12. лохиччасуттам̣

лохиччабра̄хман̣аваттху

501. евам̣ ме сутам̣ – екам̣ самайам̣ бхагава̄ косалесу ча̄рикам̣ чарама̄но махата̄ бхиккхусан̇гхена саддхим̣ пан̃чаматтехи бхиккхусатехи йена са̄лаватика̄ тадавасари. тена кхо пана самайена лохиччо бра̄хман̣о са̄лаватикам̣ аджджха̄васати саттуссадам̣ сатин̣акат̣т̣ходакам̣ садхан̃н̃ам̣ ра̄джабхоггам̣ ран̃н̃а̄ пасенадина̄ косалена диннам̣ ра̄джада̄йам̣, брахмадеййам̣.

502. тена кхо пана самайена лохиччасса бра̄хман̣асса еварӯпам̣ па̄пакам̣ дит̣т̣хигатам̣ уппаннам̣ хоти – ‘‘идха саман̣о ва̄ бра̄хман̣о ва̄ кусалам̣ дхаммам̣ адхигаччхеййа, кусалам̣ дхаммам̣ адхигантва̄ на парасса а̄рочеййа, кин̃хи паро парасса кариссати. сеййатха̄пи на̄ма пура̄н̣ам̣ бандханам̣ чхиндитва̄ ан̃н̃ам̣ навам̣ бандханам̣ кареййа, евам̣сампадамидам̣ па̄пакам̣ лобхадхаммам̣ вада̄ми, кин̃хи паро парасса кариссатӣ’’ти.

503. ассоси кхо лохиччо бра̄хман̣о – ‘‘саман̣о кхалу, бхо, готамо сакйапутто сакйакула̄ паббаджито косалесу ча̄рикам̣ чарама̄но махата̄ бхиккхусан̇гхена саддхим̣ пан̃чаматтехи бхиккхусатехи са̄лаватикам̣ ануппатто. там̣ кхо пана бхавантам̣ готамам̣ евам̣ калйа̄н̣о киттисаддо аббхуггато – ‘итипи со бхагава̄ арахам̣ самма̄самбуддхо виджджа̄чаран̣асампанно сугато локавидӯ ануттаро пурисадаммаса̄ратхи саттха̄ деваманусса̄нам̣ буддхо бхагава̄’. со имам̣ локам̣ садевакам̣ сама̄ракам̣ сабрахмакам̣ сассаман̣абра̄хман̣им̣ паджам̣ садевамануссам̣ сайам̣ абхин̃н̃а̄ саччхикатва̄ паведети. со дхаммам̣ десети а̄дикалйа̄н̣ам̣ маджджхекалйа̄н̣ам̣ парийоса̄накалйа̄н̣ам̣ са̄ттхам̣ сабйан̃джанам̣ кевалапарипун̣н̣ам̣ парисуддхам̣ брахмачарийам̣ пака̄сети. са̄дху кхо пана татха̄рӯпа̄нам̣ арахатам̣ дассанам̣ хотӣ’’ти.

504. атха кхо лохиччо бра̄хман̣о росикам̣ [бхесикам̣ (сӣ. пӣ.)] нха̄питам̣ а̄мантеси – ‘‘ехи твам̣, самма росике, йена саман̣о готамо тенупасан̇кама; упасан̇камитва̄ мама вачанена саман̣ам̣ готамам̣ аппа̄ба̄дхам̣ аппа̄тан̇кам̣ лахут̣т̣ха̄нам̣ балам̣ пха̄сувиха̄рам̣ пуччха – лохиччо, бхо готама, бра̄хман̣о бхавантам̣ готамам̣ аппа̄ба̄дхам̣ аппа̄тан̇кам̣ лахут̣т̣ха̄нам̣ балам̣ пха̄сувиха̄рам̣ пуччхатӣ’’ти. еван̃ча вадехи – ‘‘адхива̄сету кира бхавам̣ готамо лохиччасса бра̄хман̣асса сва̄тана̄йа бхаттам̣ саддхим̣ бхиккхусан̇гхена̄’’ти.

