(12) сукхумаччхавилаккхан̣ам̣

216. ‘‘йампи, бхиккхаве, татха̄гато пуримам̣ джа̄тим̣ пуримам̣ бхавам̣ пуримам̣ никетам̣ пуббе мануссабхӯто сама̄но саман̣ам̣ ва̄ бра̄хман̣ам̣ ва̄ упасан̇камитва̄ парипуччхита̄ ахоси – ‘‘ким̣, бханте, кусалам̣, ким̣ акусалам̣, ким̣ са̄ваджджам̣, ким̣ анаваджджам̣, ким̣ севитаббам̣, ким̣ на севитаббам̣, ким̣ ме карӣйама̄нам̣ дӣгхараттам̣ ахита̄йа дуккха̄йа асса, ким̣ ва̄ пана ме карӣйама̄нам̣ дӣгхараттам̣ хита̄йа сукха̄йа асса̄’’ти. со тасса каммасса кат̣атта̄…пе… со тато чуто иттхаттам̣ а̄гато сама̄но имам̣ маха̄пурисалаккхан̣ам̣ пат̣илабхати. сукхумаччхави хоти, сукхуматта̄ чхавийа̄ раджоджаллам̣ ка̄йе на упалимпати.

‘‘со тена лаккхан̣ена саманна̄гато саче ага̄рам̣ аджджха̄васати, ра̄джа̄ хоти чаккаваттӣ…пе… ра̄джа̄ сама̄но ким̣ лабхати? маха̄пан̃н̃о хоти, на̄сса хоти кочи пан̃н̃а̄йа садисо ва̄ сет̣т̣хо ва̄ ка̄мабхогӣнам̣. ра̄джа̄ сама̄но идам̣ лабхати… буддхо сама̄но ким̣ лабхати? маха̄пан̃н̃о хоти путхупан̃н̃о ха̄сапан̃н̃о [ха̄супан̃н̃о (сӣ. пӣ.)] джаванапан̃н̃о тиккхапан̃н̃о ниббедхикапан̃н̃о, на̄сса хоти кочи пан̃н̃а̄йа садисо ва̄ сет̣т̣хо ва̄ саббасатта̄нам̣. буддхо сама̄но идам̣ лабхати’’. етаматтхам̣ бхагава̄ авоча.

217. таттхетам̣ вуччати –

‘‘пуре пураттха̄ пурима̄су джа̄тису,

ан̃н̃а̄тука̄мо парипуччхита̄ аху;

суссӯсита̄ паббаджитам̣ упа̄сита̄,

аттхантаро аттхакатхам̣ ниса̄майи.

‘‘пан̃н̃а̄пат̣ила̄бхагатена [пан̃н̃а̄пат̣ила̄бхакатена (сӣ. пӣ.) т̣ӣка̄ олокетабба̄] каммуна̄,

мануссабхӯто сукхумаччхавӣ аху;

бйа̄кам̣су уппа̄данимиттаковида̄,

сукхума̄ни аттха̄ни авечча даккхити.

‘‘саче на паббаджджамупети та̄дисо,

ваттети чаккам̣ патхавим̣ паса̄сати;

аттха̄нусит̣т̣хӣсу париггахесу ча,

на тена сеййо садисо ча виджджати.

‘‘саче ча паббаджджамупети та̄дисо,

неккхаммачханда̄бхирато вичаккхан̣о;

пан̃н̃а̄висит̣т̣хам̣ лабхате ануттарам̣,

паппоти бодхим̣ варабхӯримедхасо’’ти.