2. пуппхатхӯпийаттхераапада̄нам̣

10. ‘‘химавантасса̄видӯре, куккуро на̄ма [куккут̣о на̄ма (сӣ.)] паббато;

вемаджджхе тасса васати, бра̄хман̣о мантапа̄рагӯ.

11. ‘‘пан̃ча сиссасахасса̄ни, парива̄ренти мам̣ сада̄;

пуббут̣т̣ха̄йӣ ча те а̄сум̣, мантесу ча виса̄рада̄.

12. ‘‘буддхо локе самуппанно, там̣ виджа̄на̄тха но бхавам̣;

асӣтибйан̃джана̄насса, ба̄ттим̣саваралаккхан̣а̄.

13. ‘‘бйа̄маппабхо джинаваро, а̄диччова вирочати;

сисса̄нам̣ вачанам̣ сутва̄, бра̄хман̣о мантапа̄рагӯ.

14. ‘‘ассама̄ абхиниккхамма, дисам̣ пуччхати сиссаке [бра̄хман̣о (сйа̄.)];

йамхи десе маха̄вӣро, васати локана̄йако.

15. ‘‘та̄хам̣ дисам̣ намассиссам̣, джинам̣ аппат̣ипуггалам̣;

удаггачитто сумано, пӯджесим̣ там̣ татха̄гатам̣.

16. ‘‘етха сисса̄ гамисса̄ма, даккхисса̄ма татха̄гатам̣;

вандитва̄ саттхуно па̄де, сосса̄ма джинаса̄санам̣.

17. ‘‘ека̄хам̣ абхиниккхамма, бйа̄дхим̣ пат̣илабхим̣ ахам̣;

бйа̄дхина̄ пӣл̣ито санто, са̄лам̣ ва̄сайитум̣ гамим̣.

18. ‘‘саббе сиссе сама̄нетва̄, апуччхим̣ те татха̄гатам̣;

кӣдисам̣ локана̄тхасса, гун̣ам̣ парамабуддхино.

19. ‘‘те ме пут̣т̣ха̄ вийа̄кам̣су, йатха̄ дасса̄вино татха̄;

саккаччам̣ буддхасет̣т̣хам̣ там̣, десесум̣ [дассесум̣ (сӣ. сйа̄.)] мама саммукха̄.

20. ‘‘теса̄хам̣ вачанам̣ сутва̄, сакам̣ читтам̣ паса̄дайим̣;

пуппхехи тхӯпам̣ катва̄на, таттха ка̄лан̇като ахам̣.

21. ‘‘те ме сарӣрам̣ джха̄петва̄, агамум̣ буддхасантикам̣;

ан̃джалим̣ паггахетва̄на, саттха̄рамабхива̄дайум̣.

22. ‘‘пуппхехи тхӯпам̣ катва̄на, сугатасса махесино;

каппа̄нам̣ сатасахассам̣, дуггатим̣ нупападжджахам̣.

23. ‘‘чатта̄лӣсасахассамхи, каппе сол̣аса кхаттийа̄;

на̄менаггисама̄ на̄ма, чаккаваттӣ махаббала̄.

24. ‘‘вӣсакаппасахассамхи, ра̄джа̄но чаккаваттино;

гхата̄санасана̄ма̄ва, ат̣т̣хаттим̣са махӣпатӣ.

25. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ пуппхатхӯпийо тхеро има̄ га̄тха̄йо абха̄ситтха̄ти.

пуппхатхӯпийаттхерасса̄пада̄нам̣ дутийам̣.