9. асан̇кхатасам̣йуттам̣

1. пат̣хамавагго

1-11. ка̄йагата̄сатисутта̄диван̣н̣ана̄

366-376. асан̇кхатасам̣йутте асан̇кхатанти акатам̣. хитесина̄ти хитам̣ есантена. анукампакена̄ти анукампама̄нена. анукампам̣ упа̄да̄йа̄ти анукампам̣ читтена париггахетва̄, пат̣ичча̄типи вуттам̣ хоти. катам̣ во там̣ майа̄ти там̣ майа̄ имам̣ асан̇кхатан̃ча асан̇кхатамагган̃ча десентена тумха̄кам̣ катам̣. еттакамева хи анукампакасса саттху киччам̣, йадидам̣ авипарӣтадхаммадесана̄. ито парам̣ пана пат̣ипатти на̄ма са̄вака̄нам̣ киччам̣. тена̄ха ета̄ни, бхиккхаве, руккхамӯла̄ни…пе… амха̄кам̣ ануса̄санӣти имина̄ руккхамӯласена̄санам̣ дассети. сун̃н̃а̄га̄ра̄нӣти имина̄ джанавивиттам̣ т̣ха̄нам̣. убхайена ча йога̄нурӯпам̣ сена̄санам̣ а̄чиккхати, да̄йаджджам̣ ниййа̄тети.

джха̄йатха̄ти а̄рамман̣ӯпаниджджха̄нена ат̣т̣хатим̣са̄рамман̣а̄ни, лаккхан̣ӯпаниджджха̄нена ча аничча̄дито кхандха̄йатана̄дӣни упаниджджха̄йатха, саматхан̃ча випассанан̃ча вад̣д̣хетха̄ти вуттам̣ хоти. ма̄ пама̄даттха̄ти ма̄ памаджджиттха. ма̄ паччха̄ виппат̣иса̄рино ахуваттха̄ти йе хи пуббе дахарака̄ле арогака̄ле саттасаппа̄йа̄дисампаттика̄ле саттху саммукхӣбха̄вака̄ле ча йонисоманасика̄рарахита̄ раттиндивам̣ ман̇кулабхаттам̣ хутва̄ сеййасукхам̣ миддхасукхам̣ анубхонта̄ памаджджанти, те паччха̄ джара̄ка̄ле рогака̄ле маран̣ака̄ле випаттика̄ле саттху париниббутака̄ле ча там̣ пуббе пама̄давиха̄рам̣ ануссаранта̄ саппат̣исандхика̄лакирийан̃ча бха̄рийам̣ сампассама̄на̄ виппат̣иса̄рино хонти. тумхе пана та̄диса̄ ма̄ ахуваттха̄ти дассенто а̄ха ‘‘ма̄ паччха̄ виппат̣иса̄рино ахуваттха̄’’ти.

айам̣ во амха̄кам̣ ануса̄санӣти айам̣ амха̄кам̣ сантика̄ ‘‘джха̄йатха ма̄ пама̄даттха̄’’ти тумха̄кам̣ ануса̄санӣ, ова̄доти вуттам̣ хоти.

2. дутийавагго

1-33. асан̇кхатасутта̄диван̣н̣ана̄

377-409. ка̄йе ка̄йа̄нупассӣтиа̄дӣсу йам̣ ваттаббам̣, там̣ парато ваккха̄ма.

анатантиа̄дӣсу тан̣ха̄натийа̄ абха̄вена анатам̣. чатуннам̣ а̄сава̄нам̣ абха̄вена ана̄савам̣. параматтхасаччата̄йа саччам̣. ват̣т̣асса парабха̄гат̣т̣хена па̄рам̣. сан̣хат̣т̣хена нипун̣ам̣. сут̣т̣ху дуддасата̄йа судуддасам̣. джара̄йа аджаритатта̄ аджаджджарам̣. тхират̣т̣хена дхувам̣. апалуджджаната̄йа апалокитам̣. чаккхувин̃н̃а̄н̣ена апасситаббатта̄ анидассанам̣. тан̣ха̄ма̄надит̣т̣хипапан̃ча̄нам̣ абха̄вена ниппапан̃чам̣.

сантабха̄ват̣т̣хена сантам̣. маран̣а̄бха̄вена аматам̣. уттамат̣т̣хена пан̣ӣтам̣. сассирикат̣т̣хена сивам̣. нирупаддавата̄йа кхемам̣. тан̣ха̄ккхайасса паччайатта̄ тан̣хаккхайам̣.

вимха̄панӣйат̣т̣хена аччхарам̣ пахаритаббайуттаканти аччхарийам̣. абхӯтамева бхӯтам̣ аджа̄там̣ хутва̄ аттхӣти ва̄ аббхутам̣. ниддуккхатта̄ анӣтикам̣. ниддуккхасабха̄ватта̄ анӣтикадхаммам̣. ва̄на̄бха̄вена нибба̄нам̣. бйа̄баджджха̄бха̄венева абйа̄баджджхам̣. вира̄га̄дхигамасса паччайато вира̄гам̣. параматтхасуддхита̄йа суддхи. тӣхи бхавехи муттата̄йа мутти. ка̄ма̄лайа̄нам̣ абха̄вена ана̄лайам̣. патит̣т̣хат̣т̣хена дӣпам̣. аллӣйитаббайуттат̣т̣хена лен̣ам̣. та̄йанат̣т̣хена та̄н̣ам̣. бхайасаран̣ат̣т̣хена саран̣ам̣, бхайана̄сананти аттхо. парам̣ айанам̣ гати патит̣т̣ха̄ти пара̄йан̣ам̣. сесаметтха вуттанайамева̄ти.

асан̇кхатасам̣йуттаван̣н̣ана̄ нит̣т̣хита̄.