505. ‘‘евам̣, бхо’’ти [евам̣ бхантети (сӣ. пӣ.)] кхо росика̄ нха̄пито лохиччасса бра̄хман̣асса пат̣иссутва̄ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо росика̄ нха̄пито бхагавантам̣ етадавоча – ‘‘лохиччо, бханте, бра̄хман̣о бхагавантам̣ аппа̄ба̄дхам̣ аппа̄тан̇кам̣ лахут̣т̣ха̄нам̣ балам̣ пха̄сувиха̄рам̣ пуччхати; еван̃ча вадети – адхива̄сету кира, бханте, бхагава̄ лохиччасса бра̄хман̣асса сва̄тана̄йа бхаттам̣ саддхим̣ бхиккхусан̇гхена̄’’ти. адхива̄сеси бхагава̄ тун̣хӣбха̄вена.

506. атха кхо росика̄ нха̄пито бхагавато адхива̄санам̣ видитва̄ ут̣т̣ха̄йа̄сана̄ бхагавантам̣ абхива̄детва̄ падаккхин̣ам̣ катва̄ йена лохиччо бра̄хман̣о тенупасан̇ками; упасан̇камитва̄ лохиччам̣ бра̄хман̣ам̣ етадавоча – ‘‘авочумха̄ кхо майам̣ бхото [майам̣ бханте тава (сӣ. пӣ.)] вачанена там̣ бхагавантам̣ – ‘лохиччо, бханте, бра̄хман̣о бхагавантам̣ аппа̄ба̄дхам̣ аппа̄тан̇кам̣ лахут̣т̣ха̄нам̣ балам̣ пха̄сувиха̄рам̣ пуччхати; еван̃ча вадети – адхива̄сету кира, бханте, бхагава̄ лохиччасса бра̄хман̣асса сва̄тана̄йа бхаттам̣ саддхим̣ бхиккхусан̇гхена̄’ти. адхивуттхан̃ча пана тена бхагавата̄’’ти.

507. атха кхо лохиччо бра̄хман̣о тасса̄ раттийа̄ аччайена саке нивесане пан̣ӣтам̣ кха̄данӣйам̣ бходжанӣйам̣ пат̣ийа̄да̄петва̄ росикам̣ нха̄питам̣ а̄мантеси – ‘‘ехи твам̣, самма росике, йена саман̣о готамо тенупасан̇кама; упасан̇камитва̄ саман̣асса готамасса ка̄лам̣ а̄рочехи – ка̄ло бхо, готама, нит̣т̣хитам̣ бхатта’’нти. ‘‘евам̣, бхо’’ти кхо росика̄ нха̄пито лохиччасса бра̄хман̣асса пат̣иссутва̄ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ ат̣т̣ха̄си. екамантам̣ т̣хито кхо росика̄ нха̄пито бхагавато ка̄лам̣ а̄рочеси – ‘‘ка̄ло, бханте, нит̣т̣хитам̣ бхатта’’нти.

508. атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа саддхим̣ бхиккхусан̇гхена йена са̄лаватика̄ тенупасан̇ками. тена кхо пана самайена росика̄ нха̄пито бхагавантам̣ пит̣т̣хито пит̣т̣хито анубандхо хоти. атха кхо росика̄ нха̄пито бхагавантам̣ етадавоча – ‘‘лохиччасса, бханте, бра̄хман̣асса еварӯпам̣ па̄пакам̣ дит̣т̣хигатам̣ уппаннам̣ – ‘идха саман̣о ва̄ бра̄хман̣о ва̄ кусалам̣ дхаммам̣ адхигаччхеййа, кусалам̣ дхаммам̣ адхигантва̄ на парасса а̄рочеййа – кин̃хи паро парасса кариссати. сеййатха̄пи на̄ма пура̄н̣ам̣ бандханам̣ чхиндитва̄ ан̃н̃ам̣ навам̣ бандханам̣ кареййа, евам̣ сампадамидам̣ па̄пакам̣ лобхадхаммам̣ вада̄ми – кин̃хи паро парасса кариссатӣ’ти. са̄дху, бханте, бхагава̄ лохиччам̣ бра̄хман̣ам̣ етасма̄ па̄пака̄ дит̣т̣хигата̄ вивечетӯ’’ти. ‘‘аппева на̄ма сийа̄ росике, аппева на̄ма сийа̄ росике’’ти.

