтасса бхиккхуно’’ти [сиккхатоти (сӣ. ка.)].

айампи аттхо вутто бхагавата̄, ити ме сутанти. дутийам̣.