(6) саттуссадата̄лаккхан̣ам̣

208. ‘‘йампи, бхиккхаве, татха̄гато пуримам̣ джа̄тим̣ пуримам̣ бхавам̣ пуримам̣ никетам̣ пуббе мануссабхӯто сама̄но да̄та̄ ахоси пан̣ӣта̄нам̣ расита̄нам̣ кха̄данӣйа̄нам̣ бходжанӣйа̄нам̣ са̄йанӣйа̄нам̣ леханӣйа̄нам̣ па̄на̄нам̣. со тасса каммасса кат̣атта̄…пе… со тато чуто иттхаттам̣ а̄гато сама̄но имам̣ маха̄пурисалаккхан̣ам̣ пат̣илабхати, саттуссадо хоти, саттасса уссада̄ хонти; убхосу хаттхесу уссада̄ хонти, убхосу па̄десу уссада̄ хонти, убхосу ам̣сакӯт̣есу уссада̄ хонти, кхандхе уссадо хоти.

‘‘со тена лаккхан̣ена саманна̄гато саче ага̄рам̣ аджджха̄васати, ра̄джа̄ хоти чаккаваттӣ…пе… ра̄джа̄ сама̄но ким̣ лабхати? ла̄бхӣ хоти пан̣ӣта̄нам̣ расита̄нам̣ кха̄данӣйа̄нам̣ бходжанӣйа̄нам̣ са̄йанӣйа̄нам̣ леханӣйа̄нам̣ па̄на̄нам̣. ра̄джа̄ сама̄но идам̣ лабхати… буддхо сама̄но ким̣ лабхати? ла̄бхӣ хоти пан̣ӣта̄нам̣ расита̄нам̣ кха̄данӣйа̄нам̣ бходжанӣйа̄нам̣ са̄йанӣйа̄нам̣ леханӣйа̄нам̣ па̄на̄нам̣. буддхо сама̄но идам̣ лабхати’’. етаматтхам̣ бхагава̄ авоча.

209. таттхетам̣ вуччати –

‘‘кхаджджабходжджаматха леййа са̄йийам̣,

уттамаггарасада̄йако аху;

тена со сучаритена каммуна̄,

нандане чирамабхиппамодати.

‘‘сатта чуссаде идха̄дхигаччхати,

хаттхапа̄дамудутан̃ча виндати;

а̄ху бйан̃джананимиттаковида̄,

кхаджджабходжджарасала̄бхита̄йа нам̣.

‘‘йам̣ гихиссапи [на там̣ гихисса̄пи (сйа̄.)] тадаттхаджотакам̣,

паббаджджампи ча тада̄дхигаччхати;

кхаджджабходжджарасала̄бхируттамам̣,

а̄ху саббагихибандханаччхида’’нти.