2. йамакавагго

1-4. пат̣хамапуббесамбодхасутта̄диван̣н̣ана̄

13-16. йамакаваггасса пат̣хамадутийесу аджджхаттика̄нанти аджджхаттаджджхаттавасена аджджхаттика̄нам̣. со пана несам̣ аджджхаттикабха̄во чхандара̄гасса адхиматтабалавата̄йа ведитаббо. манусса̄нан̃хи антогхарам̣ вийа чха аджджхаттика̄йатана̄ни, гхарӯпача̄рам̣ вийа чха ба̄хира̄йатана̄ни. йатха̄ несам̣ путтада̄радханадхан̃н̃апун̣н̣е антогхаре чхандара̄го адхиматтабалава̄ хоти, таттха кассачи пависитум̣ на денти, аппаматтена бха̄джанасаддаматтена̄пи ‘‘ким̣ ета’’нти? ватта̄ро бхаванти. евамевам̣ чхасу аджджхаттикесу а̄йатанесу адхиматтабалавачхандара̄готи. ити има̄йа чхандара̄габалавата̄йа та̄ни ‘‘аджджхаттика̄нӣ’’ти вутта̄ни. гхарӯпача̄ре пана но татха̄ балава̄ хоти, таттха чаранте мануссепи чатуппада̄нипи на сахаса̄ нива̄ренти. кин̃ча̄пи на нива̄ренти, аниччханта̄ пана пасупаччхиматтампи гахитум̣ на денти. ити несам̣ таттха на адхиматтабалавачхандара̄го хоти. рӯпа̄дӣсупи татхева на адхиматтабалавачхандара̄го, тасма̄ та̄ни ‘‘ба̄хира̄нӣ’’ти вутта̄ни. виттха̄рато пана аджджхаттикаба̄хиракатха̄ висуддхимагге вутта̄ва. сесам̣ двӣсупи суттесу хет̣т̣ха̄ вуттанайамева. татха̄ татийачатуттхесу.

5-6. пат̣хаманочеасса̄дасутта̄диван̣н̣ана̄

17-18. пан̃чаме ниссат̣а̄ти никкханта̄. висан̃н̃утта̄ти носам̣йутта̄. виппамутта̄ти но адхимутта̄ вимарийа̄дӣкатена четаса̄ти ниммарийа̄дӣкатена четаса̄. йан̃хи килесаджа̄там̣ ва̄ ват̣т̣ам̣ ва̄ аппахӣнам̣ хоти, тена секха̄нам̣ читтам̣ самарийа̄дӣкатам̣ на̄ма. йам̣ пахӣнам̣, тена вимарийа̄дӣкатам̣. идха пана саббасо килеса̄нан̃чева ват̣т̣асса ча пахӣнатта̄ вимарийа̄дӣкатена килесават̣т̣амарийа̄дам̣ атиккантена читтена вихарим̣сӯти аттхо. чхат̣т̣хепи есева найо. чхасупи панетесу суттесу чатусаччамева катхитанти ведитаббам̣.

7-10. пат̣хама̄бхинандасутта̄диван̣н̣ана̄

19-22. саттама̄дӣсу чатӯсу ват̣т̣авиват̣т̣амева катхитам̣. анупуббакатха̄ пана несам̣ хет̣т̣ха̄ вуттанайенева ведитабба̄ти.

йамакавагго дутийо.