атха кхо бхагава̄ йена лохиччасса бра̄хман̣асса нивесанам̣ тенупасан̇ками; упасан̇камитва̄ пан̃н̃атте а̄сане нисӣди. атха кхо лохиччо бра̄хман̣о буддхаппамукхам̣ бхиккхусан̇гхам̣ пан̣ӣтена кха̄данӣйена бходжанӣйена сахаттха̄ сантаппеси сампава̄реси.

лохиччабра̄хман̣а̄нуйого

509. атха кхо лохиччо бра̄хман̣о бхагавантам̣ бхутта̄вим̣ онӣтапаттапа̄н̣им̣ ан̃н̃атарам̣ нӣчам̣ а̄санам̣ гахетва̄ екамантам̣ нисӣди. екамантам̣ нисиннам̣ кхо лохиччам̣ бра̄хман̣ам̣ бхагава̄ етадавоча – ‘‘саччам̣ кира те, лохичча, еварӯпам̣ па̄пакам̣ дит̣т̣хигатам̣ уппаннам̣ – ‘идха саман̣о ва̄ бра̄хман̣о ва̄ кусалам̣ дхаммам̣ адхигаччхеййа, кусалам̣ дхаммам̣ адхигантва̄ на парасса а̄рочеййа – кин̃хи паро парасса кариссати. сеййатха̄пи на̄ма пура̄н̣ам̣ бандханам̣ чхиндитва̄ ан̃н̃ам̣ навам̣ бандханам̣ кареййа, евам̣ сампадамидам̣ па̄пакам̣ лобхадхаммам̣ вада̄ми, кин̃хи паро парасса кариссатӣ’’’ ти? ‘‘евам̣, бхо готама’’. ‘‘там̣ ким̣ ман̃н̃аси лохичча нану твам̣ са̄лаватикам̣ аджджха̄васасӣ’’ти? ‘‘евам̣, бхо готама’’. ‘‘йо ну кхо, лохичча, евам̣ вадеййа – ‘лохиччо бра̄хман̣о са̄лаватикам̣ аджджха̄васати. йа̄ са̄лаватика̄йа самудайасан̃джа̄ти лохиччова там̣ бра̄хман̣о екако парибхун̃джеййа, на ан̃н̃есам̣ дадеййа̄’ти. евам̣ ва̄дӣ со йе там̣ упаджӣванти, тесам̣ антара̄йакаро ва̄ хоти, но ва̄’’ти?

‘‘антара̄йакаро, бхо готама’’. ‘‘антара̄йакаро сама̄но хита̄нукампӣ ва̄ тесам̣ хоти ахита̄нукампӣ ва̄’’ти? ‘‘ахита̄нукампӣ, бхо готама’’. ‘‘ахита̄нукамписса меттам̣ ва̄ тесу читтам̣ паччупат̣т̣хитам̣ хоти сапаттакам̣ ва̄’’ти? ‘‘сапаттакам̣, бхо готама’’. ‘‘сапаттаке читте паччупат̣т̣хите миччха̄дит̣т̣хи ва̄ хоти самма̄дит̣т̣хи ва̄’’ти? ‘‘миччха̄дит̣т̣хи, бхо готама’’. ‘‘миччха̄дит̣т̣хисса кхо ахам̣, лохичча, двиннам̣ гатӣнам̣ ан̃н̃атарам̣ гатим̣ вада̄ми – нирайам̣ ва̄ тираччха̄найоним̣ ва̄’’.

