4. чӯл̣апантхакаттхераапада̄нам̣

35. ‘‘падумуттаро на̄ма джино, а̄хутӣнам̣ пат̣иггахо;

ган̣амха̄ вӯпакат̣т̣хо со, химаванте васӣ тада̄.

36. ‘‘ахампи химавантамхи, васа̄ми ассаме тада̄;

ачира̄гатам̣ маха̄вӣрам̣, упесим̣ локана̄йакам̣.

37. ‘‘пуппхаччхаттам̣ гахетва̄на, упагаччхим̣ нара̄сабхам̣;

сама̄дхим̣ сама̄паджджантам̣, антара̄йамака̄сахам̣.

38. ‘‘убхо хаттхехи паггайха, пуппхаччхаттам̣ ада̄сахам̣;

пат̣иггахеси бхагава̄, падумуттаро маха̄муни.

39. ‘‘саббе дева̄ аттамана̄, химавантам̣ упенти те;

са̄дхука̄рам̣ паваттесум̣, анумодиссати чаккхума̄.

40. ‘‘идам̣ ватва̄на те дева̄, упагаччхум̣ наруттамам̣;

а̄ка̄се дха̄райантасса [дха̄райантам̣ ме (ка), дха̄райато ме (?)], падумаччхаттамуттамам̣.

41. ‘‘сатапаттачхаттам̣ паггайха, ада̄си та̄пасо мама;

‘тамахам̣ киттайисса̄ми, сун̣а̄тха мама бха̄сато.

42. ‘‘‘пан̃чавӣсатикаппа̄ни, девараджджам̣ кариссати;

чатуттим̣сатиккхаттун̃ча, чаккаваттӣ бхависсати.

43. ‘‘‘йам̣ йам̣ йоним̣ сам̣сарати, деваттам̣ атха ма̄нусам̣;

аббхока̄се патит̣т̣хантам̣, падумам̣ дха̄райиссати’.

44. ‘‘каппасатасахассамхи, окка̄какуласамбхаво;

готамо на̄ма готтена [на̄мена (сӣ. ка.)], саттха̄ локе бхависсати.

45. ‘‘‘пака̄сите па̄вачане, мануссаттам̣ лабхиссати;

маномайамхи ка̄йамхи, уттамо со бхависсати.

46. ‘‘‘две бха̄таро бхависсанти, убхопи пантхакавхайа̄;

анубхотва̄ уттаматтхам̣, джотайиссанти са̄санам̣’.

47. ‘‘сохам̣ ат̣т̣ха̄расавассо [со ат̣т̣ха̄расавассохам̣ (сйа̄.)], паббаджим̣ анага̄рийам̣;

висеса̄хам̣ на винда̄ми, сакйапуттасса са̄сане.

48. ‘‘дандха̄ майхам̣ гатӣ а̄си, парибхӯто пуре ахум̣ [ахам̣ (сйа̄.)];

бха̄та̄ ча мам̣ пан̣а̄меси, гаччха да̄ни сакам̣ гхарам̣.

49. ‘‘сохам̣ пан̣а̄мито санто, сан̇гха̄ра̄масса кот̣т̣хаке;

думмано таттха ат̣т̣ха̄сим̣, са̄ман̃н̃асмим̣ апеккхава̄.

50. ‘‘бхагава̄ таттха [атхеттха саттха̄ (сӣ. сйа̄.)] а̄гаччхи, сӣсам̣ майхам̣ пара̄маси;

ба̄ха̄йа мам̣ гахетва̄на, сан̇гха̄ра̄мам̣ павесайи.

51. ‘‘анукампа̄йа ме саттха̄, ада̄си па̄дапун̃чханим̣;

евам̣ суддхам̣ адхит̣т̣хехи, екамантамадхит̣т̣хахам̣.

52. ‘‘хаттхехи тамахам̣ гайха, сарим̣ коканадам̣ ахам̣;

таттха читтам̣ вимуччи ме, арахаттам̣ апа̄пун̣им̣.

53. ‘‘маномайесу ка̄йесу, саббаттха па̄рамим̣ гато;

сабба̄саве парин̃н̃а̄йа, вихара̄ми ана̄саво.

54. ‘‘пат̣исамбхида̄ чатассо, вимоккха̄пи ча ат̣т̣химе;

чхал̣абхин̃н̃а̄ саччхиката̄, катам̣ буддхасса са̄санам̣’’.

иттхам̣ судам̣ а̄йасма̄ чӯл̣апантхако [чуллапантхако (сӣ. сйа̄.)] тхеро има̄ га̄тха̄йо абха̄ситтха̄ти.

чӯл̣апантхакаттхерасса̄пада̄нам̣ чатуттхам̣.