7. джа̄лийасуттам̣

двепаббаджитаваттху

378. евам̣ ме сутам̣ – екам̣ самайам̣ бхагава̄ косамбийам̣ вихарати гхосита̄ра̄ме. тена кхо пана самайена две паббаджита̄ – мун̣д̣ийо ча парибба̄джако джа̄лийо ча да̄рупаттикантева̄сӣ йена бхагава̄ тенупасан̇камим̣су; упасан̇камитва̄ бхагавата̄ саддхим̣ саммодим̣су. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ ат̣т̣хам̣су. екамантам̣ т̣хита̄ кхо те две паббаджита̄ бхагавантам̣ етадавочум̣ – ‘‘ким̣ ну кхо, а̄вусо готама, там̣ джӣвам̣ там̣ сарӣрам̣, уда̄ху ан̃н̃ам̣ джӣвам̣ ан̃н̃ам̣ сарӣра’’нти?

379. ‘‘тена ха̄вусо, сун̣а̄тха са̄дхукам̣ манаси каротха; бха̄сисса̄мӣ’’ти. ‘‘евама̄вусо’’ти кхо те две паббаджита̄ бхагавато паччассосум̣. бхагава̄ етадавоча – ‘‘идха̄вусо, татха̄гато локе уппаджджати арахам̣, самма̄самбуддхо…пе… (йатха̄ 190-212 ануччхедесу евам̣ виттха̄ретаббам̣). евам̣ кхо, а̄вусо, бхиккху сӣласампанно хоти…пе… пат̣хамам̣ джха̄нам̣ упасампаджджа вихарати. йо кхо, а̄вусо, бхиккху евам̣ джа̄на̄ти евам̣ пассати, каллам̣ ну кхо тассетам̣ вачана̄йа – ‘там̣ джӣвам̣ там̣ сарӣра’нти ва̄ ‘ан̃н̃ам̣ джӣвам̣ ан̃н̃ам̣ сарӣра’нти ва̄ти. йо со, а̄вусо, бхиккху евам̣ джа̄на̄ти евам̣ пассати, каллам̣ тассетам̣ вачана̄йа – ‘там̣ джӣвам̣ там̣ сарӣра’нти ва̄ ‘ан̃н̃ам̣ джӣвам̣ ан̃н̃ам̣ сарӣра’нти ва̄ти. ахам̣ кхо панетам̣, а̄вусо, евам̣ джа̄на̄ми евам̣ пасса̄ми. атха ча пана̄хам̣ на вада̄ми – ‘там̣ джӣвам̣ там̣ сарӣра’нти ва̄ ‘ан̃н̃ам̣ джӣвам̣ ан̃н̃ам̣ сарӣра’нти ва̄…пе… дутийам̣ джха̄нам̣…пе… татийам̣ джха̄нам̣…пе… чатуттхам̣ джха̄нам̣ упасампаджджа вихарати. йо кхо, а̄вусо, бхиккху евам̣ джа̄на̄ти евам̣ пассати, каллам̣ ну кхо тассетам̣ вачана̄йа – ‘там̣ джӣвам̣ там̣ сарӣра’нти ва̄ ‘ан̃н̃ам̣ джӣвам̣ ан̃н̃ам̣ сарӣра’нти ва̄ти? йо со, а̄вусо, бхиккху евам̣ джа̄на̄ти евам̣ пассати каллам̣, тассетам̣ вачана̄йа – ‘там̣ джӣвам̣ там̣ сарӣра’нти ва̄ ‘ан̃н̃ам̣ джӣвам̣ ан̃н̃ам̣ сарӣра’нти ва̄ти. ахам̣ кхо панетам̣, а̄вусо, евам̣ джа̄на̄ми евам̣ пасса̄ми. атха ча пана̄хам̣ на вада̄ми – ‘там̣ джӣвам̣ там̣ сарӣра’нти ва̄ ‘ан̃н̃ам̣ джӣвам̣ ан̃н̃ам̣ сарӣра’нти ва̄…пе… н̃а̄н̣адассана̄йа читтам̣ абхинӣхарати абхининна̄мети…пе… йо кхо, а̄вусо, бхиккху евам̣ джа̄на̄ти евам̣ пассати, каллам̣ ну кхо тассетам̣ вачана̄йа – ‘там̣ джӣвам̣ там̣ сарӣра’нти ва̄ ‘ан̃н̃ам̣ джӣвам̣ ан̃н̃ам̣ сарӣра’нти ва̄ти. йо со, а̄вусо, бхиккху евам̣ джа̄на̄ти евам̣ пассати каллам̣ тассетам̣ вачана̄йа – ‘там̣ джӣвам̣ там̣ сарӣра’нти ва̄ ‘ан̃н̃ам̣ джӣвам̣ ан̃н̃ам̣ сарӣра’нти ва̄ти. ахам̣ кхо панетам̣, а̄вусо, евам̣ джа̄на̄ми евам̣ пасса̄ми. атха ча пана̄хам̣ на вада̄ми – ‘там̣ джӣвам̣ там̣ сарӣра’нти ва̄ ‘ан̃н̃ам̣ джӣвам̣ ан̃н̃ам̣ сарӣра’нти ва̄…пе….

380. …пе… на̄парам̣ иттхатта̄йа̄ти паджа̄на̄ти. йо кхо, а̄вусо, бхиккху евам̣ джа̄на̄ти евам̣ пассати, каллам̣ ну кхо тассетам̣ вачана̄йа – ‘там̣ джӣвам̣ там̣ сарӣра’нти ва̄ ‘ан̃н̃ам̣ джӣвам̣ ан̃н̃ам̣ сарӣра’нти ва̄ти? йо со, а̄вусо, бхиккху евам̣ джа̄на̄ти евам̣ пассати, на каллам̣ тассетам̣ вачана̄йа – ‘там̣ джӣвам̣ там̣ сарӣра’нти ва̄ ‘ан̃н̃ам̣ джӣвам̣ ан̃н̃ам̣ сарӣра’нти ва̄ти. ахам̣ кхо панетам̣, а̄вусо, евам̣ джа̄на̄ми евам̣ пасса̄ми. атха ча пана̄хам̣ на вада̄ми – ‘там̣ джӣвам̣ там̣ сарӣра’нти ва̄ ‘ан̃н̃ам̣ джӣвам̣ ан̃н̃ам̣ сарӣра’нти ва̄’’ти. идамавоча бхагава̄. аттамана̄ те две паббаджита̄ бхагавато бха̄ситам̣ абхинандунти.

джа̄лийасуттам̣ нит̣т̣хитам̣ саттамам̣.