1. муса̄ва̄дасиккха̄падаван̣н̣ана̄

йесам̣ навахи ваггехи, сан̇гахо суппатит̣т̣хито;

кхуддака̄нам̣ айам̣ да̄ни, тесам̣ бхавати ван̣н̣ана̄.

1. таттха муса̄ва̄даваггасса та̄ва пат̣хамасиккха̄паде хаттхакоти тасса тхерасса на̄мам̣. сакйа̄нам̣ путтоти сакйапутто. буддхака̄ле кира сакйакулато асӣти пурисасахасса̄ни паббаджим̣су, тесам̣ со ан̃н̃атароти. ва̄даккхиттоти ‘‘ва̄дам̣ карисса̄мӣ’’ти евам̣ паривитаккитена ва̄дена парава̄дисантикам̣ кхитто паккхитто пахито песитоти аттхо. ва̄дамхи ва̄ сакена читтена кхитто. йатра йатра ва̄до татра татрева сандиссатӣтипи ва̄даккхитто. аваджа̄нитва̄ аваджа̄на̄тӣти аттано ва̄де кан̃чи досам̣ саллаккхенто ‘‘на̄йам̣ мама ва̄до’’ти аваджа̄нитва̄ пуна катхенто катхенто ниддосатам̣ саллаккхетва̄ ‘‘мамева айам̣ ва̄до’’ти пат̣иджа̄на̄ти. пат̣иджа̄нитва̄ аваджа̄на̄тӣти кисмин̃чидева вачане а̄нисам̣сам̣ саллаккхенто ‘‘айам̣ мама ва̄до’’ти пат̣иджа̄нитва̄ пуна катхенто катхенто таттха досам̣ саллаккхетва̄ ‘‘на̄йам̣ мама ва̄до’’ти аваджа̄на̄ти. ан̃н̃енан̃н̃ам̣ пат̣ичаратӣти ан̃н̃ена ка̄ран̣ена ан̃н̃ам̣ ка̄ран̣ам̣ пат̣ичарати пат̣иччха̄дети аджджхоттхарати, ‘‘рӯпам̣ аниччам̣ джа̄нитаббато’’ти ватва̄ пуна ‘‘джа̄тидхаммато’’тиа̄дӣни вадати. курундийам̣ пана ‘‘етасса пат̣иччха̄данахетум̣ ан̃н̃ам̣ бахум̣ катхетӣ’’ти вуттам̣. татра̄йам̣ адхиппа̄йо – йам̣ там̣ пат̣иджа̄нанан̃ча аваджа̄нанан̃ча, тасса пат̣иччха̄данаттхам̣ ‘‘ко а̄ха, ким̣ а̄ха, кисмим̣ а̄ха̄’’ти евама̄ди бахум̣ бха̄сатӣти. пуна маха̄ат̣т̣хакатха̄йам̣ ‘‘аваджа̄нитва̄ пат̣иджа̄нанто пат̣иджа̄нитва̄ аваджа̄нанто ева ча ан̃н̃енан̃н̃ам̣ пат̣ичаратӣ’’ти вуттам̣. сампаджа̄намуса̄ бха̄сатӣти джа̄нанто муса̄ бха̄сати. сан̇кетам̣ катва̄ висам̣ва̄детӣти пуребхатта̄дӣсу ‘‘асукасмим̣ на̄ма ка̄ле асукасмим̣ на̄ма падесе ва̄до хотӯ’’ти сан̇кетам̣ катва̄ сан̇кетато пуре ва̄ паччха̄ ва̄ гантва̄ ‘‘пассатха бхо, титтхийа̄ на а̄гата̄ пара̄джита̄’’ти паккамати.

2. сампаджа̄намуса̄ва̄дети джа̄нитва̄ джа̄нантасса ча муса̄ бхан̣ане.

3. висам̣ва̄данапуреккха̄расса̄ти висам̣ва̄даначиттам̣ пурато катва̄ вадантасса. ва̄ча̄ти миччха̄ва̄ча̄парийа̄паннавачанасамут̣т̣ха̄пика̄ четана̄. гира̄ти та̄йа четана̄йа самут̣т̣ха̄питасаддам̣ дассети. бйаппатхоти вачанапатхо; ва̄ча̄йева хи ан̃н̃есампи дит̣т̣ха̄нугатима̄паджджанта̄нам̣ патхабхӯтато бйаппатхоти вуччати. вачӣбхедоти вачӣсан̃н̃ита̄йа ва̄ча̄йа бхедо; пабхедагата̄ ва̄ча̄ ева евам̣ вуччати. ва̄часика̄ вин̃н̃аттӣти вачӣвин̃н̃атти. евам̣ пат̣хамападена суддхачетана̄, маджджхе тӣхи там̣самут̣т̣ха̄питасаддасахита̄ четана̄, анте екена вин̃н̃аттисахита̄ четана̄ ‘‘катхита̄’’ти ведитабба̄. анарийавоха̄ра̄ти анарийа̄нам̣ ба̄лапутхуджджана̄нам̣ воха̄ра̄.

