10. суман̇галаттхераапада̄нам̣

124. ‘‘а̄хутим̣ йит̣т̣хука̄мохам̣, пат̣ийа̄детва̄на бходжанам̣;

бра̄хман̣е пат̣има̄ненто, виса̄ле ма̄л̣аке т̣хито.

125. ‘‘атхаддаса̄сим̣ самбуддхам̣, пийадассим̣ маха̄йасам̣;

саббалокавинета̄рам̣, сайамбхум̣ аггапуггалам̣.

126. ‘‘бхагавантам̣ джутимантам̣, са̄вакехи пураккхатам̣;

а̄диччамива рочантам̣, ратхийам̣ пат̣ипаннакам̣.

127. ‘‘ан̃джалим̣ паггахетва̄на, сакам̣ читтам̣ паса̄дайим̣;

манаса̄ва нимантесим̣, ‘а̄гаччхату маха̄муни’.

128. ‘‘мама сан̇каппаман̃н̃а̄йа, саттха̄ локе ануттаро;

кхӣн̣а̄савасахассехи, мама два̄рам̣ упа̄гами.

129. ‘‘намо те пуриса̄джан̃н̃а, намо те пурисуттама;

па̄са̄дам̣ абхирӯхитва̄, сӣха̄сане нисӣдатам̣ [нисӣда твам̣ (сӣ.)].

130. ‘‘данто дантапарива̄ро, тин̣н̣о та̄райатам̣ варо;

па̄са̄дам̣ абхирӯхитва̄, нисӣди павара̄сане.

131. ‘‘йам̣ ме аттхи саке гехе, а̄мисам̣ паччупат̣т̣хитам̣;

та̄хам̣ буддхасса па̄да̄сим̣, пасанно сехи па̄н̣ибхи.

132. ‘‘пасанначитто сумано, ведаджа̄то катан̃джалӣ;

буддхасет̣т̣хам̣ намасса̄ми, ахо буддхассул̣а̄рата̄.

133. ‘‘ат̣т̣ханнам̣ пайирӯпа̄сатам̣, бхун̃джам̣ кхӣн̣а̄сава̄ бахӯ;

туйхевесо а̄нубха̄во, саран̣ам̣ там̣ упемахам̣.

134. ‘‘пийадассӣ ча бхагава̄, локаджет̣т̣хо нара̄сабхо;

бхиккхусан̇гхе нисӣдитва̄, има̄ га̄тха̄ абха̄сатха.

135. ‘‘‘йо со сан̇гхам̣ абходжеси, уджубхӯтам̣ сама̄хитам̣;

татха̄гатан̃ча самбуддхам̣, сун̣а̄тха мама бха̄сато.

136. ‘‘‘саттавӣсатиккхаттум̣ со, девараджджам̣ кариссати;

сакакамма̄бхираддхо со, девалоке рамиссати.

137. ‘‘‘даса ат̣т̣ха чаккхаттум̣ [дасан̃чат̣т̣хаккхаттхум̣ (сӣ.), даса чат̣т̣хаккхаттум̣ (сйа̄.)] со, чаккаваттӣ бхависсати;

патхабйа̄ раджджам̣ пан̃часатам̣, васудхам̣ а̄васиссати’.

138. ‘‘аран̃н̃аванамоггайха, ка̄нанам̣ бйаггхасевитам̣;

падха̄нам̣ падахитва̄на, килеса̄ джха̄пита̄ майа̄.

139. ‘‘ат̣т̣ха̄расе каппасате, йам̣ да̄намададим̣ тада̄;

дуггатим̣ на̄бхиджа̄на̄ми, бхаттада̄нассидам̣ пхалам̣.

140. ‘‘пат̣исамбхида̄ чатассо, вимоккха̄пи ча ат̣т̣химе;

чхал̣абхин̃н̃а̄ саччхиката̄, катам̣ буддхасса са̄санам̣’’.

иттхам̣ судам̣ а̄йасма̄ суман̇гало тхеро има̄ га̄тха̄йо абха̄ситтха̄ти.

суман̇галаттхерасса̄пада̄нам̣ дасамам̣.

тассудда̄нам̣ –

сӣха̄санӣ екатхамбхӣ, нандо ча чӯл̣апантхако;

пилиндара̄хуло чева, ван̇ганто рат̣т̣хапа̄лако.

сопа̄ко ман̇гало чева, дасева дутийе вагге;

сатан̃ча ат̣т̣хатим̣са ча, га̄тха̄ четтха пака̄сита̄.

сӣха̄санийавагго дутийо.