8. пан̣н̣ада̄йакаттхераапада̄нам̣

28. ‘‘паббате химавантамхи, ва̄качӣрадхаро ахам̣;

алон̣апан̣н̣абхаккхомхи, нийамесу ча сам̣вуто.

29. ‘‘па̄тара̄се ануппатте, сиддхаттхо упагаччхи мам̣;

та̄хам̣ буддхасса па̄да̄сим̣, пасанно сехи па̄н̣ибхи.

30. ‘‘чатуннавутито каппе, йам̣ пан̣н̣амададим̣ тада̄;

дуггатим̣ на̄бхиджа̄на̄ми, пан̣н̣ада̄нассидам̣ пхалам̣.

31. ‘‘саттавӣсатикаппамхи, ра̄джа̄ а̄сим̣ садаттхийо [йадаттхийо (сӣ. сйа̄.)];

саттаратанасампанно, чаккаваттӣ махаббало.

32. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ пан̣н̣ада̄йако тхеро има̄ га̄тха̄йо абха̄ситтха̄ти.

пан̣н̣ада̄йакаттхерасса̄пада̄нам̣ ат̣т̣хамам̣.