(17-19) сӣхапуббаддхака̄йа̄дитилаккхан̣ам̣

224. ‘‘йампи, бхиккхаве, татха̄гато пуримам̣ джа̄тим̣ пуримам̣ бхавам̣ пуримам̣ никетам̣ пуббе мануссабхӯто сама̄но бахуджанасса аттхака̄мо ахоси хитака̄мо пха̄сука̄мо йогаккхемака̄мо – ‘кинтиме саддха̄йа вад̣д̣хеййум̣, сӣлена вад̣д̣хеййум̣, сутена вад̣д̣хеййум̣ [сутена вад̣д̣хеййум̣, буддхийа̄ вад̣д̣хеййум̣ (сйа̄.)], ча̄гена вад̣д̣хеййум̣, дхаммена вад̣д̣хеййум̣, пан̃н̃а̄йа вад̣д̣хеййум̣, дханадхан̃н̃ена вад̣д̣хеййум̣, кхеттаваттхуна̄ вад̣д̣хеййум̣, двипадачатуппадехи вад̣д̣хеййум̣, путтада̄рехи вад̣д̣хеййум̣, да̄сакаммакарапорисехи вад̣д̣хеййум̣, н̃а̄тӣхи вад̣д̣хеййум̣, миттехи вад̣д̣хеййум̣, бандхавехи вад̣д̣хеййу’нти. со тасса каммасса кат̣атта̄…пе… со тато чуто иттхаттам̣ а̄гато сама̄но има̄ни тӣн̣и маха̄пурисалаккхан̣а̄ни пат̣илабхати. сӣхапуббаддхака̄йо ча хоти читантарам̣со ча самават̣т̣аккхандхо ча.

‘‘со техи лаккхан̣ехи саманна̄гато саче ага̄рам̣ аджджха̄васати, ра̄джа̄ хоти чаккаваттӣ…пе… ра̄джа̄ сама̄но ким̣ лабхати? апариха̄надхаммо хоти, на париха̄йати дханадхан̃н̃ена кхеттаваттхуна̄ двипадачатуппадехи путтада̄рехи да̄сакаммакарапорисехи н̃а̄тӣхи миттехи бандхавехи, на париха̄йати саббасампаттийа̄. ра̄джа̄ сама̄но идам̣ лабхати… буддхо сама̄но ким̣ лабхати? апариха̄надхаммо хоти, на париха̄йати саддха̄йа сӣлена сутена ча̄гена пан̃н̃а̄йа, на париха̄йати саббасампаттийа̄. буддхо сама̄но идам̣ лабхати’’. етаматтхам̣ бхагава̄ авоча.

225. таттхетам̣ вуччати –

‘‘саддха̄йа сӣлена сутена буддхийа̄,

ча̄гена дхаммена бахӯхи са̄дхухи;

дханена дхан̃н̃ена ча кхеттаваттхуна̄,

путтехи да̄рехи чатуппадехи ча.

‘‘н̃а̄тӣхи миттехи ча бандхавехи ча,

балена ван̣н̣ена сукхена чӯбхайам̣;

катхам̣ на ха̄йеййум̣ парети иччхати,

аттхасса миддхӣ ча [идам̣ самиддхан̃ча (ка.), аддхам̣ самиддхан̃ча (сйа̄.)] пана̄бхикан̇кхати.

‘‘са сӣхапуббаддхасусан̣т̣хито аху,

самават̣т̣аккхандхо ча читантарам̣со;

пуббе сучин̣н̣ена катена каммуна̄,

аха̄нийам̣ пуббанимиттамасса там̣.

‘‘гихӣпи дхан̃н̃ена дханена вад̣д̣хати,

путтехи да̄рехи чатуппадехи ча;

акин̃чано паббаджито ануттарам̣,

паппоти бодхим̣ асаха̄надхаммата’’нти [самбодхимаха̄надхамматанти (сйа̄. ка.) т̣ӣка̄ олокетабба̄].