510. ‘‘там̣ ким̣ ман̃н̃аси, лохичча, нану ра̄джа̄ пасенади косало ка̄сикосалам̣ аджджха̄васатӣ’’ти? ‘‘евам̣, бхо готама’’. ‘‘йо ну кхо, лохичча, евам̣ вадеййа – ‘ра̄джа̄ пасенади косало ка̄сикосалам̣ аджджха̄васати; йа̄ ка̄сикосале самудайасан̃джа̄ти, ра̄джа̄ва там̣ пасенади косало екако парибхун̃джеййа, на ан̃н̃есам̣ дадеййа̄’ти. евам̣ ва̄дӣ со йе ра̄джа̄нам̣ пасенадим̣ косалам̣ упаджӣванти тумхе чева ан̃н̃е ча, тесам̣ антара̄йакаро ва̄ хоти, но ва̄’’ти?

511. ‘‘ити кира, лохичча, йо евам̣ вадеййа – ‘‘лохиччо бра̄хман̣о са̄лаватикам̣ аджджха̄васати; йа̄ са̄лаватика̄йа самудайасан̃джа̄ти, лохиччова там̣ бра̄хман̣о екако парибхун̃джеййа, на ан̃н̃есам̣ дадеййа̄’’ти. евам̣ва̄дӣ со йе там̣ упаджӣванти, тесам̣ антара̄йакаро хоти. антара̄йакаро сама̄но ахита̄нукампӣ хоти, ахита̄нукамписса сапаттакам̣ читтам̣ паччупат̣т̣хитам̣ хоти, сапаттаке читте паччупат̣т̣хите миччха̄дит̣т̣хи хоти. евамева кхо, лохичча, йо евам̣ вадеййа – ‘‘идха саман̣о ва̄ бра̄хман̣о ва̄ кусалам̣ дхаммам̣ адхигаччхеййа, кусалам̣ дхаммам̣ адхигантва̄ на парасса а̄рочеййа, кин̃хи паро парасса кариссати. сеййатха̄пи на̄ма пура̄н̣ам̣ бандханам̣ чхиндитва̄ ан̃н̃ам̣ навам̣ бандханам̣ кареййа…пе… кариссатӣ’’ти. евам̣ва̄дӣ со йе те кулапутта̄ татха̄гатаппаведитам̣ дхаммавинайам̣ а̄гамма еварӯпам̣ ул̣а̄рам̣ висесам̣ адхигаччханти, сота̄паттипхалампи саччхикаронти, сакада̄га̄мипхалампи саччхикаронти, ана̄га̄мипхалампи саччхикаронти, арахаттампи саччхикаронти, йе чиме дибба̄ габбха̄ парипа̄ченти дибба̄нам̣ бхава̄нам̣ абхиниббаттийа̄, тесам̣ антара̄йакаро хоти, антара̄йакаро сама̄но ахита̄нукампӣ хоти, ахита̄нукамписса сапаттакам̣ читтам̣ паччупат̣т̣хитам̣ хоти, сапаттаке читте паччупат̣т̣хите миччха̄дит̣т̣хи хоти. миччха̄дит̣т̣хисса кхо ахам̣, лохичча, двиннам̣ гатӣнам̣ ан̃н̃атарам̣ гатим̣ вада̄ми – нирайам̣ ва̄ тираччха̄найоним̣ ва̄.