евам̣ сампаджа̄намуса̄ва̄дам̣ дассетва̄ ида̄ни анте вутта̄нам̣ сампаджа̄намуса̄ва̄дасан̇кха̄та̄нам̣ анарийавоха̄ра̄нам̣ лаккхан̣ам̣ дассенто ‘‘адит̣т̣хам̣ дит̣т̣хам̣ ме’’тиа̄дима̄ха. таттха адит̣т̣хам̣ дит̣т̣хам̣ мети евам̣ вадато вачанам̣ там̣самут̣т̣ха̄пика̄ ва̄ четана̄ еко анарийавоха̄роти имина̄ найена аттхо ведитаббо. апичеттха чаккхувасена аггахита̄рамман̣ам̣ адит̣т̣хам̣, сотавасена аггахитам̣ асутам̣, гха̄на̄дивасена мунитва̄ тӣхи индрийехи ека̄баддхам̣ вийа катва̄ патва̄ аггахитам̣ амутам̣, ан̃н̃атра пан̃чахи индрийехи суддхена вин̃н̃а̄н̣енева аггахитам̣ авин̃н̃а̄танти ведитаббам̣. па̄л̣ийам̣ пана ‘‘адит̣т̣хам̣ на̄ма на чаккхуна̄ дит̣т̣ха’’нти евам̣ ол̣а̄рикенева найена десана̄ ката̄ти. дит̣т̣ха̄дӣсу ча аттана̄пи паренапи дит̣т̣хам̣ дит̣т̣хамева. евам̣ сутамутавин̃н̃а̄та̄нӣти айамеко парийа̄йо. апаро найо йам̣ аттана̄ дит̣т̣хам̣ дит̣т̣хамева там̣. еса найо сута̄дӣсу. йам̣ пана парена дит̣т̣хам̣, там̣ аттана̄ сутат̣т̣ха̄не тит̣т̣хати. евам̣ мута̄дӣнипи.

4. ида̄ни тесам̣ анарийавоха̄ра̄нам̣ васена а̄паттим̣ а̄ропетва̄ дассенто ‘‘тӣха̄ка̄рехӣ’’тиа̄дима̄ха. тассаттхо ‘‘тӣхи а̄ка̄рехи пат̣хамам̣ джха̄нам̣ сама̄паджджинти сампаджа̄намуса̄ бхан̣антасса а̄патти па̄ра̄джикасса̄’’ти евама̄дичатуттхапа̄ра̄джикапа̄л̣иван̣н̣ана̄йам̣ вуттанайенева ведитаббо. кевалан̃хи таттха ‘‘пат̣хамам̣ джха̄нам̣ сама̄паджджи’’нти идха ‘‘адит̣т̣хам̣ дит̣т̣хам̣ ме’’ти, таттха ча ‘‘а̄патти па̄ра̄джикасса̄’’ти ‘‘идха а̄патти па̄читтийасса̄’’ти евам̣ ваттхуматте а̄паттиматте ча висесо, сесам̣ екалаккхан̣амева̄ти.

9. тӣха̄ка̄рехи дит̣т̣хе вематикотиа̄дӣнампи аттхо ‘‘дит̣т̣хасса хоти па̄ра̄джикам̣ дхаммам̣ аджджха̄паджджанто дит̣т̣хе вематико’’ти евама̄дидут̣т̣хадосапа̄л̣иван̣н̣ана̄йам̣ вуттанайенева ведитаббо. па̄л̣иматтамева хи еттха висесо, аттхе пана сатхерава̄де кин̃чи на̄на̄каран̣ам̣ наттхи.

11. сахаса̄ бхан̣атӣти авӣмам̣ситва̄ анупадха̄ретва̄ ва̄ вегена дит̣т̣хампи ‘‘адит̣т̣хам̣ ме’’ти бхан̣ати. ан̃н̃ам̣ бхан̣исса̄мӣти ан̃н̃ам̣ бхан̣атӣти мандатта̄ джал̣атта̄ паккхаланто ‘‘чӣвара’’нти ваттаббе ‘‘чӣра’’нти а̄дим̣ бхан̣ати. йо пана са̄ман̣ерена ‘‘апи бханте майхам̣ упаджджха̄йам̣ пасситтха̄’’ти вутто кел̣им̣ курума̄но ‘‘тава упаджджха̄йо да̄русакат̣ам̣ йоджетва̄ гато бхависсатӣ’’ти ва̄ син̇га̄ласаддам̣ сутва̄ ‘‘касса̄йам̣ бханте саддо’’ти вутто ‘‘ма̄туйа̄ те йа̄нена гаччхантийа̄ каддаме лаггачаккам̣ уддхаранта̄нам̣ айам̣ саддо’’ти ва̄ евам̣ нева дава̄ на рава̄ ан̃н̃ам̣ бхан̣ати, со а̄паттим̣ а̄паджджатийева. ан̃н̃а̄ пӯран̣акатха̄ на̄ма хоти, еко га̄ме тхокам̣ телам̣ лабхитва̄ виха̄рам̣ а̄гато са̄ман̣ерам̣ бхан̣ати – ‘‘твам̣ аджджа кухим̣ гато, га̄мо екатело ахосӣ’’ти ва̄ паччхика̄йа т̣хапитам̣ пӯвакхан̣д̣ам̣ лабхитва̄ ‘‘аджджа га̄ме паччхика̄хи пӯве ча̄ресу’’нти ва̄, айам̣ муса̄ва̄дова хоти. сесам̣ утта̄намева̄ти.

тисамут̣т̣ха̄нам̣ – ка̄йачиттато ва̄ча̄читтато ка̄йава̄ча̄читтато ча самут̣т̣ха̄ти, кирийам̣, сан̃н̃а̄вимоккхам̣, сачиттакам̣, локаваджджам̣, ка̄йакаммам̣, вачӣкаммам̣, акусалачиттам̣, тиведананти.

муса̄ва̄дасиккха̄падам̣ пат̣хамам̣.