13. локасуттам̣

112. вуттан̃хетам̣ бхагавата̄, вуттамарахата̄ти ме сутам̣ –

‘‘локо, бхиккхаве, татха̄гатена абхисамбуддхоः локасма̄ татха̄гато висам̣йутто. локасамудайо, бхиккхаве, татха̄гатена абхисамбуддхо ः локасамудайо татха̄гатасса пахӣно. локаниродхо, бхиккхаве, татха̄гатена абхисамбуддхоः локаниродхо татха̄гатасса саччхикато. локаниродхага̄минӣ пат̣ипада̄, бхиккхаве, татха̄гатена абхисамбуддха̄ः локаниродхага̄минӣ пат̣ипада̄ татха̄гатасса бха̄вита̄.

‘‘йам̣, бхиккхаве, садевакасса локасса сама̄ракасса сабрахмакасса сассаман̣абра̄хман̣ийа̄ паджа̄йа садеваманусса̄йа дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄ йасма̄ там̣ татха̄гатена абхисамбуддхам̣, тасма̄ татха̄гатоти вуччати.

‘‘йан̃ча, бхиккхаве, раттим̣ татха̄гато ануттарам̣ самма̄самбодхим̣ абхисамбуджджхати, йан̃ча раттим̣ анупа̄дисеса̄йа нибба̄надха̄туйа̄ паринибба̄йати, йам̣ етасмим̣ антаре бха̄сати лапати ниддисати, саббам̣ там̣ татхева хоти но ан̃н̃атха̄, тасма̄ татха̄гатоти вуччати.

‘‘йатха̄ва̄дӣ, бхиккхаве, татха̄гато татха̄ка̄рӣ, йатха̄ка̄рӣ татха̄ва̄дӣ, ити йатха̄ва̄дӣ татха̄ка̄рӣ йатха̄ка̄рӣ татха̄ва̄дӣ, тасма̄ татха̄гатоти вуччати.

‘‘садеваке, бхиккхаве, локе сама̄раке сабрахмаке сассаман̣абра̄хман̣ийа̄ паджа̄йа садеваманусса̄йа татха̄гато абхибхӯ анабхибхӯто ан̃н̃адаттхудасо васаваттӣ, тасма̄ татха̄гатоти вуччатӣ’’ти. етаматтхам̣ бхагава̄ авоча. таттхетам̣ ити вуччати –

‘‘саббалокам̣ [саббам̣ локам̣ (а. ни. 4.23)] абхин̃н̃а̄йа, саббалоке йатха̄татхам̣;

саббалокависам̣йутто, саббалоке анӯпайо [анусайо (сӣ.), анупайо (сйа̄.)].

‘‘са ве [саббе (саббаттха) а. ни. 4.23 пасситаббам̣] сабба̄бхибхӯ дхӣро, саббагантхаппамочано;

пхут̣т̣ха̄сса парама̄ санти, нибба̄нам̣ акутобхайам̣.

‘‘еса кхӣн̣а̄саво буддхо, анӣгхо чхиннасам̣сайо;

саббакаммаккхайам̣ патто, вимутто упадхисан̇кхайе.

‘‘еса со бхагава̄ буддхо, еса сӣхо ануттаро;

садевакасса локасса, брахмачаккам̣ паваттайи.

‘‘ити дева̄ манусса̄ ча, йе буддхам̣ саран̣ам̣ гата̄;

сан̇гамма там̣ намассанти, махантам̣ вӣтаса̄радам̣.

‘‘данто дамайатам̣ сет̣т̣хо, санто самайатам̣ иси;

мутто мочайатам̣ агго, тин̣н̣о та̄райатам̣ варо.

‘‘ити хетам̣ намассанти, махантам̣ вӣтаса̄радам̣;

садевакасмим̣ локасмим̣, наттхи те пат̣ипуггало’’ти.

айампи аттхо вутто бхагавата̄, ити ме сутанти. терасамам̣.

чатукканипа̄то нит̣т̣хито.