512. ‘‘ити кира, лохичча, йо евам̣ вадеййа – ‘‘ра̄джа̄ пасенади косало ка̄сикосалам̣ аджджха̄васати; йа̄ ка̄сикосале самудайасан̃джа̄ти, ра̄джа̄ва там̣ пасенади косало екако парибхун̃джеййа, на ан̃н̃есам̣ дадеййа̄’’ти. евам̣ва̄дӣ со йе ра̄джа̄нам̣ пасенадим̣ косалам̣ упаджӣванти тумхе чева ан̃н̃е ча, тесам̣ антара̄йакаро хоти. антара̄йакаро сама̄но ахита̄нукампӣ хоти, ахита̄нукамписса сапаттакам̣ читтам̣ паччупат̣т̣хитам̣ хоти, сапаттаке читте паччупат̣т̣хите миччха̄дит̣т̣хи хоти. евамева кхо, лохичча, йо евам̣ вадеййа – ‘‘идха саман̣о ва̄ бра̄хман̣о ва̄ кусалам̣ дхаммам̣ адхигаччхеййа, кусалам̣ дхаммам̣ адхигантва̄ на парасса а̄рочеййа, кин̃хи паро парасса кариссати. сеййатха̄пи на̄ма…пе… кин̃хи паро парасса кариссатӣ’’ти, евам̣ ва̄дӣ со йе те кулапутта̄ татха̄гатаппаведитам̣ дхаммавинайам̣ а̄гамма еварӯпам̣ ул̣а̄рам̣ висесам̣ адхигаччханти, сота̄паттипхалампи саччхикаронти, сакада̄га̄мипхалампи саччхикаронти, ана̄га̄мипхалампи саччхикаронти, арахаттампи саччхикаронти. йе чиме дибба̄ габбха̄ парипа̄ченти дибба̄нам̣ бхава̄нам̣ абхиниббаттийа̄, тесам̣ антара̄йакаро хоти, антара̄йакаро сама̄но ахита̄нукампӣ хоти, ахита̄нукамписса сапаттакам̣ читтам̣ паччупат̣т̣хитам̣ хоти, сапаттаке читте паччупат̣т̣хите миччха̄дит̣т̣хи хоти. миччха̄дит̣т̣хисса кхо ахам̣, лохичча, двиннам̣ гатӣнам̣ ан̃н̃атарам̣ гатим̣ вада̄ми – нирайам̣ ва̄ тираччха̄найоним̣ ва̄.

тайо чодана̄раха̄

513. ‘‘тайо кхоме, лохичча, саттха̄ро, йе локе чодана̄раха̄; йо ча паневарӯпе саттха̄ро чодети, са̄ чодана̄ бхӯта̄ таччха̄ дхаммика̄ анаваджджа̄. катаме тайо? идха, лохичча, екаччо саттха̄ йассаттха̄йа ага̄расма̄ анага̄рийам̣ паббаджито хоти, сва̄сса са̄ман̃н̃аттхо анануппатто хоти. со там̣ са̄ман̃н̃аттхам̣ ананупа̄пун̣итва̄ са̄вака̄нам̣ дхаммам̣ десети – ‘‘идам̣ во хита̄йа идам̣ во сукха̄йа̄’’ти. тасса са̄вака̄ на суссӯсанти, на сотам̣ одаханти, на ан̃н̃а̄ читтам̣ упат̣т̣хапенти, воккамма ча саттхуса̄сана̄ ваттанти. со евамасса чодетаббо – ‘‘а̄йасма̄ кхо йассаттха̄йа ага̄расма̄ анага̄рийам̣ паббаджито, со те са̄ман̃н̃аттхо анануппатто, там̣ твам̣ са̄ман̃н̃аттхам̣ ананупа̄пун̣итва̄ са̄вака̄нам̣ дхаммам̣ десеси – ‘идам̣ во хита̄йа идам̣ во сукха̄йа̄’ти. тасса те са̄вака̄ на суссӯсанти, на сотам̣ одаханти, на ан̃н̃а̄ читтам̣ упат̣т̣хапенти, воккамма ча саттхуса̄сана̄ ваттанти. сеййатха̄пи на̄ма осаккантийа̄ ва̄ уссаккеййа, параммукхим̣ ва̄ а̄лин̇геййа, евам̣ сампадамидам̣ па̄пакам̣ лобхадхаммам̣ вада̄ми – кин̃хи паро парасса кариссатӣ’’ти. айам̣ кхо, лохичча, пат̣хамо саттха̄, йо локе чодана̄рахо; йо ча паневарӯпам̣ саттха̄рам̣ чодети, са̄ чодана̄ бхӯта̄ таччха̄ дхаммика̄ анаваджджа̄.

