3. уккот̣анасиккха̄падаван̣н̣ана̄

392. татийасиккха̄паде – уккот̣ентӣти тасса тасса бхиккхуно сантикам̣ гантва̄ ‘‘акатам̣ камма’’нтиа̄дӣни ваданта̄ учча̄ленти; йатха̄патит̣т̣хитабха̄вена патит̣т̣ха̄тум̣ на денти.

393. йатха̄дхамманти йо йасса адхикаран̣асса вӯпасамана̄йа дхаммо вутто, тенева дхаммена̄ти аттхо. нихата̄дхикаран̣анти нихатам̣ адхикаран̣ам̣; саттха̄ра̄ вуттадхамменева вӯпасамитам̣ адхикаран̣анти аттхо.

395. дхаммакамме дхаммакаммасан̃н̃ӣти йена каммена там̣ адхикаран̣ам̣ вӯпасамитам̣, тан̃че дхаммакаммам̣ хоти, тасмим̣ дхаммакамме айампи дхаммакаммасан̃н̃ӣ хутва̄ йади уккот̣ети, па̄читтийам̣ а̄паджджатӣти аттхо. етена найена сесапада̄нипи ведитабба̄ни. айаметтха сан̇кхепо, виттха̄ро пана ‘‘имесам̣ чатуннам̣ адхикаран̣а̄нам̣ кати уккот̣ана̄’’тиа̄дина̄ найена парива̄ре вутто. ат̣т̣хакатха̄су там̣ саббам̣ а̄харитва̄ тассеваттхо ван̣н̣ито. майам̣ пана там̣ таттхева ван̣н̣айисса̄ма. идха а̄харитва̄ ван̣н̣ийама̄не хи сут̣т̣хутарам̣ саммохо бхавеййа̄ти на ван̣н̣айимха. сесаметтха утта̄намева. тисамут̣т̣ха̄нам̣ – кирийам̣, сан̃н̃а̄вимоккхам̣, сачиттакам̣, локаваджджам̣, ка̄йакаммам̣, вачӣкаммам̣, акусалачиттам̣, дуккхаведананти.

уккот̣анасиккха̄падам̣ татийам̣.