5. ӯнавӣсативассасиккха̄падаван̣н̣ана̄

402. пан̃чамасиккха̄паде – ан̇гулийо дуккха̄ бхависсантӣти аккхара̄ни ликхантасса ан̇гулийо дуккха̄ бхависсантӣти чинтесум̣. урасса дуккхоти ган̣анам̣ сиккхантена бахум̣ чинтетаббам̣ хоти, тенасса уро дуккхо бхависсатӣти ман̃н̃им̣су. аккхӣни дуккха̄ бхависсантӣти рӯпасуттам̣ сиккхантена каха̄пан̣а̄ париваттетва̄ париваттетва̄ пасситабба̄ хонти, тенасса аккхӣни дуккха̄ни бхависсантӣти ман̃н̃им̣су. д̣ам̣са̄дӣсу д̣ам̣са̄ти пин̇галамаккхика̄йо. дуккха̄нанти дуккхама̄нам̣. тибба̄нанти бахала̄нам̣. кхара̄нанти тикхин̣а̄нам̣. кат̣ука̄нанти пхаруса̄нам̣; амана̄пата̄йа ва̄ кат̣укарасасадиса̄нам̣. аса̄та̄нанти амадхура̄нам̣. па̄н̣ахара̄нанти джӣвитахара̄нам̣.

404. сӣмам̣ самманнатӣти навам̣ сӣмам̣ бандхати. курундийам̣ пана удакуккхепапариччхинданепи дуккат̣ам̣ вуттам̣. парипун̣н̣авӣсативассоти пат̣исандхиггахан̣ато пат̣т̣ха̄йа парипун̣н̣авӣсативассо; габбхавӣсопи хи парипун̣н̣авӣсативассотвева сан̇кхйе гаччхати. йатха̄ха –

‘‘тена кхо пана самайена а̄йасма̄ кума̄ракассапо габбхавӣсо упасампанно хоти. атха кхо а̄йасмато кума̄ракассапасса етадахоси – ‘бхагавата̄ пан̃н̃аттам̣, на ӯнавӣсативассо пуггало упасампа̄детабботи. ахан̃чамхи габбхавӣсо упасампанно. упасампанно нукхомхи, нану кхо упасампанно’ти. бхагавато етаматтхам̣ а̄рочесум̣. йам̣ бхиккхаве ма̄тукуччхимхи пат̣хамам̣ читтам̣ уппаннам̣, пат̣хамам̣ вин̃н̃а̄н̣ам̣ па̄тубхӯтам̣ тадупа̄да̄йа са̄васса джа̄ти. ануджа̄на̄ми, бхиккхаве, габбхавӣсам̣ упасампа̄дету’’нти (маха̄ва. 124).

таттха йо два̄дасама̄се ма̄тукуччхисмим̣ васитва̄ маха̄пава̄ран̣а̄йа джа̄то, со тато пат̣т̣ха̄йа йа̄ва екӯнавӣсатиме вассе маха̄пава̄ран̣а̄, там̣ атиккамитва̄ па̄т̣ипаде упасампа̄детаббо. етенупа̄йена ха̄йанавад̣д̣ханам̣ ведитаббам̣.

пора̄н̣акаттхера̄ пана екӯнавӣсативассам̣ са̄ман̣ерам̣ никкхаманӣйапун̣н̣ама̄сим̣ атиккамма па̄т̣ипададивасе упасампа̄денти, там̣ касма̄ти? вуччате – екасмим̣ вассе чха ча̄туддасикаупосатха̄ хонти. ити вӣсатийа̄ вассесу чатта̄ро ма̄са̄ париха̄йанти. ра̄джа̄но татийе татийе вассе вассам̣ уккад̣д̣ханти. ити ат̣т̣ха̄расасу вассесу чха ма̄са̄ вад̣д̣ханти, тато упосатхавасена парихӣне чатта̄ро ма̄се апанетва̄ две ма̄са̄ авасеса̄ хонти, те две ма̄се гахетва̄ вӣсативасса̄ни парипун̣н̣а̄ни хонтӣти никкан̇кха̄ хутва̄ никкхаманӣйапун̣н̣ама̄сим̣ атиккамма па̄т̣ипаде упасампа̄денти. еттха пана йо пава̄ретва̄ вӣсативассо бхависсати, там̣ сандха̄йа ‘‘екӯнавӣсативасса’’нти вуттам̣. тасма̄ йо ма̄тукуччхисмим̣ два̄дасама̄се васи, со екавӣсативассо хоти. йо саттама̄се васи, со саттама̄са̄дхикавӣсативассо. чхама̄саджа̄то пана на джӣвати.

406. ана̄патти ӯнавӣсативассам̣ парипун̣н̣авӣсативассасан̃н̃ӣти еттха кин̃ча̄пи упасампа̄дентасса ана̄патти, пуггало пана анупасампаннова хоти. саче пана со дасавассаччайена ан̃н̃ам̣ упасампа̄дети, тан̃че мун̃читва̄ ган̣о пӯрати, сӯпасампанно. сопи ча йа̄ва на джа̄на̄ти, та̄васса нева саггантара̄йо на моккхантара̄йо, н̃атва̄ пана пуна упасампаджджитаббам̣. сесам̣ утта̄намева.

тисамут̣т̣ха̄нам̣ – кирийам̣, сан̃н̃а̄вимоккхам̣, сачиттакам̣, пан̣н̣аттиваджджам̣, ка̄йакаммам̣,

вачӣкаммам̣, тичиттам̣, тиведананти.

ӯнавӣсативассасиккха̄падам̣ пан̃чамам̣.