2. екаттхамбхикаттхераапада̄нам̣

13. ‘‘сиддхаттхасса бхагавато, маха̄пӯгаган̣о аху;

саран̣ам̣ гата̄ ча те буддхам̣, саддаханти татха̄гатам̣.

14. ‘‘саббе сан̇гамма мантетва̄, ма̄л̣ам̣ куббанти саттхуно;

екаттхамбхам̣ алабханта̄, вичинанти браха̄ване.

15. ‘‘техам̣ аран̃н̃е дисва̄на, упагамма ган̣ам̣ тада̄;

ан̃джалим̣ паггахетва̄на, парипуччхим̣ ган̣ам̣ ахам̣.

16. ‘‘те ме пут̣т̣ха̄ вийа̄кам̣су, сӣлаванто упа̄сака̄;

ма̄л̣ам̣ майам̣ каттука̄ма̄, екаттхамбхо на лаббхати.

17. ‘‘екаттхамбхам̣ мамам̣ детха, ахам̣ дасса̄ми саттхуно;

а̄харисса̄махам̣ тхамбхам̣, аппоссукка̄ бхаванту те [бхаванту во (сӣ.), бхава̄тха во (?)].

18. ‘‘те ме тхамбхам̣ павеччхим̣су, пасанна̄ тут̣т̣хама̄наса̄;

тато пат̣иниваттитва̄, агамам̣су сакам̣ гхарам̣.

19. ‘‘ачирам̣ гате пӯгаган̣е, тхамбхам̣ аха̄сахам̣ тада̄;

хат̣т̣хо хат̣т̣хена читтена, пат̣хамам̣ уссапесахам̣.

20. ‘‘тена читтаппаса̄дена, вима̄нам̣ упападжджахам̣;

уббиддхам̣ бхаванам̣ майхам̣, саттабхӯмам̣ [сатабхӯмам̣ (сӣ. ка.)] самуггатам̣.

21. ‘‘ваджджама̄на̄су бхерӣсу, парича̄ремахам̣ сада̄;

пан̃чапан̃н̃а̄сакаппамхи, ра̄джа̄ а̄сим̣ йасодхаро.

22. ‘‘таттха̄пи бхаванам̣ майхам̣, саттабхӯмам̣ самуггатам̣;

кӯт̣а̄га̄раварӯпетам̣, екаттхамбхам̣ манорамам̣.

23. ‘‘екавӣсатикаппамхи, удено на̄ма кхаттийо;

татра̄пи бхаванам̣ майхам̣, саттабхӯмам̣ самуггатам̣.

24. ‘‘йам̣ йам̣ йонупападжджа̄ми, деваттам̣ атха ма̄нусам̣;

анубхоми сукхам̣ саббам̣ [саббаметам̣ (сйа̄.)], екаттхамбхассидам̣ пхалам̣.

25. ‘‘чатуннавутито каппе, йам̣ тхамбхамададам̣ тада̄;

дуггатим̣ на̄бхиджа̄на̄ми, екаттхамбхассидам̣ пхалам̣.

26. ‘‘пат̣исамбхида̄ чатассо, вимоккха̄пи ча ат̣т̣химе;

чхал̣абхин̃н̃а̄ саччхиката̄, катам̣ буддхасса са̄санам̣’’.

иттхам̣ судам̣ а̄йасма̄ екаттхамбхико тхеро има̄ га̄тха̄йо абха̄ситтха̄ти.

екаттхамбхикаттхерасса̄пада̄нам̣ дутийам̣.