8. амбада̄йакаттхераапада̄нам̣

53. ‘‘аномадассӣ бхагава̄, нисинно паббатантаре;

метта̄йа апхари локе, аппама̄н̣е нирӯпадхи.

54. ‘‘капи ахам̣ тада̄ а̄сим̣, химаванте нагуттаме;

дисва̄ аномадассим̣ там̣ [аномам̣ амитам̣ (сӣ.), аномамадхитам̣ (сйа̄.)], буддхе читтам̣ паса̄дайим̣.

55. ‘‘авидӯре химавантасса, амба̄сум̣ пхалино тада̄;

тато паккам̣ гахетва̄на, амбам̣ самадхукам̣ адам̣.

56. ‘‘там̣ ме буддхо вийа̄ка̄си, аномадассӣ маха̄муни;

имина̄ мадхуда̄нена, амбада̄нена чӯбхайам̣.

57. ‘‘саттапан̃н̃а̄сакаппамхи, девалоке рамиссати;

авасесесу каппесу, вокин̣н̣ам̣ сам̣сариссати.

58. ‘‘кхепетва̄ па̄пакам̣ каммам̣, парипакка̄йа буддхийа̄;

винипа̄тамагантва̄на, килесе джха̄пайиссати.

59. ‘‘дамена уттамена̄хам̣, дамитомхи махесина̄;

паттомхи ачалам̣ т̣ха̄нам̣, хитва̄ джайапара̄джайам̣.

60. ‘‘саттасаттатикаппасате, амбат̣т̣хаджасана̄мака̄;

чатуддаса те ра̄джа̄но, чаккаваттӣ махаббала̄.

61. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ амбада̄йако тхеро има̄ га̄тха̄йо абха̄ситтха̄ти.

амбада̄йакаттхерасса̄пада̄нам̣ ат̣т̣хамам̣.