514. ‘‘пуна чапарам̣, лохичча, идхекаччо саттха̄ йассаттха̄йа ага̄расма̄ анага̄рийам̣ паббаджито хоти, сва̄сса са̄ман̃н̃аттхо анануппатто хоти. со там̣ са̄ман̃н̃аттхам̣ ананупа̄пун̣итва̄ са̄вака̄нам̣ дхаммам̣ десети – ‘‘идам̣ во хита̄йа, идам̣ во сукха̄йа̄’’ти. тасса са̄вака̄ суссӯсанти, сотам̣ одаханти, ан̃н̃а̄ читтам̣ упат̣т̣хапенти, на ча воккамма саттхуса̄сана̄ ваттанти. со евамасса чодетаббо – ‘‘а̄йасма̄ кхо йассаттха̄йа ага̄расма̄ анага̄рийам̣ паббаджито, со те са̄ман̃н̃аттхо анануппатто. там̣ твам̣ са̄ман̃н̃аттхам̣ ананупа̄пун̣итва̄ са̄вака̄нам̣ дхаммам̣ десеси – ‘идам̣ во хита̄йа идам̣ во сукха̄йа̄’ти. тасса те са̄вака̄ суссӯсанти, сотам̣ одаханти, ан̃н̃а̄ читтам̣ упат̣т̣хапенти, на ча воккамма саттхуса̄сана̄ ваттанти. сеййатха̄пи на̄ма сакам̣ кхеттам̣ оха̄йа парам̣ кхеттам̣ нидда̄йитаббам̣ ман̃н̃еййа, евам̣ сампадамидам̣ па̄пакам̣ лобхадхаммам̣ вада̄ми – кин̃хи паро парасса кариссатӣ’’ти. айам̣ кхо, лохичча, дутийо саттха̄, йо, локе чодана̄рахо; йо ча паневарӯпам̣ саттха̄рам̣ чодети, са̄ чодана̄ бхӯта̄ таччха̄ дхаммика̄ анаваджджа̄.

515. ‘‘пуна чапарам̣, лохичча, идхекаччо саттха̄ йассаттха̄йа ага̄расма̄ анага̄рийам̣ паббаджито хоти, сва̄сса са̄ман̃н̃аттхо ануппатто хоти. со там̣ са̄ман̃н̃аттхам̣ анупа̄пун̣итва̄ са̄вака̄нам̣ дхаммам̣ десети – ‘‘идам̣ во хита̄йа идам̣ во сукха̄йа̄’’ти. тасса са̄вака̄ на суссӯсанти, на сотам̣ одаханти, на ан̃н̃а̄ читтам̣ упат̣т̣хапенти, воккамма ча саттхуса̄сана̄ ваттанти. со евамасса чодетаббо – ‘‘а̄йасма̄ кхо йассаттха̄йа ага̄расма̄ анага̄рийам̣ паббаджито, со те са̄ман̃н̃аттхо ануппатто. там̣ твам̣ са̄ман̃н̃аттхам̣ анупа̄пун̣итва̄ са̄вака̄нам̣ дхаммам̣ десеси – ‘идам̣ во хита̄йа идам̣ во сукха̄йа̄’ти. тасса те са̄вака̄ на суссӯсанти, на сотам̣ одаханти, на ан̃н̃а̄ читтам̣ упат̣т̣хапенти, воккамма ча саттхуса̄сана̄ ваттанти. сеййатха̄пи на̄ма пура̄н̣ам̣ бандханам̣ чхиндитва̄ ан̃н̃ам̣ навам̣ бандханам̣ кареййа, евам̣ сампадамидам̣ па̄пакам̣ лобхадхаммам̣ вада̄ми, кин̃хи паро парасса кариссатӣ’’ти. айам̣ кхо, лохичча, татийо саттха̄, йо локе чодана̄рахо; йо ча паневарӯпам̣ саттха̄рам̣ чодети, са̄ чодана̄ бхӯта̄ таччха̄ дхаммика̄ анаваджджа̄. име кхо, лохичча, тайо саттха̄ро, йе локе чодана̄раха̄, йо ча паневарӯпе саттха̄ро чодети, са̄ чодана̄ бхӯта̄ таччха̄ дхаммика̄ анаваджджа̄ти.

