1. йамакавагго

1. манопуббан̇гама̄ дхамма̄, маносет̣т̣ха̄ маномайа̄;

манаса̄ че падут̣т̣хена, бха̄сати ва̄ кароти ва̄;

тато нам̣ дуккхаманвети, чаккам̣ва вахато падам̣.

2. манопуббан̇гама̄ дхамма̄, маносет̣т̣ха̄ маномайа̄;

манаса̄ че пасаннена, бха̄сати ва̄ кароти ва̄;

тато нам̣ сукхаманвети, чха̄йа̄ва анапа̄йинӣ [анупа̄йинӣ (ка.)].

3. аккоччхи мам̣ авадхи мам̣, аджини [аджинӣ (?)] мам̣ аха̄си ме;

йе ча там̣ упанайханти, верам̣ тесам̣ на саммати.

4. аккоччхи мам̣ авадхи мам̣, аджини мам̣ аха̄си ме;

йе ча там̣ нупанайханти, верам̣ тесӯпасаммати.

5. на хи верена вера̄ни, саммантӣдха куда̄чанам̣;

аверена ча самманти, еса дхаммо санантано.

6. паре ча на виджа̄нанти, майаметтха йама̄масе;

йе ча таттха виджа̄нанти, тато самманти медхага̄.

7. субха̄нупассим̣ вихарантам̣, индрийесу асам̣вутам̣;

бходжанамхи ча̄маттан̃н̃ум̣, кусӣтам̣ хӣнавӣрийам̣;

там̣ ве пасахати ма̄ро, ва̄то руккхам̣ва дуббалам̣.

8. асубха̄нупассим̣ вихарантам̣, индрийесу сусам̣вутам̣;

бходжанамхи ча маттан̃н̃ум̣, саддхам̣ а̄раддхавӣрийам̣;

там̣ ве наппасахати ма̄ро, ва̄то селам̣ва паббатам̣.

9. аниккаса̄во ка̄са̄вам̣, йо ваттхам̣ паридахиссати;

апето дамасаччена, на со ка̄са̄вамарахати.

10. йо ча вантакаса̄васса, сӣлесу сусама̄хито;

упето дамасаччена, са ве ка̄са̄вамарахати.

11. аса̄ре са̄раматино, са̄ре ча̄са̄радассино;

те са̄рам̣ на̄дхигаччханти, миччха̄сан̇каппагочара̄.

12. са̄ран̃ча са̄рато н̃атва̄, аса̄ран̃ча аса̄рато;

те са̄рам̣ адхигаччханти, самма̄сан̇каппагочара̄.

13. йатха̄ ага̄рам̣ дуччханнам̣, вут̣т̣хӣ самативиджджхати;

евам̣ абха̄витам̣ читтам̣, ра̄го самативиджджхати.

14. йатха̄ ага̄рам̣ сучханнам̣, вут̣т̣хӣ на самативиджджхати;

евам̣ субха̄витам̣ читтам̣, ра̄го на самативиджджхати.

15. идха сочати печча сочати, па̄пака̄рӣ убхайаттха сочати;

со сочати со вихан̃н̃ати, дисва̄ каммакилит̣т̣хаматтано.

16. идха модати печча модати, катапун̃н̃о убхайаттха модати;

со модати со памодати, дисва̄ каммависуддхиматтано.

17. идха таппати печча таппати, па̄пака̄рӣ [па̄пака̄ри (?)] убхайаттха таппати;

‘‘па̄пам̣ ме ката’’нти таппати, бхиййо [бхӣйо (сӣ.)] таппати дуггатим̣ гато.

18. идха нандати печча нандати, катапун̃н̃о убхайаттха нандати;

‘‘пун̃н̃ам̣ ме ката’’нти нандати, бхиййо нандати суггатим̣ гато.

19. бахумпи че сам̣хита [сахитам̣ (сӣ. сйа̄. кам̣. пӣ.)] бха̄сама̄но, на таккаро хоти наро паматто;

гопова га̄во ган̣айам̣ паресам̣, на бха̄гава̄ са̄ман̃н̃асса хоти.

20. аппампи че сам̣хита бха̄сама̄но, дхаммасса хоти [хотӣ (сӣ. пӣ.)] анудхаммача̄рӣ;

ра̄ган̃ча досан̃ча паха̄йа мохам̣, саммаппаджа̄но сувимуттачитто;

анупа̄дийа̄но идха ва̄ хурам̣ ва̄, са бха̄гава̄ са̄ман̃н̃асса хоти.

йамакавагго пат̣хамо нит̣т̣хито.