1. сан̃чиччапа̄н̣асиккха̄падаван̣н̣ана̄

382. саппа̄н̣акаваггасса пат̣хамасиккха̄паде – исса̄со хотӣти гихика̄ле дхануггаха̄чарийо хоти. джӣвита̄ воропита̄ти джӣвита̄ вийоджита̄.

сиккха̄падепи воропеййа̄ти вийоджеййа. йасма̄ пана воха̄раматтамеветам̣; на хеттха кин̃чи вийоджите сӣса̄лан̇ка̄ре сӣсам̣ вийа джӣвита̄ воропите па̄н̣епи джӣвитам̣ на̄ма висум̣ тит̣т̣хати, ан̃н̃адаттху антарадха̄намева гаччхати, тасма̄ таматтхам̣ дассетум̣ падабха̄джане ‘‘джӣвитиндрийам̣ упаччхиндатӣ’’тиа̄ди вуттам̣. имасмин̃ча сиккха̄паде тираччха̄нагатойева ‘‘па̄н̣о’’ти ведитаббо. там̣ кхуддакампи махантампи ма̄рентасса а̄паттина̄на̄каран̣ам̣ наттхи. маханте пана упаккамамахантатта̄ акусаламахаттам̣ хоти. па̄н̣е па̄н̣асан̃н̃ӣти антамасо ман̃чапӣт̣хам̣ содхенто ман̇гулабӣджакепи па̄н̣асан̃н̃ӣ никка̄рун̣иката̄йа там̣ бхинданто апанети, па̄читтийам̣. тасма̄ еварӯпесу т̣ха̄несу ка̄рун̃н̃ам̣ упат̣т̣хапетва̄ аппаматтена ваттам̣ ка̄таббам̣. сесам̣ мануссавиггахе вуттанайенева ведитаббам̣ саддхим̣ самут̣т̣ха̄на̄дӣхӣти.

сан̃чиччапа̄н̣асиккха̄падам̣ пат̣хамам̣.