начодана̄рахасаттху

516. евам̣ вутте, лохиччо бра̄хман̣о бхагавантам̣ етадавоча – ‘‘аттхи пана, бхо готама, кочи саттха̄, йо локе начодана̄рахо’’ти? ‘‘аттхи кхо, лохичча, саттха̄, йо локе начодана̄рахо’’ти. ‘‘катамо пана со, бхо готама, саттха̄, йо локе начодана̄рахо’’ти?

‘‘идха, лохичча, татха̄гато локе уппаджджати арахам̣, самма̄самбуддхо…пе… (йатха̄ 190-212 ануччхедесу евам̣ виттха̄ретаббам̣). евам̣ кхо, лохичча, бхиккху сӣласампанно хоти…пе… пат̣хамам̣ джха̄нам̣ упасампаджджа вихарати… йасмим̣ кхо, лохичча, саттхари са̄вако еварӯпам̣ ул̣а̄рам̣ висесам̣ адхигаччхати, айампи кхо, лохичча, саттха̄, йо локе начодана̄рахо. йо ча паневарӯпам̣ саттха̄рам̣ чодети, са̄ чодана̄ абхӯта̄ атаччха̄ адхаммика̄ са̄ваджджа̄…пе… дутийам̣ джха̄нам̣…пе… татийам̣ джха̄нам̣…пе… чатуттхам̣ джха̄нам̣ упасампаджджа вихарати. йасмим̣ кхо, лохичча, саттхари са̄вако еварӯпам̣ ул̣а̄рам̣ висесам̣ адхигаччхати, айампи кхо, лохичча, саттха̄, йо локе начодана̄рахо, йо ча паневарӯпам̣ саттха̄рам̣ чодети, са̄ чодана̄ абхӯта̄ атаччха̄ адхаммика̄ са̄ваджджа̄… н̃а̄н̣адассана̄йа читтам̣ абхинӣхарати абхининна̄мети…пе… йасмим̣ кхо, лохичча, саттхари са̄вако еварӯпам̣ ул̣а̄рам̣ висесам̣ адхигаччхати, айампи кхо, лохичча, саттха̄, йо локе начодана̄рахо, йо ча паневарӯпам̣ саттха̄рам̣ чодети, са̄ чодана̄ абхӯта̄ атаччха̄ адхаммика̄ са̄ваджджа̄… на̄парам̣ иттхатта̄йа̄ти паджа̄на̄ти. йасмим̣ кхо, лохичча, саттхари са̄вако еварӯпам̣ ул̣а̄рам̣ висесам̣ адхигаччхати, айампи кхо, лохичча, саттха̄, йо локе начодана̄рахо, йо ча паневарӯпам̣ саттха̄рам̣ чодети, са̄ чодана̄ абхӯта̄ атаччха̄ адхаммика̄ са̄ваджджа̄’’ти.

517. евам̣ вутте, лохиччо бра̄хман̣о бхагавантам̣ етадавоча – ‘‘сеййатха̄пи, бхо готама, пурисо пурисам̣ наракапапа̄там̣ патантам̣ кесесу гахетва̄ уддхаритва̄ тхале патит̣т̣хапеййа, евамева̄хам̣ бхота̄ готамена наракапапа̄там̣ папатанто уддхаритва̄ тхале патит̣т̣ха̄пито. абхиккантам̣, бхо готама, абхиккантам̣, бхо готама, сеййатха̄пи, бхо готама, никкуджджитам̣ ва̄ уккуджджеййа, пат̣иччханнам̣ ва̄ вивареййа, мӯл̣хасса ва̄ маггам̣ а̄чиккхеййа, андхака̄ре ва̄ телападжджотам̣ дха̄реййа, ‘чаккхуманто рӯпа̄ни даккхантӣ’ти. евамевам̣ бхота̄ готамена анекапарийа̄йена дхаммо пака̄сито. еса̄хам̣ бхавантам̣ готамам̣ саран̣ам̣ гаччха̄ми дхамман̃ча бхиккхусан̇гхан̃ча. упа̄сакам̣ мам̣ бхавам̣ готамо дха̄рету аджджатагге па̄н̣упетам̣ саран̣ам̣ гата’’нти.

лохиччасуттам̣ нит̣т̣хитам̣ два̄дасамам̣.