4. ка̄л̣уда̄йиттхераапада̄нам̣

48. ‘‘падумуттарабуддхасса, локаджет̣т̣хасса та̄дино;

аддха̄нам̣ пат̣ипаннасса, чарато ча̄рикам̣ тада̄.

49. ‘‘супхуллам̣ падумам̣ гайха, уппалам̣ малликан̃чахам̣;

параманнам̣ гахетва̄на, ада̄сим̣ саттхуно ахам̣.

50. ‘‘парибхун̃джи маха̄вӣро, параманнам̣ субходжанам̣;

тан̃ча пуппхам̣ гахетва̄на, джанасса сампадассайи.

51. ‘‘ит̣т̣хам̣ кантам̣ [кантайидам̣ (сйа̄.)], пийам̣ локе, джаладжам̣ пуппхамуттамам̣;

судуккарам̣ катам̣ тена, йо ме пуппхам̣ ада̄сидам̣.

52. ‘‘йо пуппхамабхиропеси, параманнан̃чада̄си ме;

тамахам̣ киттайисса̄ми, сун̣а̄тха мама бха̄сато.

53. ‘‘‘даса ат̣т̣ха чаккхаттум̣ [даса чат̣т̣хаккхаттум̣ (сӣ.), дасамат̣т̣хаккхаттум̣ (сйа̄.)] со, девараджджам̣ кариссати;

уппалам̣ падуман̃ча̄пи, малликан̃ча тадуттари.

54. ‘‘‘асса пун̃н̃авипа̄кена, диббагандхасама̄йутам̣;

а̄ка̄се чхаданам̣ катва̄, дха̄райиссати та̄ваде.

55. ‘‘‘пан̃чавӣсатиккхаттун̃ча, чаккаваттӣ бхависсати;

патхабйа̄ раджджам̣ пан̃часатам̣, васудхам̣ а̄васиссати.

56. ‘‘‘каппасатасахассамхи, окка̄какуласамбхаво;

готамо на̄ма готтена [на̄мена (сӣ. сйа̄. ка.)], саттха̄ локе бхависсати.

57. ‘‘‘сакакамма̄бхираддхо со, суккамӯлена чодито;

сакйа̄нам̣ нандиджанано, н̃а̄тибандху бхависсати.

58. ‘‘‘со паччха̄ паббаджитва̄на, суккамӯлена чодито;

сабба̄саве парин̃н̃а̄йа, нибба̄йиссатина̄саво.

59. ‘‘‘пат̣исамбхидамануппаттам̣, катакиччамана̄савам̣;

готамо локабандху там̣ [со (сӣ.)], етадагге т̣хапессати.

60. ‘‘‘падха̄напахитатто со, упасанто нирӯпадхи;

уда̄йӣ на̄ма на̄мена, хессати саттху са̄вако’.

61. ‘‘ра̄го досо ча мохо ча, ма̄но маккхо ча дхам̣сито;

сабба̄саве парин̃н̃а̄йа, вихара̄ми ана̄саво.

62. ‘‘тосайин̃ча̄пи самбуддхам̣, а̄та̄пӣ нипако ахам̣;

паса̄дито [памодито (сӣ.)] ча самбуддхо, етадагге т̣хапеси мам̣.

63. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ ка̄л̣уда̄йӣ тхеро има̄ га̄тха̄йо абха̄ситтха̄ти;

ка̄л̣уда̄йӣтхерасса̄пада̄нам̣ чатуттхам̣.